«Уйғур авази» гезити, 25 июнь 2015 ж.

Мукапат мубарәк/ Кино сәнъитидә иҗат қиливатқан уйғур яшлири аз болсиму, уларниң қолға кәлтүрүватқан утуқлири аз әмәс. Йеқинда Испаниядә өткән «Kіds Festіval» қисқаметражлиқ фильмлар фестивальда алмутилиқ яш режиссер Бәхтияр Исламовниң «Иккинчи муһәббәт» фильми Гран-приға еришти.— Юридик вә ихтисадий билим алған болсамму, иҗадийәткә болған иштияқим ахири ғалип чиқти, — дәйду Бәхтияр. — Рус тилида язған бир түркүм шеирлирим мәтбуаттиму елан қилинди. Кейинирәк киноға болған қизиқишим пәйда болди. Шуңлашқа Жүргенов намидики Миллий сәнъәт академиясидә алий режиссерлуқ курсларда, Россияниң хизмәт көрсәткән сәнъәт әрбаби Ираклий Квирикадзениң ишханисида билим алдим. Мана шуниңдин кейин киноға бирәтола кириштим.

Бәхтияр өзиниң дәсләпки қисқаметражлиқ «Иккинчи муһәббәт» фильмини өткән жили декабрьда чүширип болди. Униң тәкитлишичә, фильмға чүшкәнләрниң арисида пәқәт Алмутидики М.Лермонтов театриниң артисти Ольга Ландинала кәспий актер. Қалғанлири ишқивазлар екән. Фильмда баш рольни иҗра қилған Артем Козиев. Шундақла Гүлвәрхан Махмутова, Александра Столбушкина, Билал Нәзәров, Мәмирҗан Қурбанов өзлириниң рольлирини  утуқлуқ ойнап чиққан.

— Бу фильм дәсләпки балилиқ муһәббәт һәққидә, — дәйду Бәхтияр Исламов. — Баш  қәһриман бу назук сезимни пүткүл һаяти давамида сақлап қалиду. Фильм мәлум дәриҗидә өзәмниң тәрҗимиһалим дәп ейтсамму болиду. Фильмда балилиқ дәвримдә ядимда қалған образларни, вақиәләрни әкис әткүзүшкә тириштим. Шундақла мәзкүр фильм қайтип кәлмәйдиған дәвир һәққидә әслимә. Фильмни бериш шәклини поэзиялик киноимпрессионизм дәп аташқа болиду. Кинони чәт әлләрдә утуққа йетишиға мошу сәвәп болдимекин, дәп ойлаймән.

«Иккинчи муһәббәт» фильминиң продюсери Дарья Корнееваниң тәкитлишичә, бу фильм Бәхтияр Исламовниң өз мәблиғи һесавиға чүширилипту. Испаниядики утуқтин кейин «Иккинчи муһәббәт» фильми АҚШниң Флорида штатида өтидиған «Startfest» вә Канзастики «Sunback Fіlm Festіval» фестивалиға һәм Сингапурда өтидиған «Vіddsee Shortee Award» вә Һиндстанда болидиған «Dehlі Internatіonal Fіlm Fectіval» қисқаметражлиқ фильмлар фестивалиға йолланма алди. Йеқинда болса, «Америкиниң «Novella Showcase TV» телеканилида намайиш қилинди. Һазир Бәхтияр иккинчи фильмни чүширишкә башлиди.

Йолдаш МОЛОТОВ.

http://uyguravazi.kazgazeta.kz/?p=19101#more-19101