«Уйғур авази» гезити , 27 ноябрь 2014 ж.

ШУАР сәнъәт чолпанлириниң беши Алмутида қошулди/  Өткән һәптидә, йәни 21-22-ноябрь күнлири Алмутидики Җумһурийәт сарийида җумһурийәтлик Уйғур этномәдәнийәт мәркизиниң тәшәббуси билән атақлиқ сәнъәткар Абдулла Абдуреһимниң йәккә концерти, 23-ноябрь күни болса, Дилбәр Юнус, Абләт Аблеким, Сәнәвәр Турсун, Абдулла Абдуреһим, Турсунай Иврайим вә Мөмүнҗан Аблекимниң қатнишиши билән «Шинҗаң юлтузлири» концертлиқ программиси өтти.21-22-ноябрь күнлири хәлқимизниң сөйүмлүк нахшичиси Абдулла Абдуреһимниң аммибап нахшилирини тәшналиқ билән күткән тамашибинлар Җумһурийәт сарийиға лиқ толди.

Йеқимлиқ нахша садаси астида сәһнигә чиққан сәнъәткарни тамашибинлар гүлдирас чаваклири билән қарши алди. Меһман көпчилик билән иллиқ саламлишип, андин һәркимгә һөзүр беғишлайдиған учришишниң өз вақтида өтүлмәй қалғанлиғи үчүн әпу сориди.

Шундақ қилип, алаһидә миллий түстә безәлгән сәһнидә талантлиқ нахшичи, икки сааттин ошуқ вақит нахша орунлап, өз мухлислириға унтулмас дәқиқиләрни һәдийә қилди. У һәммә нахшилирини җанлиқ аваз билән орунлап, новәттики нахшисиға изаһ-ениқлима берип, өзиниң һәқиқий талантлиқ сәнъәткар екәнлигини испатлиди.

У күни Абдулла Абдуреһим «Тәклимакан», «Вәтинимсән», «Қириқтин өткәндә» вә башқиму меһир-муһәббәт сезимлири, ана жут, вәтән тоғрисидики хәлиқ арисида аммибаплиққа айланған нахшиларни бабиға йәткүзүп иҗра қилди. Әнди «Анам» нахшисини иҗра қилиштин илгири, аниниң һәрбир пәрзәнт һаятидики ролиға һәм анидин айрилиштәк еғир җудалиқ йоқ екәнлигигә тохтилип, бу нахшисини залниң биринчи қатарида олтарған нураний аниларниң алдиға келип, тазим қилған һалда башлиши бәзи тамашибинларни ихтиярсиз көзлиригә яш елишиға мәҗбур қилди. Нахшичиниң «Җан дадам» вә «Йетәлмидим атамға» намлиқ нахшилириму, һечкимни бепәрва қалдурмиғанлиғи шүбһисиз.

Арилиқта нахшичи сәһнигә рәпиқиси — Шиңҗаң сәнъәт өмигиниң артисти Аминә Өмәрни тәклип қилип, униң ушбу концертқа тәйярлиниш җәриянида қошқан төһписини тилға елип, миннәтдарлиқ билдүрди һәм иккиси җор болуп «Сизни дедим» нахшисини иҗра қилди. Концертни уссул чолпини Турсунай Ибраһим техиму җанландурувәтти.

Абдулла Абдуреһимниң концертиниң һәрҗәһәттин утуқлуқ чиқишиға ансамбль сазәндилириниңму қошқан төһписини алаһидә тилға елиш орунлуқ. Сазәндиләрниң иҗра қилиниватқан нахшиға пүткүл вуҗуди билән берилип өз маһаритини намайиш қилиши, әлвәттә, алқишлашқа әрзийду.

Умумән, ушбу концерт сәнъәт мухлислири қәлбидә алаһидә тәсират қалдуруп, уларниң бирдәм болсиму турмуш-тирикчиликниң ғәм-қайғусини унтуп, йеқимлиқ нахша-сазлардин һөзүр-һалавәт алди.

***

23-ноябрь күни Алмутидики Җумһурийәт сарийида “Шинҗаң юлтузлири” намлиқ концерт өтти.

Дәсләп сәһнигә чиққан риясәтчи қизлар Ханқиз Пәрһат вә Луиза Розахунова тамашибинларни ушбу сәнъәт мәйрими билән тәбрикләп, концертниң башланғанлиғини елан қилди. Гүлдүрлигән алқишлар садаси астида сәһнигә чиққан Мөмүнҗан Аблеким «Уйғур дегән мошундақ» нахшиси билән шу күни жиғилған сәнъәтхумар тамашибинниң роһини, кәйпиятини бирдинла көтиривәтти. Мөмүнҗан шундақла өзиниң хәлиқ сөйүп тиңшайдиған «Қәйәрдисән, әзизим», «Интизармән», «Тағ мәшриви» нахшилирини орунлап бәрди. Новәттә сәһнигә көтирилгән цирк артисти Ханқиз Пәрһат өзиниң сехирлиқ уссули билән билән көпчиликни қайил қилди. Әнди өзиниң «Салам, хәлқим» нахшисини орунлиған Сәнәвәр Турсунни тамашибин гүлдирас чаваклар билән күтүвалди. У өзиниң «Қуй пиялигә чайни», «Һәйран болма», «Есиллирим — ата-анам» нахшилирини дутар билән орунлап бәрди. Шуниңдин кейин сәһнигә талантлиқ нахшичи вә композитор Абләт Аблеким көтирилди. У өзиниң дәсләпки қетим Қазақстанға кәлгәнлигини ейтип, өзлирини иллиқ чирай күтүвалған қандашлириға тәшәккүр изһар қилди. Абләт Аблеким «Сөйгү улуқ», «Сама», «Мән долан» нахшилирини иҗра қилди. Новәт билән сәһнигә чиққан Нургөзәл Турғун рәһбәрлигидики уссулчи қизлар «Үзүмзарлиқ», Маһирә Әмәт қазақ хәлқиниң «Аққу» уссулини жуқури маһарәт билән орунлиди. Даңлиқ уссулчи Турсунай Иврайим болса, өзиниң «Алтунҗан» уссули билән тамашибинни мәһлия қилди. Әнди икки күн давамида өзиниң йәккә концерти билән тамашибин көңлини алған Абдулла Абдуреһимни бу күниму хәлиқ қизғин күтүвалди. Абдулла Абдуреһим өзиниң «Мәҗнунтал», «Сеғинармән», «Йетәлмидим атамға» охшаш аммибап нахшилирини орунлап бәрди. Новәттә сәһнигә мошу концертқа қатнишиш үчүн мәхсус Европидин кәлгән, дунияға тонулған опера нахшичиси Дилбәр Юнус чиқти. У уйғур классик нахшилиридин «Таримни», рус нахшилиридин «Соловейни» жуқури маһарәт билән орунлап, тамашибинларниң алқишиға бөләнди. Концертта шундақла  Дилназ Әхмәдиева өзиниң икки нахшисини орунлап бәрди.

Концерт ахирида сәһнигә көтирилгән җумһурийәтлик Уйғур этномәдәнийәт мәркизиниң рәиси Шаһимәрдан Нурумов ана-Вәтинимизниң салимини елип кәлгән сәнъәткарларға көпчилик намидин тәшәккүр изһар қилди.

— Бүгүн биз өзимиз сәзмәй туруп тарихий вақиәләрниң шаһиди болуватимиз, — деди Шаһимәрдан Үсәйин оғли. — Һазир пүткүл қазақстанлиқлар  Президентимиз Нурсултан Назарбаевниң Қазақстан хәлқигә йоллиған Мәктүбини әмәлгә ашуруш йолида қизғин һәрикәт қиливатиду. Мана бизниң бүгүнки меһманлиримизму биз үчүн әһмийәтлик бу һөҗҗәтниң әһмийитини тәкитләватиду. Һәммимизгә мәлумки, 2015-жил елимиздә Ассамблея жили дәп елан қилинди. Бу концертни шу сәнәгә беғишланған чарә-тәдбирләрниң дәсләпкиси дәп аташқиму болиду. Бүгүн достлуқ макани һесапланған Қазақстан йеридә Шинҗаң юлтузлири бирликтә һүнәр көрситип, һәммимизни қайил қилди. Мошундақ мәйрәмни һәммимизгә һәдийә қилған ҖУЭМ рәисиниң биринчи орунбасари Сәдирдин Әһәтовқа вә башқа уюштурғучиларға силәрниң намиңлардин рәхмәт ейтишқа рухсәт қилиңлар. Мән ойлаймәнки, мошундақ милләтпәрвәр оғланлиримиз сани қанчә көп болса, бизниң бирлигимиз, достлуғимиз шунчә мәккәм болиду.

Йолдаш МОЛОТОВ, Мәшүр САСИҚОВ.

Алмута шәһири.

http://uyguravazi.kz/?p=16028