«Уйғур Авази» гезити, 4 июнь 2015 ж.

Дунияда журналист әң хәтәрлик кәсипләрниң бири болуп һесаплиниду. Биз бу җәһәттин хаңчилардин кейин иккинчи орунда туридекәнмиз. Әнди уйғур мәтбуати ундақ «хәтәрдин» жирақ. Амма айрим гезитханлиримизниң «аһанитидин» баш көтирәлмәй қеливатқинимизму бар. Униңсиз мүмкин әмәс. Амма жилиға бир қетим бизниңму аһанәт әмәс, иллиқ тиләкләрни аңлайдиған  күнимиз бар. У бизниң кәспий мәйримимиз, йәни Алақә вә әхбарат хадимлири күни. Бизниң кәспий мәйримимиз һәр жили июнь ейиниң ахирқи йәкшәнбисидә нишанлиниду. Адәттә, мәйрәм һәптиниң бешида жирақ-йеқиндин кәлгән тәбрикләрдин башлиниду. Бийилму шундақ болди. Телефон арқилиқ тәбриклигәнләрниң арисида Қазақстан Җумһурийити Парламенти Мәҗлисиниң депутати Мурат Әхмәдиев, Қазақстанниң хизмәт көрсәткән әрбаби, тонулған коллекционер Азат Һекимбәк, Қазақстан тиҗарәтчиләр форуминиң иҗраий мудири Мунәввәр Палташева, Алмута шәһәрлик тиҗарәтчиләр ассоциациясиниң иҗраий мудири Санийәм  Палтушева, Қазақстан хәлқи Ассамблеяси Астана шәһәрлик кативатиниң кативи Мурат Тохтибақиев, тонулған врач, медицина пәнлириниң доктори Әбәйдуллам Җаппаров, «Дәрвишләр» топиниң рәһбири, Қазақстан композиторлар иттипақиниң әзаси Дилмурат Баһаров вә башқилар бар.

Тәркивидә бирнәччә нәшир бар «Қазақ газеттері» ҖЧЙ болса, мәйрәмни сешәнбә күни башлап, өзлириниң әнъәнивий мукапатлирини тапшурди. «Қазақ газеттерінің» баш мукапити — «Алтун қәләм» бу қетим бизгә, йәни гезитимизниң Маарип бөлүминиң башлиғи Шәмшидин Аюповқа (сүрәттә) берилди.

Шундақла баш муһәррирниң орунбасари Мухтәрҗан Җумаров Қазақ газеттері ҖЧЙниң Тәшшәкүрнамиси билән тәғдирләнди.

Җүмә күни тәһриратимизға гезитимизниң бир топ достлири өзлириниң соғилирини көтирип йетип кәпту. Улар — «Уйғур мәктивини қоллап-қувәтләш» фондиниң иҗраий мудири Музәппәр Зайитов, Бесағаш жутиниң турғунлиридин язғучи Абдухалиқ Махмутов, мәзкүр мәһәллиниң баш жигитбеши Әхмәтҗан  Ахмоллаев вә униң орунбасари Октябрь Қурбанниязов, Талғир наһийәлик Уйғур этномәдәнийәт мәркизиниң Бесағаш йезисидики шөбисиниң рәиси Азат Аблизов вә «Ғалҗат» җәмийәтлик фонди рәисиниң орунбасари Абдувәли Имиров. Улар бир топ гезит хадимлириға өзлири атиған соғиларни тапшуруп, иллиқ ләвзини билдүрди.  Әнди шаир Әхмәт Һәсән, җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Абдурешит Мәхсүтов, көрнәклик алим  Бәһрим Ғлавдинов рәһбәрлигидики мәшрәп әһли, тиҗарәтчи Рабидин Розахунов соға селинған «мәйрәмлик конвертлирини» әвәтипту.

Йәкшәнбә күни болса, «Уйғур авази» гезитиниң достлири» клубиниң рәиси Клара Шардинова гезит коллективи билән биртоп ветеранларни «Шарис» рестораниға тәклип қилди. Мәтбуат күнигә беғишланған мәрасимни җумһурийәтлик Уйғур этномәдәнийәт мәркизиниң рәиси Шаһимәрдан Нурумов ечип, журналистларни мәйрими билән тәбриклиди. Өз новитидә у «Уйғур авазиниң» баш муһәррири Ершат Әсмәтовқа чапан кийдүрди. Шундақла у гезит ветеранлириға ҖУЭМниң Пәхрий ярлиқлирини тапшурди.

Новәттики натиқ — «Қазақ газеттері» ҖЧЙниң мудири – Муһәррирләр кеңишиниң рәиси  Жумабек Кенжалин кәсипдашларға өзлириниң иллиқ ләвзини изһар қилип, гезитниң баш муһәррири Ершат Әсмәтов (жуқарқи сүрәттә) билән бөлүм башлиғи Бәхтишат Сопиевқа (төвәнки сүрәт) мәтбуат саһасидики көп жиллиқ мевилик әмгигиниң баһаси сүпитидә Қазақстан Җумһурийити Инвестицияләр вә тәрәққият министрлигиниң «Ақпарат саласының үздігі» бәлгүсини тапшурди.

Шуниңдин кейин сөз новитини алған Клара Турсун қизи гезитниң бүгүнки хадимлири билән ветеранлирини мәйрими билән тәбрикләп, һәрбиригә һәр жилқи әнъәнә бойичә «конверт» соға қилди. Гезитимизниң йеқин достлириниң бири, Алмута шәһәрлик мәслиһәтниң депутати Әхмәтҗан Шардинов рәпиқисиниң тилигигә қошулуп, келәр жили Шардиновлар аилиси намидин журналистлар күнигә 1000 АҚШ доллири миқдарида мәхсус мукапат тәсис қилидиған болди. Униң бу тәшәббуси меһманлар арисида қоллап-қувәтләшкә егә болуп, «Нур Отан» партиясиниң Алмута шәһәрлик сәясий бюросиниң әзаси Асимҗан Злавдинов өз мәшриви намидин пешқәдәм журналист Абдукерим Тудияровқа  соғисини тапшурди. Ейтмақчи, у күни көп жиллар гезитимизниң Панфилов наһийәси бойичә өз мухбири болған вә мошу күнләрдиму журналистикидин қол үзмәй келиватқан Абдукерим Тудияров «Бейбітшілік әлемі» хәлиқара тәшкилатиниң «Ер ардақтысы» медали билән мукапатланди. Әнди гезитимизниң Уйғур наһийәси бойичә өз мухбири Махмут Исрапилов болса, Қазақстан Журналистлар иттипақиниң әзаси, көрнәклик журналист, мәрһум Қасим Мәхсүтов намидин мукапатқа  (диплом вә 40 миң тәңгә) муйәссәр болди. Мошу йәрдә мәзкүр мукапатниң тәсисчиси, тиҗарәтчи Асимҗан Мәхсүтовқа алаһидә миннәтдарлиқ билдүрүшкә әрзийду. Нәқ мошундақ мукапатқа гезитимизни узун жиллар башқуруп кәлгән пешқәдәм журналист Тудахун Нәзәровниң аилиси намидики мукапатқа (диплом вә 40 миң тәңгә)гезитимизниң Панфилов наһийәси бойичә өз мухбири Нурәхмәт Әхмәтов сазавәр болди. Илгири гезитимизниң Әмгәкчиқазақ наһийәси бойичә өз мухбири болуп ишлигән Мәһәмәтҗан Һапизовму қуруқ қол қайтмиди. У редакцияниң мәхсус соғисиға еришти.

У күни кәспий мәйрәмни нишанлашқа жиғилған қәләм егилириниң һәммиси олҗилиқ қайтти. Һәтта гезитимизға йеқиндин арилишип келиватқан талантлиқ яшлар Азнат Талипов билән Фируза Нәвирдиноваму диққәттин сирт қалмиди. Уларға «Уйғур авазиниң» штаттин ташқири мухбири» дегән гуванамә тапшурулуп, гезитимизниң дости, ҖУЭМ йенидики Нураний анилар кеңишиниң рәиси Гүлҗаһан Муратова яшларни маддий җәһәттин рәғбәтләндүрди. У яқму бу әнъәнини һәр жили давам қилишқа вәдә бәрди.

Әлвәттә, соғиниң кичик-чоңи болмайду. Шундиму бу қетим гезитимизға әң қиммәт соғини йеқин достларниң бири, мәтбәәчи Гүлҗаһан Йүсүпова (сүрәттә) тәғдим қилғанлиғини ейтип өтмисәк болмайду. У бизгә кәспий фотоаппарат (баһаси — 400 миң тәңгә) соға қилди.

Шундақ қилип, «Уйғур авазиниң» хадимлири билән гезитимиз ветеранлириниң һәммиси соғиларға еришип, «мукапатлар ямғуриниң» астида қалди. Буниң үчүн гезитимизға чәксиз муһәббәт бағлиған милләтпәрвәр инсанларға чәксиз миннәтдарлиқ билдүримиз.

Журналистлар мәйримигә беғишланған зияпәткә саламәтлигигә бола келәлмәй қалған, һаятиниң чарәк әсирини мәтбуат саһасиға беғишлиған, җәмийәтлик ишларниң паал иштракчиси Тохтасун Бейшановни (сүрәттә) өйигә йоқлап берип, униңға гезитимизниң Пәхрий ярлиғи билән «Уйғур авазиниң» достлири клубиниң» ахчилиқ мукапитини тапшурдуқ.

Журналистлар күниниң ахири «Уйғур авазиниң» достлири клубиниң» йеңи рәисини сайлаш әнъәниси билән йәкүнләнди. Йәни клуб рәислигигә гезитимизниң җанкөйәри, мәтбәәчи Гүлҗаһан Йүсүпова, униң орунбасарлиғиға ҖУЭМ йенидики Нураний анилар кеңишиниң рәиси Гүлҗаһан Муратова сайланди.

Хурсән боларлиқ йери, бу қетимқи кәспий мәйримимиздә «Уйғур авазиниң» коллективи мәнивий мукапатлардин ташқири, һамийлар тәрипидин җәми 1 миллион 200 миң тәңгә миқдарида ианигә егә болди.

http://uyguravazi.kazgazeta.kz/?p=19212#more-19212