Сиз Мурат Насировниң өзигә өзи қол салғанлиғиға ишинәмсиз?

Ниҗат НАСИРОВ, истипадики полковник, Муратниң қериндиши:

—   Инимниң өлүми бизниң аилә үчүн наһайити еғир җудалиқ болди. У талантлиқ жигит еди. Сәнъәттә, худди өзи ойлиғандәк, өсүп келивататти. Худди тил тәккәндәк, у аримиздин көчкән юлтуздәк чапсан кәтти. Мениң униң өз җениға қәстлик қилғанлиғиға задила ишәнгүм кәлмәйду. Униң өлүми кимгиду-биригә керәк болди, дәп ойлаймән. Буниңға бир Алла гува.

Адилҗан ЗӘЙНАВДУН, «Бирлик» җәмийәтлик фондиниң президенти:

—   Муратниң паҗиәлик қаза болғанлиғини аңлиғанда пүткүл уйғур яшлири тәвринип кәтти. Бу йоқитиш һәммимизгә бәк еғир кәлди. У һәқиқий юлтуз еди. Өз миллитини наһайити сөйәтти. Кишиниң жутида жүрүп, талай утуқларни қолға кәлтүрди. Әлвәттә, униң утуқлирини көрәлмәйдиғанларму болди. Мән ойлаймәнки, униң балкондин сәкришигә қандақту-бир күч сәвәп болди.

Полат ҺЕЗИМОВ, композитор, Муратниң йеқин дости:

—   Мән Мурат билән наһайити қоюқ арилаштим. Иккимиз ака-укидәк болуп кәткән едуқ. У маңа өзиниң ич-сирлирини йошурмай ейтатти. Униң өлүмидин икки күн бурун, телефон арқилиқ сөзлишиведуқ. Шу пәйттә кәйпияти наһайити үстүн еди. Иккимиз униң кәлгүси планлири һәққидә мәслиһәтләштуқ. Әтисила униң телевидение арқилиқ бәргән интервьюсини көрдүм. У йәрдиму өзиниң келәчәк иш-реҗилирини ейтип өтти. Бир күндин кейин униң өлүвалғанлиғи һәққидә хәвәр кәлди. Мән униңға мошу кәмгичә ишәнмәймән. Бу қандақту-бир «сирлиқ өлүм».

Райим ҺӘМРАЕВ, «Дәрвишләр» топиниң әзаси:

—   Ахирқи вақитларда Россия шоу-бизнесида Муратниң тосалғулуқларға учриғини раст. У иҗадий боһранни бешидин кәчүрди. Мениң оюмчә, аилисидә йәни әр-аял арисидиму чүшәнмәсликләр болғандәк. «А-студио» топиниң әзаси, Муратниң йеқин дости Бағланниң паҗиәлик өлүми… Мошуларниң һәммиси назук мүҗәзгә егә артистниң бешини қатуруп, у шуниңдин кейин мошундақ йолни таллавалдимекин, дәп  ойлаймән.

Мурат һәқиқий талант егиси. У Қазақстанға қайтип келиши керәк еди. Биздиму униң мухлислири көп. Бу яқта Мурат аллиқачан атақларниму елип болатти. Униң йенида мошу тәрипидин нахшичиға ениқ бир мәслиһәт беридиған бирәр адәм болмидимекин дәп ойлаймән.

Малик, студент:

—        Россияниң шоу-бизнесиға санақлиқ адәмләрла егидарчилиқ қилиду. Талантлиқ нахшичилар һәммиси шуларниң дегинини қилиду. Мениңчә, Мурат уларниң райичә болмиди. Ақивәттә, у өзиниң һаятиға өзи палта чапти.

http://uyguravazi.kz/?p=6236