«Уйғур Авази» гезити, 16 март 2015 ж.

— Бу конкурсқа тәсадипи қатнишип қалдуқ десәмму болиду, — дәйду Сәһәрдин Қәмбәр оғли https://parvaz.kz/index.php/sakhardin-yusupov. — Мениң билән Тайир ака Баратов хәвәрлишип, «Alma LEND» хәлиқара сәнъәт мәктивидә мошу конкурсқа таллавелиш басқучи өтидиғанлиғи тоғрилиқ ейтти. Бизгә шундақла «Alma LEND» хәлиқара сәнъәт мәктиви мудириниң орунбасари Мәһәмәтҗан Садиров йеқиндин ярдәм бәрди. Таллавелиш конкурсиға пүткүл Қазақстандин йүзгә йеқин бала қатнашти. Бизниң продюсерлиқ мәркәздин болса, Руфат Әмәтов https://parvaz.kz/index.php/rufat-ametov,  Меһруза Қурбанова вә Дияра Еләмова иштрак қилди. Таллавелиш конкурси 27-январь — 20-февраль күнлири арилиғида өтти. Мениң шагиртлирим конкурсниң барлиқ басқучлиридин сүрүнмәй өтүп, Киевқа йолланма алди.

Тәкитләш лазимки, «Евровидениениң музыкилиқ академияси» телевизиялик конкурсиға 6 яштин 16 яшқичә болған балилар қатнишалайду. Уларға йешиға қарап кичик топ (6 — 9 яшқичә), оттура топ (9 — 12 яшқичә) вә чоң топ (12 — 16 яшқичә) болуп үчкә бөлүниду. Дияра билән Меһруза оттура топта, Руфат болса, чоң топта һүнәр көрсәтти.

Украинидики вәзийәтни биз аммивий әхбарат васитилири арқилиқ билимиз. Бу җәһәттин алғанда әһвал қандақ екән?

Әсли бу конкурсқа 49 дөләттин балилар келиши керәк еди. Амма Украинидики әһвалға бола, нурғунлиған дөләтләрдин балилар кәлмиди. Пәқәт Қазақстан, Исраил, Грузиядин балилар қатнашти. Киевта бизни наһайити яхши қарши алди. Шәһәр адәттики течлиқ һаят билән яшаветипту. Биз конкурс өткән үч күн давамида йеңи достларни таптуқ. Украининиң тонулған сәнъәткарлири балилиримизға маһарәт дәрислирини өткүзүп үлгәрди. Конкурсни Украининиң биринчи миллий телеканили чүшәрди. Руфат, Дияра, Меһруза үчилиси қазиларниң алий баһалириға егә болди. Мәлумки, конкурс қаидилири бойичә, дәсләп у телевидениегә чүширилиду. Бу җәриянда балиларниң талантини пәқәт қазилар баһалайду. Шуниңдин кейин униң телевизиялик нусхиси тәйярлиниду һәм у балилар кәлгән дөләтләрниң телеканаллирида намайиш қилиниду. Бу җәриянда болса, телетамашибинлар аваз беришкә башлайду. Мениң билишимчә, конкурсниң телевизиялик нусхиси қазақстанлиқ телеканалларниң биридә 29-марттин башлап көрситишкә башлайду. Демәк, бизни алдимизда йәнә бир синақ күтүватиду. Әнди уйғурлиримиз бизниң балилиримизға аваз берип, қоллап-қувәтләйду дәп ойлаймән. Әлвәттә, бизниң бу конкурсқа қатнишиш үчүн маддий җәһәттин ярдәм қилған шәхсләрни алаһидә тәкитлигүм келиду. Улар Реһимҗан Семәтов рәһбәрлигидики «Достлуқ» мәшрәп әһли, тиҗарәтчиләр Мәхсәтҗан Қаһаров, Маһмутҗан Ғоҗамбәрдиев, Кәнҗә Исаев, Ислам Һәрәмов, Тельман Айтинзаров, Халмурат Мухтәров вә башқиму мәрт-мәрданә жигитләр. Пурсәттин пайдилинип, уларға өз тәшәккүрүмни изһар қилмақчимән. Шуни қошумчә қилмақчимәнки, бизниң продюсерлиқ мәркәз әнди «Европиға ишик ачти» дәп ейтсақму болиду. «Азия плюс records» продюсерлиқ мәркизи яш талантларни тепип, уларниң иҗадий өсүшигә һәрдайим ярдәм берип келиватиду. Буниңдин кейинму шундақ болиду дәп ойлаймән. Биз Киевта өткән конкурстин кейин россиялик даңлиқ композитор вә продюсер Игорь Крутойниң академияси намидин Болғариядә өтидиған конкурсқа йолланма алдуқ. Әгәр шараитимиз яр бәрсә, униңғиму қатнишиш оюмиз бар.

Йолдаш МОЛОТОВ

http://uyguravazi.kazgazeta.kz/?p=17331