| Талантлар хәлиқ ичидә | |
|
|
Адильжан Химитов
Шархат Курбанов Сәнъәткә хумар яшлиримиз йетип-ашиду. Бүгүнки заманивий уйғур сәнъити муһитида улар өз маһаритини синап, тиришип келиватмақта. Ахири хәлиқ дил баһасидин тасқалғанларму бар, тасқиялалмиғанларму һәм. Әсли һәқиқий мәнада тәбиәт әта қилған талантиң болса, өзи издәп тиңшайду киши. Ундақ талантлар, болупму, йезида. Чоң сәһниләрдә көрмисәкму, һазирқи әхбарат технологиясида аммибаплиққа айланған компютер, янфонлиримиздин тиңшап, йеқимлиқ авазииға мәптун болимиз. "Хәлиқ талантлири" намиға сазавәр болғанлар һәрбир йезида дейәрлик бар. Әшундақ талантлиқ нахшичи-сазандиләр дәп миллитимиз нами билән аталған Уйғур наһийәсиниң Чонжа вә Баһарда истиқамәт қиливатқан Шархат Курбановни вә Адилжан Химитовни атиған болар едим. Шархатниң эстрадилиқ нахшилирини хелидин күзитип жүримән. Нахшилирини заманивий аранжировкида пәдәзлимисиму яшлар арисида наһайити аммибаплиққа айланған талант егиси. Он жил илгири Артур Илахуновниң репертуаридики "Әзиз яр" нахшисини өзгичә стильда йезип чиққан Шархат көпчиликкә тез тонулди. Андин өз ижадидин "Сени дәймән", "Айрилиш" қатарлиқ нахшиларни йоруққа чиқирип, яшларниң сөйүмлүк нахшичисиға айланди. Бүгүнки таңда болса, һәрқандақ сорун униң йеңи язған "Дутариңни ал қолуңға" намлиқ нахшисисиз өтмәйду. Адилжан Химитовниң алаһидилиги шуки, у хәлиқ нахшилирини бабиға йәткүзүп орунлашқа майил талант егисидур. Қолиға хәлқимизниң һәмрайиға айланған дутарини елип, ата-бовилиримиздин мирас қалған муңлуқ кона нахшилирини ейтқанда, гоя қедимий хәлқимизниң өтмүшини чарлиғандәк болисиз. Қош тар билән дил садалири бир-биригә тутушуп, тәшна қәлбләргә арам беғишлайду.
|
