Open login
Баһарда яңриған йеңи нахшилар
09.03.2019 12:10   

«Уйғур авази» гезити, 6 март, 2019 ж.

Йоруқ дунияға әндила көз ачқан сәбиму һаят босуғисиға өзигә хас «нахшиси» билән атлайдекән. Шуңлашқа һәрбир инсанниң қәлбидә туғулушидинла «жүрәк күйи» яңрап туриду. Нәқ шу жүригимизниң авази, арзу-арман, үмүт, муһәббәт вә өкүнүш, пушайманлиримизниң изһари – нахша болуп яңрайду. Ички дуниямизда сақлаватқан сирлиримизниң ачқучини нахшидин издәймиз. Үмүт учқунини нахша ялқунлитиду. Нахша инсанға мәнивий күч-қувәт бериду.

 

Көпчилигимизниң нәзәридә нахша-саз шатлиқниң, хошаллиқниң рәмзи сүпитидә қобул қилиниду. Амма хәлқимиз әң еғир дәқиқиләрдиму өзиниң муң-муһтаҗини нахша арқилиқ изһар қилған. Нахшини қәлб күйи, жүрәк садаси яки мәнивий һалитимизниң баянати дәп қобул қилсақ болиду.

 

Бүгүнки аләмшумуллаштуруш дәвридә, мәзмунидин роһлинидиған, һәқиқий мәнасида мәнивий озуқ алидиған йеңи-йеңи нахшиларға еһтияҗимиз бар екәнлигини һәммимиз яхши билимиз. Әйнә шундақ көпчиликниң қәлбидин мәккәм орун алған нахшиларни рояпқа чиқирип, хәлқимизниң һөрмәт-еһтирамиға еришкән яшлиримизниң арисида бәстикар композиторлиримиз, нахшичилиримиз вә сәнъәткарлиримизниң болуши — миллий сәнъитимизниң кәлгүсигә капаләтлик бериду.

Йеқинда Алмутидики Студентлар сарийида нәччә жилдин бери хәлқимизниң иззәт-еһтирамиға еришип, көңлидин чиқип келиватқан «Яңра, нахшам» лайиһисиниң новәттики концерти болуп өтти. Мәзкүр лайиһиниң муәллипи, «Artur productіon» продюсерлиқ мәркизиниң мудири Артур Илахуновниң http://parvaz.kz/index.php/2012-04-11-15-12-21 рәһбәрлигидә өткүзүлгән нахша кечилигиниң мәнивий қанаәтлиниш һасил қилған тамашибинниң хатирисидә узақ сақлинидиғанлиғида шәк-шүбһә йоқ. Концертниң сценарий муәллипи һәм режиссери Әзиз Сәйптулланиң аз әҗир сиңдүрмигәнлиги, сәһнигә көтирилгән яш иҗрачиларниң чоң тәйярлиқлар билән кәлгәнлиги ениқ байқалди. Концерт «дутар шаһи» Абдуреһим Һейтниң «Виждан» нахшиси билән ечилди. Фируза Җалалова, Меһрат Рәхмәтҗан, Адилҗан Һемитов (Адил қари), Сейитҗан Зайитов, Альбина Әмәтованиң иҗрасида яңриған нахшилар тамашибин қәлбидин орун алди. Талант егилири Алимҗан Бавдинов, Бәхитҗан Савурҗанов, Рахман Мухпулов, Мурат Әйсаров, Дилшат Закирниң орунлишидики этюдларму көпчиликкә хуш кәйпият беғишлиди.

Концертта Ташгүл Һезиярова, Артур Илахунов, Ризайдин Сейитов, Ильяр Мәшүров, Сүлфи Мәшрәпов, Коммунар Турсунов, Альбина Әмәтова муәллиплигидә йезилған йеңи нахшиларниң дунияға кәлгәнлигиниң гувачиси болдуқ.

«Яңра, нахшам» концерти Артур Илахуновниң иҗрасида өзиниң «Көк бөрә» нахшиси билән аяқлашти.

Румиләм ҖӘРИПОВА.

http://uyguravazi.kazgazeta.kz/?p=38304

 
Интересный материал? Поделись с другими:

Добавить комментарий


Защитный код
Обновить