«Уйғур Авази» гезити, 16 март 2015 ж.

Бизму бала болған/ Шаирә, алимә Патигүл Мәхсәтованиң https://parvaz.kz/index.php/pmahsatova мәктәптики әң сөйүмлүк пәни математика болған екән. Шуниңға қаримай, у һаятида биринчи қетим өзиниң әң яхши көридиған дәрисидин қечип кетиду. Буниң үчүн мудирниң тәрбийә ишлири бойичә орунбасари униңға қандақ чарә қолланди?Патигүл Мәхсәтова башланғуч синипни Уйғур наһийәсиниң Узунтам йезисида оқуйду. Андин оқушини Чонҗа йезисидики уйғур оттура мәктивидә давам қилиду. Униң балилиғидики әң қизиқ вақиәләр бәшинчи синиптин башланған еди.

«Мәктәпкә вилайәттин комиссия келидекән» дегән хәвәр адәттикидәк устазларни һәләйкүмгә салди. Шу вақитта химия пәниниң муәллими: «Комиссия пәқәт устазларниң билимини тәкшүргили кәлсә керәк, улар дәрисимизгә қатнашқанда, силәр теч олтирип бәрсәңларла болди» дәп әскәртиду. Дәрис башлинип, химия пәниниң муәллими өз ишиға киришиду. Бир арилиқта оқуғучи Мәхсәтова «теч олтиралмай» муәллиминиң хатасини тепивалиду. Комиссияғу оқуғучиниң билимигә рази болди. Амма устазиниң рәнҗигини бар.

— Әң қизиқ вақиәләрниң бири 9-синипта оқуватқанда йүз бәрди, дәп әсләйду шаирә. — Мән барлиқ пәнләрни «әла» дегән баһаға оқудум. Амма уларниң арисида математика дәрисигә алаһидә қизиқаттим. У мениң әң яхши көридиған пәнлиримниң бири еди. Бир күни, немишкиду, ядимда йоқ, мәзкүр пәнниң устази авушти. Мән әву устазға үгинип қалғачқиму, йеңи устазниң дәрисигә қатнишиштин баш тарттим. Униңға қаршилиғимни көрситиш нийитидә дәристин қечип кәтмәкчи болдум. Өзәм билән синипимиздики йәнә бир әлачи қизни еливалдим. Синипдашлиримизға: «Бизни паспорт алғили кәтти» дәп ейтиңлар дедуқтә, у дәрискә кирмидуқ. Қизиқ йери, әйнә шу математика пәниниң деризиси чоң кочиға қаратти. Иккимиз уни ерәңму қилмай, «бизни көрдүңму?» дегәндәк, шу кочидин өтүптимиз. Муәллим бизни деризидин көрүп қелип, дәрһал мудирға шикайәт қипту. Шу күнила бизниң мәсилимиз қаралди. Мудирниң тәрбийә ишлири бойичә орунбасари йенимдики достумниң кичик дадиси еди. У бизниң «паспорт алғили кәттуқ» дегинимизни аңлап, техиму терикип кәтти. Җийәнигә: әву күни өйүңларда паспортиңизни көргән едимғу, йәнә немә паспорт?» деди у. Биз қизарғинимиздин бешимизни көтирәлмәй қалдуқ. «Әлачи оқуғучилар буни қилса, қалғанлиридин немә күтүшкә болиду?», деди у өзини туталмай.

9- синиптин кейин Патигүл Мәхсәтовада поэзиягә дегән қизиқиш пәйда болиду. Униң дәсләпки шеири «Бәхит юлтузи» дәп атилип, у бәлгүлүк сәвәпләргә бола мәтбуатта елан қилинмиди. Кейин униң «Өчмисун» намлиқ шеири «Коммунизм туғи» (һазирқи «Уйғур авази») гезитида йоруқ көрди. Мана шуниңдин кейин униң иҗадийити өчмәй келиватиду.

Бәхтишат СОПИЕВ.

http://uyguravazi.kazgazeta.kz/?p=17318#more-17318