Open login
Главная
«Диярниң» концертиға мәрһәмәт!».
08.11.2013 15:37   

«Уйғур авази» гезити 8 ноябрь 2013 ж.


Нурум ӘХМӘТОВ: Мошу жилниң 17-ноябрь күни Алмутидики Ө.Жолдасбеков намидики Студентлар сарийида исми сәнъәтсөйәр аммиға яхши мәлум «Дияр» ансамблиниң қурулғининиң 10 жиллиғиға беғишланған «Илһам садаси» намлиқ йәккә концерт өткүзүлмәкчи. Бу сәнәлик вақиә һарписида биз мәзкүр иҗадий коллективниң бәдиий рәһбири Нурум Әхмәтов билән сөһбәтләшкән едуқ.

— Нурум, сөһбитимизни башлаштин авал иҗадий мәйримиңлар — «Дияр» топиниң 10 жиллиқ тәвәллуди билән сәмимий тәбрикләймиз.

— Рәхмәт.

— Әйнә шуниңға мунасивәтлик өткүзүлүватқан йәккә концерт силәр үчүн чоң әһмийәткә егә болса керәк?

— Әлвәттә. Бу — иҗадий коллективниң шәхсий мәйрими болупла қалмай, бәлки өз мухлислири алдида берилидиған һесавити. Демәк, бу концерт биздин җиддий тәйярлиқни тәләп қилиду, дегән сөз. Шуңлашқа һазир барлиқ күч-ғәйритимизни шуниңға сәрип қиливатимиз.

— Байқишимизчә, йәккә концертиңлар һарписида коллективиңларниң тәркивидә бираз өзгиришләр йүз бәргәндәк көрүниду…

— Иҗадий қувитимизни мустәһкәмләш һәм шу арқилиқ мухлислиримизға кәспий һәм сүпәтлик мәһсулатлиримизни тәғдим қилиш мәхситидә тәркивимизни талантлиқ алмутилиқ нахшичи Марс Қурбанов вә икки өзбәкстанлиқ кәсипдишимиз билән толуқтурдуқ. Уларниң бири — бас гитаричи Тавакәл Ниғмәтов.  Ташкәнттә исми көпчиликкә тонулған сәнъәт топлири вә сәнъәткарлар билән иҗадий һәмкарлиқта ишләп, тәҗрибә топлиған жигит. Иккинчиси — клавиш маһири һәм аранжировщик Расул Розиев. Униңға һазир қошумчә ансамблимизниң музыкилиқ рәһбири вәзиписиму жүкләнди. «Диярниң» тәркивидә йүз бәргән өзгириш мана мошуниңдин ибарәт.

 

— Бийил «Диярға» 10 жил дәватисиләр. Билидиғинимиз, бу ансамбль Яркәнттә өткән әсирниң 90-жиллири қурулған әмәсму?

— У дегиниң раст. 1994-жили Яркәнттә тәркивигә икки коллектив — фольклор һәм эстрадилиқ топлар киридиған «Дияр» ансамбли қурулди. Униң биринчисигә Полат Һезимов, иккинчисигә Һакимҗан Тохтахунов рәһбәрлик қилди. Мән әмгәк паалийитимни «Диярниң» әйнә шу биринчи, йәни эстрадилиқ топидин башлиған. Дәсләп қурулған жиллири Яркәнт вә униң әтрапидики жутларда концертларни қойдуқ. Шу вақиттики әң аммибап сәнъәт көрүклириниң бири «Яркәнт» фестивалида икки қетим Баш мукапатни елишқа муйәссәр болдуқ. Қазақстан телевидениесиниң уйғурчә көрситишләр программиси арқилиқ эфирғиму чиқтуқ. Әнди бийил 10 жиллиғини нишанлаватқан у «Диярниң» өз алдиға қурулған иккинчи тәркиви.

— «Диярниң» бу тәркиви өз паалийитини Алмутида башлиди әмәсму?

— Шундақ. Йеңи тәркивимиздә дәсләп мениң билән Ялқун Сабитов, Ильяр Мәшүров, Насима Шаваева, Рустәм Ниязов, Велахун Насиров болди. Мәлум вақит өткәндин кейин уларниң айримлири өз алдиға ишләш йолини таллавалди. Әйнә шуниңдин бери Велахун ака, Рустәм үчимиз ансамбль паалийитини давам қилип кәлдуқ. Һәрхил сорунларда болсун, чоң сәһниләрдә болсун кәспий саз-нәғмилиримизни, нахшилиримизни яңритип, мухлислиримиз санини хелила көпәйтишкә муваппәқ болдуқ.

Шундақ қилип 2005-жили дәсләпки альбомимиз Үрүмчидә Әнвәр Махмут рәһбәрлигидики «Замин» студиясидә CD вә VCD шәклидә чиқти. Бу җәһәттин бизгә алмутилиқ һисдашлиримиз «URD» студияси, җүмлидин ата-бала Җаппар вә Рашит Йүсүповлар йеқиндин ярдәм қилди. 2007-жили «Art-Rep» топи билән Панфилов, Уйғур, Әмгәкчиқазақ наһийәлиригә вә хошна Қирғизстанниң Бишкек шәһиригә гастрольларни уюштурдуқ. Бийил июнь ейида европилиқ уйғурларниң тәкливигә бенаән Швеция вә Бельгиягә берип, чәтәллик қериндашлиримиз алдида һүниримизни көрсәттуқ.

— «Диярниң» бүгүнкидәк аммибаплиққа егә болуши үчүн хелила «тәр» төккәнсиләр?

— Һәрқандақ утуқ шиҗаәтлик әмгәк, тинмай издиниш нәтиҗисидә қолға кәлтүрүлиду. Шуңлашқа бизгә өткән он жил давамида хелила тәр төкүп, ишләшкә тоғра кәлди. Шаирлар Патигүл Мәхсәтова билән Иминҗан Тохтияровқа, шундақла Аблеким Дамоллаев, Сүлфи Мәшрәпов, Абдулҗан Азнибақиев қатарлиқ һәвәскар шаирларға нахша мәтинлирини яздурдуқ. Уларниң музыкисини асасән ансамбль әзалири Ильяр Мәшүров вә Рустәм Ниязов ишлигән болсиму, көп җәһәттин кәспий композитор Дилмурат Баһаров вә аранжировщик Ихтияр Рәҗәпов ярдәм қолини сунди. Әнди пулсиз һечбир иш пүтмәйдиған бүгүнки күндә бизгә «Мубарәк» кафесиниң мудири Мубарәк Турдиева, «Достлуқ» кафесиниң рәһбәрлири Сәнәбәр вә Дилбәр Чимбулатовалар, тиҗарәтчи Билал Һошуров, өзимиз әза болған «Алмута» мәшриви йеқиндин һамийлиқ қилип кәлмәктә. Ейтмақчи, һазир Үрүмчидә истиқамәт қилидиған талантлиқ иҗрачи Санийәм Исмайил бизгә бир түркүм миллий саз әсваплирини соға қилған. Биз уларға чин қәлбимиздин миннәтдарлиғимизни билдүримиз.

— Ахирқи соал: аз күндә болидиған йәккә концертиңлардин немә күтимиз?

— Бу биз үчүн наһайити җавапкәр пәйт. Шуңлашқа концертқа тәйярлиқ җиддий кетип бариду. Униңда биз сәнъәтсөйәр мухлислиримизға йеңи-йеңи нахшилиримиз билән биллә әҗдатлиримиздин мирас болуп келиватқан хәлиқ нахшилириниму һавалә қилимиз. Концертқа меһман сүпитидә җумһурийәтлик Уйғур театридин хәлқимизниң сөйүмлүк нахшичиси Нуралим Варисов, дапчи Назим Палтахунов, бэк-вокал Дилназ Йолчиева қатнишиду. Пурсәттин пайдилинип, бизни қоллап-қувәтлигини үчүн театр мудири Савутҗан Сонуровқа алаһидә миннәтдарлиғимизни билдүримиз. Уссулларни хәлқимизниң көрнәклик уссулчиси, балетмейстер Зоһра Кәримова билән «Наргиз» ансамблиниң бәдиий рәһбири Меһриниса Ибрагимова тәйярлаватиду.

Қисқиси, «Йүз аңлиғандин, бир көргән әла» демәкчи, қалған тәйярлиқлиримиз тамашибин үчүн сир болуп қалғини тоғра. Әң әвзили, концертимизниң сәнъәтсөйәр аммиға һәқиқий мәнасида арамбәхш дәмләрни беғишлап, һадуғини чиқиридиғанлиғиға ишәнчим камил.

— Сөһбитиңгә рәхмәт. Паалийитиңларға иҗадий утуқлар тиләймиз.

Сөһбәтләшкән

Ершат ӘСМӘТОВ.

http://uyguravazi.kz/?p=10675

 
Интересный материал? Поделись с другими: