Open login
Равапчиларға қолланма.
14.12.2013 00:14   

«Уйғур авази» гезити 13 декабрь 2013 ж.

Йеқинда Қазақстан Җумһурийити Билим вә пән министрлигиниң қоллап-қувәтлиши билән П.Чайковский намидики Алмута музыка колледжиниң йенидики «Сәнъәт вә мәдәнийәт» бирләшмиси яш сәнъәткар Сабирҗан Манашовниң «Равап үгиниш мәктиви» намлиқ әмгигини нәшир қилди.Әҗдатлиримиздин мирас болуп келиватқан миллий саз әсваплири арисида равапниң тутқан орни алаһидә екәнлиги һәммигә мәлум. Мәзкүр әмгәкниң муқәддимисидә равапниң түрлири, униң тарихи билән тәрәққият йоллири һәққидә мәлуматлар берилгән.

Китапниң биринчи бөлүмидә бу саз әсвавини үгинишкә беғишланған һәрхил амиллар орун алған. Атап ейтқанда, равапниң қурулуши, дәсләпки дәрисләр, уни челишта сазәндиниң қандақ олтириши-туруши керәклигини вә шундақла нотилиқ саватини йүксәлдүрүшкә аит тәләп қаидилири көрситилгән. Новәттики бөлүмини асасән нотилиқ һәм репертуарлиқ дәп ейтишқа болиду. Чүнки униңда равапқа молҗаланған һәртүрлүк мавзу җәһәттин мурәккәп пьесилар, уйғур, қазақ хәлиқ нахшилири, Қазақстан вә чәт әл композиторлириниң әмгәклири орун алған. Шундақла равапни сазлашта диққәт қилидиған муһим қаидиләрму берилгән.

Шуни алаһидә тәкитләш лазимки, мәзкүр китапниң муәллипи, яш сәнъәткар Сабирҗан Манашов өзи паалийәт елип бериватқан П.Чайковский намидики Алмута музыка колледждики уйғур бөлүми тоғрисида тохтилип, мәзкүр бөлүмни техиму риваҗландуруш һәққидә өз пикир-мулаһизилири билән ортақлишиду.

Мәзкүр әмгәк музыка мәктәплири билән алий билим дәргаһлирида билим еливатқанларға  оқуш қурали сүпитидә тәвсийә қилинип, оқутқучи-студентларниң, умумән яш сазәндиләрниң еһтияҗиға толуқ җавап бериду дәп үмүт қилимиз.

http://uyguravazi.kz/?p=11099#more-11099

 
Интересный материал? Поделись с другими:

Добавить комментарий


Защитный код
Обновить