Open login
«Бизниң нахша»
13.10.2017 00:25   

«Уйғур авази» гезити 12 октябрь, 2017

 

Йәкшәнбә күни Алмута шәһиридики Җумһурийәт сарийида җараңлиқ, зилва авази билән сәнъәт мухлислирини өзигә мәһлия қилған талантлиқ нахшичи һәм композитор Санийәм Исмайилниң «Бизниң нахша» намлиқ йәккә концерти болуп өтти.

шуни ейтиш керәкки, бу концерт салаһийәтлик мутәхәссисләр тәрипидин заманивий техника васитилирини пайдиланған һалда жуқури дәриҗидә уюштурулупту. Санийәм Исмайил http://parvaz.kz/index.php/2012-04-11-15-19-52 концертини әл ичигә тариған әң аммибап «Мениң исмим уйғур қизи» нахшиси билән башлиди. Һә, тамашибинлар уни гүлдирас чаваклар билән қарши алди.

Көплигән яш сәнъәтчиләрниң бешини қошуп, уларниң чоң сәһниләрдә һүнәр көрситишигә түрткә болуп келиватқан «Пәрваз» иҗрачилар бирләшмиси вә заманивий сәнъәт мухлислириға яхши тонуш «Дәрвишләр» топи әзалириниң йеқиндин яр-йөләк болушида өткән ушбу концерт һәммә җәһәттин тамашибин көңлидин чиқти, дәп ейтишқа толуқ асас бар. Чүнки бу күни Санийәм Исмайил иҗра қилған шох, йеқимлиқ, жигирмигә йеқин нахшини җанлиқ авазда тамашибин қәлбигә жуқури маһарәт билән йәткүзүлгәнлиги иҗрачиниң һәқиқий талант егиси екәнлигини йәнә бир қетим испатлиди. Буниңдин ташқири иҗра қилинған нахшиларниң сөзи билән музыкисиниң тәңдин-толисини Санийәм Исмайилниң өзи язған.

– Мән шәхсән өз бешимдин нурғун иссиқ-соғларни өткүздүм. Мениң нахшилирим һаятимниң әйни десәмму болиду. Имканийитимниң йетишичә бүгүн хошаллиғим билән ғәм-қайғуримни шулар арқилиқ мухлислиримға йәткүзүшкә тириштим, дәп тамашибинлар билән бөлүшти нахшичи.

Концертта нахшичи өз иҗадидинла әмәс, бәлки хәлиқ нахшилириниму иҗра қилип, дил тарлирини тәвритивәтти. Мәсилән, Қазақстанға хизмәт көрсәткән сәнъәт әрбаби Марат Норузовниң җор болушида дутар билән «Әҗәм» муқамини ейтқинида, көпчилик нахшичиниң миллий саз әсваплиримизниңму «қулиғида ойнайдиғанларниң бири» екәнлигигә қайил болушти. Әнди «Сеғиндиңму», «Ним пәдә», «Шах шах чинар» вә шуниңға охшаш башқиму шох нахшилар яңриғанда, тамашибинларниң топ-топ болушуп, уссулға чүшти. Концертни тамашә қиливатқанларниң кәйпиятини хәлиқ таланти Алимҗан Бавдинов билән риясәтчи Дилшат Закиров иккисиниң арилиқтики қизиқарлиқ һәм мәзмунлуқ монологи техиму көтиривәтти. Чүнки улар тамашибинларни болупму яшларни ана тилимизни унтумаслиққа чақирип, иҗтимаий торларда өз исимлирини тоғра пайдиланмай жүргәнләрни мәсхирә қилди.

Санийәм Исмайилниң сәнъәт йолидики арманлириниң бирини рояпқа чиқиришта мәзкүр концерт программисиниң продюсери Дилмурат Баһаров билән “Пәрваз” иҗрачилар бирләшмиси рәисиниң орунбасари Райим Һәмраев көп тәр төкүпту. Ахирида мошуни алаһидә тәкитлигән нахшичи уларға һәм барлиқ қоллап-қувәтлигүчиләргә чәксиз

миннәтдарлиғини изһар қилди.

Йолдаш МОЛОТОВ, «Уйғур авази»

http://uyguravazi.kazgazeta.kz/?p=31616#

 
Интересный материал? Поделись с другими:

Добавить комментарий


Защитный код
Обновить