«Уйғур авази» гезити , 4 декабрь 2014 ж.

Хәлқимиз арисидин йетилип чиқип, шәрәплик әмгиги түпәйли нами кәң даиридә тонулушқа башлиған кишиләрниң вапати униң қәдригә йетидиғанлар үчүн еғир җудалиқ болуп сезилидекән. Әйнә шундақ инавәтлик кишиләрниң бири Сүлһи Аблиз оғли Хәйриевниң аримиздин бемәзгил кәтсиму, униң иллиқ симаси көз алдимизда туриду.Сүлһи көп жиллар мабайнида Заря Востока мәһәллисидә жутниң бешини қошуп, жигитбеши вәзиписидә лаяқәтлик хизмәт  қилған һели мәрһум Аблиз ака Хәйриевниң аилисидә 1955-жили дунияға кәлгән. Сүлһи мәктәпни үлгилик тамамлиған оқуғучиларниң бири сүпитидә Алмута шәһиридики Қазақ политехника институтиниң мемарчилиқ бөлүмигә оқушқа чүшиду. Мәзкүр билим  дәргаһини мувәппәқийәтлик тамамлиған яш мутәхәссисниң дәсләпки иш-паалийити «Алматыгипрогор» мәһкимисидә башланған. Аридин көп өтмәй униң кәспий қабилийити вә ишқа болған мәсъулийәтлиги көздә тутулуп, «Алматыгенплан» башқармисиниң баш  мемари лавазимиға тайинлиниду. Шуниңдин бериқи чарәк әсирлик паалийитидә Астана, Алматы, Атырав, Ақтав шәһәрлиридә униң мемарчилиқ лайиһилири бойичә онлиған қурулуш беналири қәд көтириду. Өз ишиниң қир-сирини барғансири мукәммәл өзләштүрүшкә башлиған С.Хәйриев Пүткүлиттипақлиқ вә җумһурийәтлик конкурс көргәзмиләргә қатнишип,  лауреат атилиду. Шуниң билән  биллә у Москва шәһиридә өткән хәлиқара мемарчилар академияси тәрипидин уюштурулған конкурсниң дипломанти аталди. Қазақстан Җумһурийити мемарчилар  бирләшмисиниң әзаси сүпитидә у бирнәччә қетим пәхрий ярлиқларни елишқа муйәссәр болған.

С.Хәйриевниң вапат болуши мунасивити билән «Казахстанская правда» гезитиниң 5-ноябрьдики санида берилгән тәзийәдин униң җумһурийәт миқиясида атақлиқ мемарчи болғанлиғини ипадиләйду.

Сүлһи Хәйриевниң бесип өткән һаят йолини көздин кәчүрсәк, униң көп қирлиқ талант егиси, йәни маһир сәнъәткар — сазәндә болғанлиғини иқрар қилимиз. Балилиғидин дадиси Аблиз акиниң чалған сазлирини зоқмәнлик билән тиңшап жүрүп, өзиму саз челишниң сирлирини мукәммәл үгәнди. Шуниң нәтиҗисидә өсмүрлүк чеғидин башлапла сазәндә болуп йетилгән еди. Болупму у дутарни ишқи-зоқи билән чалғинида тарларда хәлқимизниң нахшилиридики дилраба раванлиқлар әйнән ипадә қилинатти. Шуңлашқиму әву жиллири тарихий вәтинимиздин бу тәвәгә өтүп бираз вақит яшиған тәмбүр шаһи Нурмәһәмәт Турсун Сүлһиниң маһаритигә қайил болуп, униң билән тәмбүр-дутарда биллә саз челип, нахша ейтип жүргәнлигиниң шаһиди болған едуқ. Кейинки вақитларда театримизниң маһир тәмбүрчиси Марат Норузовқа җор болуп, иккиси саз-нәғмә челип жүридиған.

Шәрәплик әмгиги билән арқисида өчмәс из қалдуруп кәткән Сүлһи Хәйриевниң бемәзгил вапати өмүрлүк җүпти Минәввәр, оғли Билалдин, қизи Дилнурниңла мусибити әмәс, уни билидиғанлар үчүн орни толмас җудалиқ болуп қалди.

Савут ИСКӘНДӘРОВ.

Алмута шәһири.

http://uyguravazi.kz/?p=16093#more-16093