«Уйғур авази» гезити, 18 ноябрь 2016 ж.

Төрт жил үзүлүштин кейин Алмутиға ШУАРлиқ эстрада юлтузи Мөмүнҗан Аблеким қәдәм тәшрип қилди. У бу қетим өзи билән биллә кичик дадиси, атақлиқ сәнъәткар Абдулла Абдуреһимни, өзиниң бир туққан акиси, композитор һәм иҗрачи Абләһәт Аблекимни, йеңидин өсүп келиватқан җийәни Мәрдан Аблекимни, шундақла Түркиядин бир топ түрк сазәндилирини  елип кәпту.Алмутиниң Җумһурийәт сарийида өткән бу концертни «Шатлиқ-шоу» продюсерлиқ мәркизиниң рәһбири Шатлиқ Худайқулов ечип, тамашибинларни Қазақстан Җумһурийити Мустәқиллигиниң 25 жиллиқ мәйрими билән тәбрикләп, әйнә шу мәйрәм мунасивити билән Қазақстанға қәдәм тәшрип қилған сәнъәткарларни сәһнигә тәклип қилди. Концерт асасән Мөмүнҗанниң нахшилиридин түзүлгәчкә, дәсләп микрофонни Мөмүнҗан Аблеким алди.

Сәнъәткар өз нутқини, адәттикидәк, һәзил-чақчақтин башлап, андин тамашибинлар сеғинип күткән бирнәччә йеңи нахшиларни орунлап бәрди. Риясәтчиликниму биллә елип маңған эстрада юлтузи өзидин кейин сәһнигә Мәрдан Аблекимни тәклип қилди. Сәнъәткә йеңидин қәдәм тәшрип қилған Мәрдан бирдинла бир җүп нахшиси арқилиқ тамашибинларниң қәлбидин орун алди.

Сәһнигә тәклип қилинған новәттики сәнъәткар Абләһәт Аблеким болди. Уни Мөмүнҗан тамашибинларға әтраплиқ тонуштурди. Униң көпчилик билип кәтмәйдиған бир сири һәққидиму ейтип бәрди.

— Кейинки вақитларда силәрниң сөйүмлүк нахшаңларға айланған шаир Илия Бәхтияниң сөзигә йезилған «Билип қойғин, уйғур дегән мошундақ» нахшиниң аһаңини Абләһәт акам язған еди. У мошу нахшиси арқилиқ қазақстанлиқ уйғурлар билән ШУАРлиқ қериндашларниң арисиға пат-пат бир-биримизни көрүп туридиған йол салди.

Мошундақ иллиқ гәпләрдин кейин ака-укилар мәзкүр нахшини биллә орунлиди. Әлвәттә, уларға Түркиядин кәлгән қериндашлиримиз тәңкәш болди. Мундақ көрүнүш залда олтарған үч миңға йеқин тамашибинға шундақ тәсир қилдики, улар нахшини орунлиридин туруп тиңшиди.

ШУАРдики бу атақлиқ сәнъәткарлар сулалисини сеғин­ған тамашибинлар Абдулла Абдуреһимниму хуш кәйпиятлар илкидә қарши алди. Сәнъәткар өзиниң сеғинишлиқ һиссиятлирини икки нахшиси арқилиқ йәткүзди. Тамашибинлар уни гүлдүрлигән алқишлири билән сәһнидин қоюп бәргүси кәлмиди.

Үч-төрт күндин бери Алмутида қелин қар яққанлиқтин, шәһәрниң ичидә йол қатнаш еғирлашти. Шуниңға мунасивәтлик йәттә йеримда башланған концертқа кечикип кәлгүчиләрниң айиғи саат онғичә давам қилди. Һәтта сәнъәткарлар ахирида «Қериндашлар» намлиқ нахшисини иҗра қиливатқанда, һасирап-һөмүдәп кирип кәлгән адәмләрму болди. Буниңға қарап, тамашибинлиримизниң ШУАРлиқ сәнъәткарларни қанчилик дәриҗидә сеғинғанлиғини байқавелиш тәс әмәс еди. Амма Мөмүнҗан «бу ахирқи дидарлишиш әмәс, йәнә йенип көрүшкичә аман болайли» дегәндә, залда йәнә гүлдүрлигән алқишлар яңриди.

Сүрәттә: Мәрдан Аблеким (солдин оңға), Абләһәт Аблеким, Абдулла Абдуреһим вә Мөмүнҗан Аблеким.

Бәхтишат СОПИЕВ.

http://uyguravazi.kazgazeta.kz/?p=27248#more-27248