| Театр сәнъити — хәлиқниң | |
|
|
«Уйғур авази» гезити, 14 май 2015 жил
Сәнъәткарлиримиз өз маһаритини Алмутидики тамашибинларғила әмәс, наһийәләрдики қериндашлиримизғиму намайиш қилиш мәхситидә 13 — 27-май арилиғида театримизниң Панфилов (13 — 17-май), Уйғур (18 — 22-май), Челәк (23 — 27-май) тәвәсидики күнлири өтмәкчи.Өткән жили күздә И.Саттаров вә В.Дьяковниң «Ғерип — Сәнәм» драмиси билән сәһнә пәрдисини 81-қетим ачқан Қ.Ғоҗамияров намидики жумһурийәтлик дөләт Уйғур музыкилиқ комедия театриниң иҗадий коллективи новәттики мәвсүмини утуқлуқ йәкүнлиди. Бу мәвсүм хәлқимиз тарихиниң жилнамисиға әһмийити зор болған чоң сәнә — сәнъитимизниң алтун бөшүги һесаплинидиған Уйғур театриниң 80 жиллиқ тойиниң дағдуғилиқ нишанланғанлиғи билән йезилди. 81-мәвсүмдә тамашибинлиримиз абонемент системиси асасида он бир йөнилиш бойичә һәптиниң төрт күнидә репертуаримиздики 13 спектакльни, «Күлкә кечилиги» вә «Муқамлар сири» театрлаштурулған программини, абонементтин сирт театрниң өз кирими һесавиға қоюлған «Йеңижиллиқ гүлхан» вә «Ана билән һаят гөзәл» мәйрәмлик программилирини көрүшкә муйәссәр болди. Мәвсүм давамида тамашибин залиниң 60 — 80 пайизға толғанлиғи, сәнъәтсөйәр хәлқимизниң, мәдәнийәт мәркәзлириниң, жигитбашлириниң, ханим-қизлар кеңәшлириниң, уйғур тилида билим беридиған мәктәпләр мәмурийәтлириниң театримизға җанкөйдүрүп, йеқиндин ярдәм бәргәнлиги нәтиҗисидә әмәлгә ашти. Пурсәттин пайдилинип, уларға вә барлиқ тамашибинлиримизға чәксиз миннәтдарлиғимизни билдүримиз. Һәр мәвсүмдә тамашибинлиримизниң театр репертуаридин йеңилиқларни күтидиғанлиғини билгәчкә, бу қетимму уларниң тиләк-истәклирини һесапқа алған һалда, репертуаримизда миллий драматургия вә қазақ, өзбәк хәлқигә һәм җаһан драматургиясигә мәнсүп һәрхил жанрдики әң яхши қоюлумлар көрситилди. Бу мәвсүмдә тамашибинлар диққитигә З.Қадирийниң «Ғунчәм» музыкилиқ драмисиниң, Б.Муқайниң «Мәҗнун жигитләр» комедиясиниң, «Муқамлар сири» театрлаштурулған программисиниң премьерилири һавалә қилинди. Сәһнимиздә «Ғунчәм» музыкилиқ драмисини көрүшни узақ жиллардин бери арман қилған тамашибинларниң хаһиши бу жили орунлинип, уларни хошаллиққа бөлисә, муқамлиримизниң бебаһа қиммити арқилиқ келәчәк әвлатниң мәнавият дуниясини бейитишни мәхсәт қилған «Муқамлар сири» театрлаштурулған программиси театримиз үчүнла әмәс, тамашибинлиримиз үчүнму чоң йеңилиқ болди. Хәлқимизниң муң-зарини ипадиләп, әсирләр садасини яңратқан «Он икки муқамдәк» әҗайип музыка байлиғиниң бүгүнгичә сақлинип келиватқанлиғида «Нава» ансамблиниң роли наһайити чоң. Миллийлик һиди билән өзигә мәһлия қиливалидиған мәзкүр ансамбль бу мәвсүмдә «Рухсарә» уссулчилар топи вә драма артистлири билән бирликтә «Муқамлар сири» театрлаштурулған программисини 11 қетим көрситип, жуқури маһарити арқилиқ һәр қетимда тамашибинлиримизға һөзүрлүк беғишлап, алқишиға бөләнди. «Муқамлар сириниң» театримиз репертуариға қошулған зор төһпә екәнлиги тоғрисида гезит бетидә сәмимий пикирләр йезилди. 82-мәвсүмдә тамашибинлиримиз М.Кәримниң «Ай тутулған түн», А.Чеховниң «Алчилиқ бағ» охшаш классик әсәрлириниң премьерилирини тамашә қилалайду. Ә.Әхмәтовниң «Махмут Қәшқәрий» драмиси, А.Мәсимовниң балиларға беғишланған «Өмүр ширниси» чөчиги сәһниләштүрүлмәкчи. Сәнъәткарлиримиз өз маһаритини Алмутидики тамашибинларғила әмәс, наһийәләрдики қериндашлиримизғиму намайиш қилиш мәхситидә 13 — 27-май арилиғида театримизниң Панфилов (13 — 17-май), Уйғур (18 — 22-май) наһийәлиридики вә Челәк (23 — 27-май) тәвәсидики күнлири өтмәкчи. Бу гастрольлуқ сәпәргә театр «Идиқут» тарихий драмиси, «Аршин мал алан», «Мирас мончақ», «Мәҗнун жигитләр» комедиялири вә чоң концертлиқ программа билән атлинишқа тәйярлиқ көрмәктә. Концертлиқ программида тамашибинлиримизниң көңүл кәйпиятини көтиридиған қизиқ миниатюрилар болидиғанлиғини йәткүзгимиз келиду. Театримизниң мәзкүр наһийәләргә болған гастрольлуқ сәпирини Д.Мәшүрованиң «Ана мираси» вә йәнә бир спектакль билән давамлаштуруш көздә тутулмақта. Шундақла ШУАРлиқ кәсипдашлиримизниң мәхсус тәкливи билән тәҗрибә алмаштуруш мәхситидә әҗдатлар маканиға гастрольлуқ сәпәргә атлинишму планда бар. Тамашибинлиримизниң 82-мәвсүмдиму сәнъитимизни, театримизни қоллап-қувәтләйдиғанлиғиға, абонементлиримизни тарқитишқа һәртәрәплимә ярдәмлишидиғанлиғиға чоқум ишинимән. Чүнки театр сәнъити — хәлиқниң. Савутҗан СОНУРОВ, Қ.Ғоҗамияров намидики җумһурийәтлик дөләт Уйғур музыкилиқ комедия театриниң мудири. |
