«Уйғур Авази» гезити, 16 март 2015 ж.

Алмутиға шуарлиқ эстрада юлтузи Мөмүнҗан Аблеким кәлди. Бу қетим у алмутилиқ уйғурларниң мәлум қисми той-төкүнлирини өткүзүп жүргән «Җанан» кафесида үч күн давамида нахша ейтип, ханим-қизларни баһар мәйрими билән тәбриклиди.Мөмүнҗан Аблеким билән болған кәчни риясәтчиләр Шатлиқ Худайқулов билән Батур Ғаппаров ечип, ханим-қизларни мәйрими билән тәбриклиди. Риясәтчиләр дәстихан әтрапида олтарғанларни һәзил-чақчаққа ғәриқ қилғандин кейин новәт шуарлиқ меһманға берилди.

— Бу яққа келиштин авал «Мөмүнҗанниң кафеда нахша ейтқини немиси?» дегән параңни аңлап, сәл кәйпиятимниң чүшүп кәткини раст, — дәп сөзини башлиди Мөмүнҗан. — Бу адәттики елип-қачти гәп болсиму уни көңлүңгә алмай мүмкин әмәс екән. Амма мухлислирим жиғилған һәрқандақ җай, мәйли у кафе яки ресторан болсун мениң үчүн улуқ. Мениң иҗадимға бенаниң чоң-кичиклиги тосалғулуқ қилмайду. Аниларниң мәйрими нишанлиниватқан бу сорундин баш тартишқа һоқуқум йоқ. Барлиқ ханим-қизларни баһар мәйрими билән тәбрикләймән.

Мөмүнҗанниң «Уйғур дегән мошундақ» намлиқ нахшиси яңриғанда, залда олтарған ханим-қизларниң һәммиси уссулға чүшти.

Нахшичи билән «уссулчилар» сәл өпкисини басқандин кейин, мәзкүр концертни уюштурушта көп күч чиқарған «Қайрат» мәһәллисиниң жут активистлири Талғир наһийәлик мәслиһәтниң депутати Тиләк Йүсүпов, җумһурийәтлик Уйғур этномәдәнийәт мәркизиниң йенидики Анилар кеңишиниң рәиси Гүлҗаһан Муратова, «Қайрат» мәһәллисиниң жигитбеши Мәрүпҗан Ахунов, Һашимҗан Арзиев, «Җанан» кафесиниң мудири Шерияз Худайқулов атақлиқ нахшичиға «Қайрат» жутиниң турғунлири намидин бир ат миндүрүп, йәнә башқиму хатирә соғиларни тапшурди. Андин новәт йәнә Мөмүнҗанниң орунлишидики йеқимлиқ нахшиларға берилди. Меһманлар пуғани қанғичә уссул ойнашти.

Кәчниң хуласә сөзини алған Шатлиқ Худайқулов аниларға беғишланған мәйрәмлик дәстиханни уюштурушта йеқиндин яр-йөләк болған «Қайрат» мәһәллисигә, шундақла ака-ука Муңлуқ вә Алик Җәлиловқа, тиҗарәтчиләр Билал Һошуров билән Жуманазар Селехановқа өзлириниң миннәтдарлиғини изһар қилди.

Бәхтишат СОПИЕВ.

http://uyguravazi.kazgazeta.kz/?p=17348#more-17348