Open login
Главная Новости «Баһар қайтиду»
«Баһар қайтиду»
08.04.2019 01:40   

«Баһар қайтиду»

Рашидәм РӘҺМАНОВА,

«Уйғур авази» гезити, 3 апрель, 2019 жил

Абдумеҗит Дөләтовниң хатирисигә беғишланған әнъәнивий “Баһар қайтиду” намлиқ шеирийәт фестивали бийил шаирниң 70 жиллиқ тәвәллудиға беғишлинип, җумһурийәтлик Уйғур этномәдәнийәт мәркизи, Әмгәкчиқазақ наһийәлик билим бөлүми, “Уйғур мәктәплирини қоллаш” фонди, Әмгәкчиқазақ наһийәлик Уйғур этномәдәнийәт мәркизи вә Челәк йезисидики А.Розибақиев намидики мәктәпниң уюштуруши вә қоллап-қувәтлиши билән Челәк йезисиниң Мәдәнийәт өйидә кәң даиридә атап өтүлди.

Шаирниң жутдашлири вә жирақ-йеқиндин кәлгән меһманлар 30-март күни әтигәнлиги Байсейит йезисиниң тупрақ бешиға жиғилди.

Хәлқимизниң даңлиқ шаири Абдумеҗит Дөләтовниң қәбригә гүлчәмбәрләр қоюлуп роһиға атап қуръан оқулди. Симилдап ямғур йеғишқа башлиди, товва у күни асманму қайғуруп биз билән жиғлимақта…

Челәк йезилиқ Мәдәнийәт өйиниң алдида маһир сазәндә Абдусәмәт Василовниң башчилиғидики нағричилар меһманларни дағдуғилиқ қарши алди.

– Шаирниң авази

тағларда қалди,

Әкис сада билән

яңрап һаманәм.

Һаятқа муһәббәт

бағларда қалди,

Бу йәрдә шаирим

– Сирдаш намайән.

 

Әпсус, миңларчә әпсус… бирақ, аримизда шаир өзи йоқ. Шеирийәт беғини гүллитип, йорутқан инсан – Абдумеҗит Дөләтовни бир минутлуқ сүкүнат билән әскә алайли, – дәп башлиди хатирә кечини риясәтчиләр.

 

А.Розибақиев намидики оттура мәктивиниң уйғур тили вә әдәбияти пәниниң муәллими Надира Тейипова шаирниң тәрҗимиһали, паалийити вә иҗадийити билән тонуштурғандин кейин дәсләпки сөз Челәк йеза округи һакиминиң орунбасари Мади Бектасовқа берилди. У шаир вә униң қериндашлири һәққидә иллиқ ләвзини билдүрди.

Новәттики сөзгә чиққан шаир, Қазақстан Язғучилар иттипақиниң әзаси Җәмшит Розахунов балилиқ чеғидин биллә өсүп, чоң болған дости Абдумеҗит Дөләтов билән биллә өткүзгән күнлирини әсләп, хатирилири билән бөлүшти вә қәләмдишиға беғишлиған шеирини оқуп бәрди.

Андин сөзгә чиққан натиқлар – җумһурийәтлик “Уйғур авази” гезитиниң баш муһәррири Ершат Әсмәтов, ҖУЭМ Алмута шәһәрлик шөбисиниң рәиси Әбәйдуллам Җаппаров, язғучи Гүлбәһрәм Хошаева, “Варис” әдәбий-иҗадий бирләшмисиниң рәиси Вильям Молотов вә башқилар А.Дөләтов һәққидә иллиқ хатирилирини ейтип өтти.

Шуниңдин кейин минбәргә “Уйғур мәктәплирини қоллаш” фондиниң мудири, филология пәнлириниң доктори, профессор Алимҗан Тиливалди көтирилип, алтә ай мабайнидики фестивальға тәйярлиқ җәрияниға тохталди. У бу муһим ишни жуқури дәриҗидә әмәлгә ашурушқа алаһидә күч чиқарған шәхсләргә миннәтдарлиғини билдүрди.

Натиқ шундақла оқуғучиларниң мәзкүр фестиваль иштрак қилишиға мүмкинчиликләр яритип бәргән ата-анилар вә уларға ғәмхорлуқ көрсәткән устазларға рәхмитини ейтти. Уйғур наһийәси Түгмән вә Кичик Ақсу оттура мәктәплири, Әмгәкчиқазақ наһийәсиниң И.Саттаров намидики оттура мәктиви вә Панфилов наһийәси Чулуқай оттура мәктиви алаһидә паалийәтчанлиқ көрсәткәнлигини атап, башқиларниңму бу мәсилигә көңүл бөлүшини сориди.

Ейтмақчи, конкурс шәрти бойичә, бу шеирлар алдин-ала адил қазилар муһакимисигә қоюлуп, нәтиҗидә 52 оқуғучиниң шеири таллавелинди.

Андин «Ипадилик оқуш» номинацияси бойичә ғалип чиққан Долата оттура мәктивиниң 8-синип оқуғучиси Бәхтияр Розахунов, Кичик Ақсу оттура мәктивиниң 8-синип оқуғучиси Юлтузай Нодәрова, Ғалҗат оттура мәктивиниң 9-синип оқуғучиси Арслан Мәхсүтов (Уйғур наһийәси), Чоң Чиған оттура мәктивиниң 10-синип оқуғучиси Румиләм Турсунова, Ә.Қастеев намидики оттура мәктивиниң 7-синип оқуғучиси Дилмира Мәмтиева (Панфилов наһийәси), Маливай оттура мәктивиниң 8-синип оқуғучиси Пәрвиза Рәхмәтҗан, Түгмән оттура мәктивиниң оқуғучиси Дилнара Әбәйдуллаева (Уйғур наһийәси), 28-оттура мәктивиниң оқуғучиси Сабина Мәһәммәтҗанова, И.Тайиров намидики Байсейит оттура мәктивиниң 8-синип оқуғучиси Сумбат Сәйдуллаева вә И.Саттаров намидики Ғәйрәт оттура мәктивиниң оқуғучиси Дияра Абдикаримова (Әмгәкчиқазақ наһийәси) арисида конкурс уюштурулди. Уларниң ичидин «Әң жүгрүклирини» ениқлаш асан болмиди, әлвәттә. Чүнки сәһнигә көтирилгән яш һәвәскарларниң барлиғи дегидәк жуқури баһаға лайиқ еди. Уларниң қабилийитини фестивальға қәдәм тәшрип қилған язғучи-шаирлар вә зиялилар баһалиди. Нәтиҗидә «Ипадилик оқуш» номинацияси бойичә Әмгәкчиқазақ наһийәси И.Тайиров намидики оттура мәктивиниң 8-синип оқуғучиси Сумбат Сәйдуллаева І орунға вә ҖУЭМ йенидики «Җанан» фондиниң мукапитиға егә болса, Уйғур наһийәси Ғалҗат оттура мәктивиниң 9-синип оқуғучиси Арслан Мәхсүтов ІІ орунни һәм А.Дөләтовниң пәрзәнтлириниң мукапитини вә Уйғур наһийәси Кичик Ақсу оттура мәктивиниң 8-синип оқуғучиси Юлтузай Нодәрова ІІІ орунни вә Алмута шәһәрлик УЭМниң мукапитини егиләшкә муйәссәр болди.

«Шеир иҗат қилиш» номинацияси бойичә Әмгәкчиқазақ наһийәси И.Саттаров намидики оттура мәктәпниң 9-оқуғучиси Руфина Мәсимахунова ІІІ орун вә Алмута шәһәрлик Уйғур этномәдәнийәт мәркизиниң 20 миң тәңгилик мукапитиға егә болса, Әмгәкчиқазақ наһийәси А.Бертаева намидики оттура мәктәпниң 7-синип оқуғучиси Дилназ Сонур ІІ орун вә Дөләтовлар аилисиниң 30 миң тәңгилик мукапитини егилиди. І орун вә Әмгәкчиқазақ наһийәлик Уйғур этномәдәнийәт мәркизиниң 40 миң тәңгилик соғисиға Уйғур наһийәси Һезим Искәндәров намидики оттура мәктәпниң 10-синип оқуғучиси Назгүл Һакимова муйәссәр болди.

Әнди баш мукапат – Гран-при Уйғур наһийәси Ақтам оттура мәктивиниң 9-синип оқуғучиси Мәрийәм Низамдинованиң әнчисигә тәгди. У шундақла «Һекмәт» мәшрәп әһлиниң маддий соғисиға егә болди.

Атап кетиш керәкки, бу күнки шеирийәт мәйрими иштракчилар диллириға илһам беғишлап, уларниң қәлбидә яш сәнъәткарларни рәғбәтләндүрүш, шу арқилиқ ана тилимизни тәрәққий әткүзүш, көрнәклик вә көпчиликниң сөйүмлүк шаири Абдумеҗит Дөләтовниң исмини әбәдийләштүрүш йолидики чариләргә паал қатнишиш нийитини ойғатти. Нәтиҗидә хәлқимиз ичидин чиққан милләтпәрвәр инсанлар биридин кейин бири сәһнигә чиқип, балиларға соғилирини тапшурди. Фестивальға қатнашқан балиларниң барлиғи һәм уларниң устазлири, мәктәпләр мәмурийәтлири маддий соға, китаплар, диплом вә пәхрий ярлиқларға егә болушти.

Болупму Әмгәкчиқазақ наһийәлик Уйғур этномәдәнийәт мәркизи рәисиниң орунбасари Майдин Абдуллаев, Челәк йезиси А.Розибақиев намидики оттура мәктәпниң устазлири Гөһәрбүви Идрисова, Хуршидәм Һәмраева, Үнчинур Исмайилова, Гүлназ Қалияқын, вә Надира Тейиповаларниң исимлирини алаһидә тилға елишқа әрзийду.

Сәһнигә көтирилгән барлиқ натиқлар мәзкүр шеирийәт мәйримини уюштурғучиларға өзлириниң миннәтдарлиғини изһар қилип, бу әнъәнини давамлаштуруш һаҗәтлигини ейтти.

Фестиваль давамида «Дәрвишләр» топи вә «Нава» ансамблиниң нахшичисиМихрат Рәхмәтҗанниң орунлишида шаирниң шеирлириға йезилған бир түркүм нахшилар тамашибинлар диққитигә һавалә қилинди. Шундақла сазәндә Пәрһат Мәхпиров шаирниң «Аста унтуп баримән» вә Җәмшит Розахуновниң «Сөйгү бизни дост қилған» нахшилирини орунлап бәрди.

Ахирида шаирниң қом-қериндашлири Алимҗан Тиливалди билән шаир Вильям Садиқовқа чапан кийгүзди. Өз новитидә миллий мәдәнийитимиз җанкөйәри Абдумеҗит Абдуллаев вә шаирә Шаирәм Баратова мәзкүр чарә-тәдбирни өткүзүштә маддий җәһәттин қоллап-қувәтлигән барлиқ сахавәтлик инсанларға, җәмийәтлик ишлириниң активистлириға вә Дөләтовлар аилисигә уюштурғучилар намидин сәмимий миннәтдарлиғини изһар қилди.

Мәрасим ахири жирақ-йеқиндин кәлгән меһманларниң һөрмитигә зияпәт уюштурулуп, у йәрдә шаирниң пәрзәнтлири Саида, Мәвлан, Рафаэль вә Әлишерлар көпчиликкә өзлириниң рәхмитини ейтти.

 

Әмгәкчиқазақ наһийәси.

http://uyguravazi.kazgazeta.kz/?p=38697

 
Интересный материал? Поделись с другими: