«Бизниң Гүлвира».

«Уйғур Авази» гезити, 4 июнь 2015 ж.

Атақлиқ нахшичи Алмутида Турсун Разиев вә Гүлвәзир Әлиеваларниң аилисидә дунияға кәлди. 30-жиллири Ленинградта (һазирқи Санкт-Петербург) оқуватқан Гүлвәзир Әлиеваниң қолиға «Гулливер — лилипутлар елидә» намлиқ китап чүшүп қалиду. У китапни қайта-қайта оқуп чиқиду. Болупму униң баш қәһримани «Гулливерни» өзичә «Гүлвира» дәп атайду. «Қиз бошансам, уни чоқум «Гүлвира»  атаймән», дәп көңлигә пүкүп қойиду. 1936-жили 19-июльда у қиз бошиниду вә исмини «Гүлвира» дәп атайду. Әйнә шу Гүлвира Разиева мәлум вақит өткәндин кейин хәлқимизниң сөйүмлүк нахшичисиға айланди.

Гүлвираниң қериндашлириму сәнъәтни таллавалди. Амма уларниң һечқайсиси Гүлвира охшаш нахшичи болмиди. Балиларниң арисида Гүлвира тили чиққандила нахша ейтишқа башлиған екән.

– Дадам мошу гәпни пат-пат қайтилатти, – дәйду Гүлвира Турсун қизи. – Бизниң балилиғимиз уруш жиллириға тоғра кәлгәчкә, бирәр қизиқарлиқ вақиәләрни әскә алалмайватимән. Хошаллиқтин көрә, қайғу-һәсрәт көпирәк болди. Уларни унтуғиним йоқ. Бәш яшқа толғинимда, дадам җәң мәйданиға атланди. Апам әтә-ахшими бизни әтрапиға жиғивелип, дадамниң гепини қилип берәтти. Мән, акам Һәйдар вә сиңлим Нургүл үчимиз көп вақитларда өйдин талаға чиқматтуқ. Санийәм техи бовақ. Растини ейтқанда, талаға кийгидәк кийимимизму болмиған. Бизниң әң яхши көридиған «ишимиз» өй төригә есилған севәткә қарап олтириш еди. Униңда һәр күни кесилгән үч парчә нан туратти. Апам бизни нанни йәвәтмисун, дәп әйнә шундақ егиз йәргә елип қоятти. Чүш мәзгили болғанда момам Мәрийәм шу үч парчә нанни бир-бирдин бизгә тутқузатти. Нанни қолумизға елип йегән пәйтни тил билән ейтип йәткүзүш тәс. Уни пәқәт көрүш керәк. Үзимиздики хошаллиқ. Бала қәлбимиз яйрапла кетәтти. Нанниң дәмликлигини демәмсиз? Шуниң билән бизниң биркүнлүк тамиғимиз мошуниң билән чәклинәтти. Әнди әтики күндики чүш мәзгилини күтимиз. Кейин һаятимда қанчиму таамлардин еғиз тәгдим, бирақ балилиғимда йегән шу нанниң мейизлик дәми һелиму еғизимда.

Гүлвира мәктәптә әла оқуйду. Шуңлашқа у шу жиллири уйғур балилиридин биринчи болуп Қиримдики «Артек» пионерлар лагериға әвәтилиду. У йәрдә қанчә күн дәм алған болса, шунчә күн нахша ейтипту.

Гүлвира Разиева http://www.parvaz.kz/index.php/razieva-gulvira-tursunovna – уйғур эстрада сәнъитигә биринчи болуп йол ачқан иҗрачи. Дәсләпки эстрада нахшилири униң орунлишида тамашибинлар қәлбигә йол тапти. Шуңлашқиму уни мухлислири дайим «Бизниң Гүлвира» дәп махтиниш билән тилға алиду.

Бәхтишат СОПИЕВ.

http://uyguravazi.kazgazeta.kz/?p=19173#more-19173