«Уйғур авази» 23 июль 2015 ж.

9 — 21-июль күнлири җумһурийәт пайтәхтидики Қазақ миллий сәнъәт университетида сәнъәт вә мәдәнийәт бойичә дуниядики әң чоң форумларниң бири — 43- ІCTM конференцияси болуп өтти. Униңға жуқури дәриҗилик әмәлдарлар вә сәнъәт дуниясида тонулған шәхсләр қатнашти.Тәкитләш керәкки, бу күни Астанаға 70тин ошуқ мәмликәттин 800гә йеқин композитор, мәдәнийәтшунас вә сәнъәтшунас жиғилди. Мәзкүр мәрасимниң нәзәрийәвий бөлүмлиридин ташқири, бирқатар концертлиқ программилар уюштурулуп, һәрхил милләтләрниң миллий әнъәнилириму намайиш қилинди. Шундақла кәспий сәнъәткарлар тәрипидин муқамлар тоғрилиқму кәң даиридә әхбарат берилди. Мәсилән, Қазақстанниң хизмәт көрсәткән артисти, сәнъәтшунаслиқ пәнлириниң намзити Гүлнарә Сайитова «Ч.Валиханов: «Қәшқәр аяллириниң өзигә хас тәбиити» мавзусида һәм хәлқимизниң надир музыкилиқ дурданиси болған «Он икки муқам» тоғрисида доклад оқуди.

Dim lights Embed Embed this video on your site

Түркий хәлиқлириниң әнъәнивий музыка фестивали мәзкүр форумниң әң ярқин сәһипилириниң бири болди десәк һеч мубалиғә әмәс. Фестиваль «Шәһәр вә йеза билән даланиң музыкиси» намлиқ концерти билән ечилип, һәқиқәтәнму милләтләрара достлуқниң ярқин ипадисигә айланди. Чүнки бу йәрдә түрк, әзәрбәйҗан, өзбәк вә уйғур хәлқиниң сазәндилири, нахшичилири вә уссулчилири өз һүнәрлирини көрсәтти. Әнди уйғурларға мунасивәтлик гәп қилсақ, бу күни он бәш адәмдин тәркип тапқан «Нава» ансамбли «Мушәврәк» муқамини орунлиди һәм уни тамашибинлар қизғин қарши алди.

Мәшүр САСИҚОВ.

http://uyguravazi.kazgazeta.kz/?p=19570