Open login
Главная
Уйғур қизи — Италия сәһнисидә.
20.09.2013 20:21   

«Уйғур Авази» гезити, 20.09.13

Бийил 21 — 26-август күнлири Италияниң Римини шәһиридә «Rіmіnі Stars-2013» ІІ хәлиқара фестиваль-конкурс болуп өтти. «Триумф» иҗадий бирләшмисиниң лайиһиси болған мәзкүр конкурсқа Россиядин, Европа әллиридин балиларниң иҗадий коллективлири, қабилийәтлик яшлар иштрак қилди. Қазақстандин болса, униңға Уйғур наһийәсиниң Кичик Дехан йезисидики М.Тейипов намидики оттура мәктәпниң 3-синип оқуғучиси Шаһзадә Иминова қатнашти. Алаһидә тәкитләш керәкки, Шаһзадә бу фестиваль-конкурста лауреат атилип, І дәриҗилик диплом билән тәғдирләнди. Униңдин ташқири, өзиниң әвришим уссуллири билән тамашибинни мәһлия қиливалған яш уссулчи жюри әзалириниң мәхсус дипломи биләнму мукапатланди.

Биз гезитимиз сәһипилиридә Шаһзадәниң утуқлири тоғрилиқ бирнәччә қетим язған едуқ. Шундақ болсиму, униң муваппәқийәтлирини йәнә бир қетим тәкитләп өтүшни тоғра көрүватимиз. 2012-жили, Шаһзадә Алмута вилайити һакиминиң мукапити үчүн өткән «Жетісу жұлдыздары-2013» конкурсида ІІ дәриҗилик диплом билән тәғдирләнгән еди. 2013-жили болса, җумһурийәтлик «Әнші балапан» балилар иҗадийити конкурсида І дәриҗилик дипломға қол йәткүзди, шундақла «Ғұмырдария» өсмүрләр вә балиларниң иҗадийити V хәлиқара конкурсида «Уссул» номинацияси бойичә биринчи орунни йеңивалди.

— Шаһзадә «Ғұмырдария» конкурсида биринчи орунни йеңивалғандин кейин, униңға Италиядә өтидиған «Rіmіnі Stars» хәлиқара конкурсиға йолланма берилди, — дәйду яш уссулчиниң дадиси Шаһам Иминов. — Шуниңдин кейин биз тәйярлиқ ишлирини башлавәттуқ. Қизим язлиқ тәтилдә дәм алмиди, десәмму болиду. Бизгә уссулларни сәһниләштүрүштә тонулған балетмейстер Гүлбаһар Қасимова наһайити чоң ярдәм қилди. Гүлбаһар һәдиниң мәслиһити билән Шаһзадә уйғурларниң «Чинә-тәхсә» уссулини үгәнди. Конкурс үчүн төрт уссул тәйярлиған болсақму, нәқ мошу уссул Италиядә тамашибинларни мәһлия қиливалди. Униңдин ташқири, һәр бир уссул үчүн лайиқ кийим-кечәк керәк болғанда, бизгә тикинчи һәдимиз Тамара Сәйдимова көп ярдәм қилди. Шундақла бизниң Италиягә берип, келишимизгә маддий вә мәнивий ярдәм көрсәткән, һазир Алмутида истиқамәт қиливатқан жутдашлиримға, Қайрат жутиниң жигитбеши Мәрүпҗан Ахуновқа, «Кәтмән» оттуз оғул мәшрәп әһлигә, «Пәрваз» уйғур иҗрачилири бирләшмисигә өз миннәтдарлиғимни билдүримән.

Тәкитләш керәкки, «Rіmіnі Stars» фестиваль-конкурси давамида конкурс қатнашқучилири дунияға исми тонулған нахшичилар, хореографлар билән учришишқа муйәссәр болди. Шаһзадә Иминова атақлиқ италиялик хореограф, фестиваль-конкурсниң жюри әзаси Джермано Ди Росси билән учришип, униң «Эстрада артистлири үчүн сәһнә хореографияси» мавзусидики маһарәт дәрисигә қатнишиш пурситигә еришти. Бу тәҗрибиләрниң һәммиси Шаһзадиниң келәчәктә иҗадий өсүшигә, йеңи-йеңи утуқларға йетишигә тәсирини тәккүзидиғанлиғи ениқ. Шундақ екән, униң пәқәт ақ йоллуқ болушиға тиләкдашлиқ билдүрүмиз.

Йолдаш МОЛОТОВ

http://uyguravazi.kz/?p=10085#more-10085

 
Интересный материал? Поделись с другими: