Open login
Композиторниң тәвәллудиға беғишланди
09.03.2019 12:12   

Рашидәм РӘҺМАНОВА,

«Уйғур авази» гезити, 6 март, 2019 ж.

Йеқинда Қазақстан мәдәнийитиниң иптихари, уйғур кәспий музыка сәнъитиниң асасини салғучиси, «Ризвангүл» симфониялик поэмиси, «Назугум», «Садир палван» оперилири, «Чинтөмүр батур» балетиниң муәллипи, мәшһур композитор, хәлқимизниң мунәввәр пәрзәнди Қуддус Ғоҗамияровниң ана жути – Әмгәкчиқазақ наһийәсиниң Қәйнәзәр йезисидики Мәдәнийәт өйи коллективиниң уюштуруши вә Әмгәкчиқазақ наһийәлик Уйғур этномәдәнийәт мәркизиниң қоллап-қувәтлиши билән композиторниң хатирисигә беғишланған иҗадий кәч болуп өтти.

 

Атап кетиш керәкки, қазақстанлиқ бүйүк мәдәнийәт әрбаплириға беғишланған һәрхил чарә-тәдбирләрни өткүзүш мәзкүр Мәдәнийәт өйиниң әнъәнивий иш планиға киргүзүлүп, «Рухани жаңғыру» программиси асасида «Ұлы тұлғалар» мавзуси билән әмәлгә ашмақта.

 

Кәчкә Қәйнәзар йезилиқ Мәдәнийәт өйиниң хадими Арман Ыдырысов вә Рахат оттура мәктивиниң муәллими Саһинур Мусалимова риясәтчилик қилди. Улар Қуддус Ғоҗамияровниң тәрҗимиһали вә паалийити һәққидә қазақ вә уйғур тиллирида тонуштурди. Мәдәнийәт өйи хадимлири вә Қәйнәзәр йезисидики «Баһар» ансамблиниң орунлинишида Қ.Ғоҗамияровниң композициясидин елинған «Чимбулақ», «Каккук», «Вәдә» әсәрлири, қазақ вә уйғур тилларда заманивий нахша-сазлар яңрап, улар тамашибинларниң гүлдирас чаваклири билән қарши елинди. Роза Сетивалдиева, Һәмраҗан Тохтибақиев, Шерингүл Дуганова, Гүлзарә Сулайманова, Сәйдәквәр Тараев, Җөһәрбүви Надирова иҗра қилған нахшилар чоң әвлат вәкиллиригә арамбәхш дәмлирини һәдийә қилса, рус тилида билим еливатқан Камиләм Ханзатова билән Мадина Һетахунованиң ана тилида ейтқан нахшилири билән оқуған шеирлири тамашибинларда чоңқур тәсират қалдурди. Шундақла қазақ иҗрачиси Бауыржан Қусайын орунлиған уйғурчә «Яригүллә» нахшисиму көпчиликниң көңлидин чиқти.

Ахирида Ишиктә шәһири Т.Молдағалиев намидики Мәдәнийәт өйиниң мудири Бауыржан Шаяхметов, Әмгәкчиқазақ наһийәлик Уйғур мәдәнийәт мәркизи йенидики Ханим-қизлар кеңишиниң рәиси Нурбүви Насирова, Қәйнәзәр йезисиниң жигитбеши Кевир Яқупов сөзгә чиқип, уйғурлар арисидин, йәнә келип Қәйнәзәр йезисидин улуқ композиторниң йетилип чиқишиниң, униң жуқури аброй-атақларға еришишиниң жутдашлири үчүн зор пәхирлиниш екәнлигини йәткүзди. Натиқлар шундақла йезидин униңға охшаш йәниму көплигән талант егилириниң йетилип чиқидиғанлиғиға ишинидиғанлиғини, кәчни уюштурған Қәйнәзәр Мәдәнийәт өйиниң коллективиға, «Баһар» ансамблиға вә Рахат йеза округиниң җәмийәтлик ишлар активистлириға миннәтдарлиғини билдүрди.

Кәчни Мәдәнийәт өйиниң мудири Райхан Жанбосынова йәкүнләп, миллитидин, диний етиқатидин қәтъий нәзәр, Қазақстан мәдәнийитиниң риваҗлинишиға үлүшини қошқан есил әҗдатлиримизниң роһиға баш егип, тазим қилиш – бизниң муқәддәс борчимиз екәнлигини йәткүзди. Кәчкә тәйярлиқ қилиш җәриянида барлиқ вақтини Мәдәнийәт өйидә өткүзүп, төһпә қошқан Нурбүви Насирова вә Җөһәрбүви Надироваға яғлиқ артип, миннәтдарлиғини изһар қилди.

 

Әмгәкчиқазақ наһийәси.

http://uyguravazi.kazgazeta.kz/?p=38345

 
Интересный материал? Поделись с другими:

Добавить комментарий


Защитный код
Обновить