«Уйғур авази» гезити, 2 октябрь 2014 ж.

Шинҗаң сәнъәт юрти сәнъәткарлириниң концерти/ Өткән җүмә вә шәнбә күнлири җәнубий пайтәхтики Җумһурийәт сарийида Алмута шәһәрлик һакимийитиниң қоллап-қувәтлиши билән шәһәрдики йәттә этномәдәнийәт мәркизиниң, җүмлидин Алмута шәһәрлик Уйғур этномәдәнийәт мәркизиниң қурулғининиң 25 жиллиғиға даир Шинҗаң сәнъәт юрти  «Муқам» ансамблиниң  концерт программиси көрситилди.Концерт башлиништин илгири риясәтчи қизлар ушбу мәйрәмгә беғишланған мәйрәмни уюштурушниң тәшәббускари болған Алмута шәһәрлик Уйғур этномәдәнийәт мәркизиниң рәиси Абдуллам Һошуровни, шундақла җумһурийәтлик Уйғур этномәдәнийәт мәркизиниң рәиси Шаһимәрдан Нурумовни вә ШУАРдин кәлгән вәкилләрни сәһнигә тәклип қилди. Абдуллам Абдуқадир оғли нутқини мәзкүр концерт программисиниң уюштурулуш җәрияниға қаратти вә өзигә йеқиндин яр-йөләк болған мәркәзниң башқарма әзалириға һәм тамашибинларға миннәтдарлиғини билдүрди. Шаһимәрдан Үсәйин оғли болса, Қазақстан дияриға қәдәм тәшрип қилған сәнъәткарларни тәбрикләп, өз пикрини төвәндикичә изһар қилди:

—Мәлумки, нахшини яхши көрмәйдиған, сәнъәтни сөймәйдиған, уни ят көридиған бирму уйғур нәслини учратқили болмайду. Хәлқимизниң сәнъити вә сәнъәтхумарлиғи әзәлдинла еғиздин чүшмәй келиватқанлиғиға тарихниң өзи гува. Һә, бу болса, хәлқимиз өтмүшидә сәнъәтниң болғанлиғиниң, бүгүнки таңдиму барлиғиниң вә кәлгүсидиму болидиғанлиғиниң бәлгүсидур. Әнди бүгүнки Шинҗаң сәнъәт юрти сәнъәтчилириниң концерт программиси тамашибин тәшналиғини қандуридиғанлиғиға ишәнчә һасил қилимиз.

Түнүгүн, йәни концертниң дәсләпки күни җумһурийәтлик Уйғур этномәдәнийәт мәркизи намидин Алмута шәһәрлик Уйғур этномәдәнийәт мәркизиниң қурулғининиң 25 жиллиғи мунасивити билән мәркәз рәиси Абдуллам Һошуровқа вә мәзкүр җәмийәтлик тәшкилат йенидики Ханим-қизлар кеңишиниң рәиси Гүлзарәм Илиясоваға һөрмәт көрситип, тон кийгүздуқ.  Бүгүн йәнә бир қетим барчә тамашибинни әйнә шу мәйрәм мунасивити билән Қазақстан дияриға қәдәм тәшрип қилған сәнъәткарлиримизға қәдимиңлар қутлуқ болсун демәкчимән.

ХХҖдин кәлгән вәкилләрму тәбрик сөзлирини изһар қилғандин кейин, концерт «Қәшқәр сәними» уссули билән башланди. Гүлдүрлигән алқишлар астида сәһнигә чиққан уссулчи қиз-жигитләрниң бир-биригә беқишип, йеник һәрикәт қилған һалда орунлиған уссули тамашибинни дәрһал өзигә мәптун қиливалди. Әнди атақлиқ уссулчи Турсунай Иврайимҗан орунлиған нәпис вә әвришим уссуллар тамашибинларға арамбәхш дәмләрни беғишлиди. Циркчи-сехиргәрләр Ғәйрәт Изиз билән Ханқиз Пәрһат тәрипидин намайиш қилинған оюнлар һәмминиң көңлидин чиққанлиғи талашсиз. Улар көпчиликни өзлиригә һәқиқәтәнму мәһлия қилалиди. Уни  биз тамашибинларниң уларни давамлиқ алқишлар билән узитип турғинидин очуқ байқидуқ.

Шуниңдин кейин сәһнә атақлиқ артист вә композитор Махмут Сулайманниң илкигә өтти. У өз иҗадидики «Әркәк», «Яшисамкән бәш йүз жил йәнә» нахшилирини алаһидә тәвринип иҗра қилдики, тамашибинлар, уларниң арисида айрим яшанғанлар билән яшлар орунлиридин турушуп, бәс-бәс билән уссулға чүшти. Нахша ейтиш новити хуш авазлиқ даңлиқ сәнъәткар Иззәт Илиясқа кәлгәндә, у «Яхши тиләк», «Ана юрттин дунияға салам» нахшилирини шундақ маһарәт вә миллий роһта иҗра қилдики, һәммә униңға қайил болушти. Нахшичи бирдә мәйүслинип, бирдә тәвринип, өзиниң бар муң-дәрдини нахша арқилиқ баян қиливатқандәк билинди бизгә. Нахша тамамлиниши билән тамашибинлар иҗрачини чоң һаяҗанлиниш илкидә гүлдүрлигән алқишлар билән қарши елип, гүлдәстиләр тутти.

Ахирида АШУЭМ рәисиниң орунбасари Қәлбинур Аруп вә миллий мәдәнийитимизниң җанкөйәри Тәлъәт Һәмраев сөз елип, мәзкүр концерт программисини уюштурушқа көп күч чиқарған Алмута шәһәрлик этномәдәнийәт мәркизигә вә мәркәзниң барлиқ башқарма әзалириға, хусусән йәттә наһийәлик мәдәнийәт мәркизи билән яшлар, ханим-қизлар кеңәшлириниң әзалириға миннәтдарлиқ билдүрүп, ишлириға утуқ тилиди.

Җәмләп ейтқанда, икки күн давам қилған Шинҗаң сәнъәт юрти сәнъәтчилириниң концерт программиси тамашибин қәлбигә дава болалидиму, йоқму, у тоғрилиқ пикирни тамашибинларниң өз ихтияриға қалдурушни хоп көрдуқ.

Шәмшидин АЮПОВ.

Мәшүр САСИҚОВ чүшәргән сүрәт.

http://uyguravazi.kz/?p=15254