«Уйғур авази» гезити , 4 декабрь 2014 ж.

Спорт уссули/ Спорт уссули билән шуғуллинип, чоң-кичик байқашларда көзгә көрүнүп келиватқан өсмүрләр Сухраб Розахунов билән Дина Байсеит һәққидә биз буниңдин бираз вақит илгири язған едуқ. Йеқинда бу икки җүп дәсләп Астана шәһиридики «Мустәқиллик сарийида» спорт уссули бойичә җумһурийәтлик, андин 29-30-ноябрь күнлири җәнубий пайтәхттә Оттура Азия дөләтлири вә Қазақстанниң бирқатар вилайәтлиридин миңдин ошуқ җүпләр қатнашқан «Күз вальси – 2014» хәлиқара турнирида алаһидә маһарәт көрситип, һәр иккилисидә мукапатлиқ ІІ орунға муйәссәр болди.Қазақстан Җумһурийитиниң Мәдәнийәт вә спорт министрлиги, Алмута шәһәрлик Тәнтәрбийә вә спорт башқармиси һәм «Magіc Dance» спорт-уссул студиясиниң  қоллап-қувәтлиши вә уюштурушида Алмутидики «Достық» аммибап спорт комлексида өткүзүлгән хәлиқара турнир қатнашқучилириға қоюлидиған тәләпләрниң көп болушиға қаримай, биз гәп қиливатқан яш җүп өзлири билән бир яшлиқ 37 җүпниң арисида муваппәқийәт қазанди. Өзара ака-сиңилдәк болуп кәткән Сухраб билән Дина иккисиниң бу қетимқи ғалибийити уларниң ата-анилири һәм мәшиқләндүргүчилириниму хошаллиққа бөлиди.

Мошу йәрдә, худди беғидики гүлләрни пәрвиш қилғандәк, бу җүпни тәрбийиләватқан мәшиқләндүргүчиләр — ака-ука Сергей вә Алексей Бубнов һәм Тимур Намазбаевниң әмгигини алаһидә тилға алмай мүмкин әмәс.

— Қилған еқидимизни йәрдә қоймай, үмүтлиримизни ақлап келиватқан шагиртларға пәқәт апирин дәймиз, — дәйду улар. — Биз һәқлиқ рәвиштә Сухраб билән Динадин пәхирлинимиз. Шагиртлиримиздики спортқа болған җошқун иштияқ уларни буниңдинму егиз чоққиларға йетәкләйдиғанлиғиға ишинимиз.

Бари-йоқи 11 яшлиқ икки өсмүргә устазлириниң бәргән мошундақ иҗабий баһаси һәрқандақ қиммәт баһалиқ соғидинму әвзәл болса керәк.

Мәлумки, бүгүнкидәк һәммә нәрсә ихтисат мәсилисигә мунасивәтлик болған заманда, спорт дуниясиға интилған Сухраб Розахунов билән Дина Байсеитқа қолидин келишичә ярдәм қолини сунуватқан сахавәтлик инсанларму бар екән. Спортчиларниң ата-анилири пәрзәнтлириниң қизиқишиға һәм келәчигигә бепәрва қаримиған Сәнәм Беширова, Бурһандин Таҗидинов вә башқиларниң исимлирини мәмнунийәт илкидә тилға елип, уларға алаһидә миннәтдарлиқ билдүриду. Әлвәттә, талантлиқ яш әвлатларниң өсүп-йетилишигә бир кишилик һәссисини қошушни инсаний борчи һесаплиған адәмләрниң барлиғи һәркимни хошал қилса керәк.

Өз новитидә, бизму спорт уссули бойичә утуқ-муваппәқийәтләр босуғисини атлиған өсмүрләргә келәчәктә униң төридин орун елишиға тиләкдашлиқ билдүримиз.

Мәшүр САСИҚОВ

. http://uyguravazi.kz/?p=16096#more-16096