«Уйғур авази» гезити, 2 октябрь 2015 ж.

Йеқинда җәнубий пайтәхттики Җамбул намидики Қазақ дөләт филармониясидә Алмута шәһири һакимийити Мәдәнийәт башқармиси вә «Алматы әуендері» концерт коллективиниң уюштуруши билән Қазақ ханлиғиниң 550 жиллиғиға беғишланған ІІ Хәлиқара «Ғасырлар сазы» этнофольклорлуқ музыкилиқ фестиваль болуп өтти. Фестивальниң асасий мәхсити — түркий хәлиқләрниң әнъәнивий музыка мирасини, кам учришидиған саз әсваплирини көпчиликкә тонуштуруш арқилиқ, һәр милләтниң роһий мәдәнийитини тәрғип қилиштин ибарәт болди.

Қазақстанниң җай-җайлиридин вә түркий тиллиқ дөләтләрдин, җүмлидин Өзбәкстан, Қирғизстан вә Башқурстандин кәлгән этнофольклорлуқ ансамбльлар, нахшичилар билән күйчиләр бу күни бар күч-ғәйритини сәрип қилди. Тәкитләш лазимки, фестиваль қатнашқучилириниң маһаритини баһалашқа қедимий саз әсваплиридин убданла хәвири бар салаһийәтлик мутәхәссисләр билән сәнъәткарлар тәклип қилинди. Шундақла «Ғасырлар сазы» фестивали хәлиқ аһаңлирини қәдирләйдиғанлар үчүн һәқиқий мәнасида мәйрәмгә айланди.

Мәзкүр музыка фестивалиға җумһурийәтлик дөләт Уйғур музыкилиқ комедия театриниң «Нава» фольклорлуқ ансамбли иштрак қилди. Униң иҗрасидики хәлқимизниң дурданиси болған «Он икки муқамдин» «Мушәврәк» тамашибинларниң қизғин алқишиға сазавәр болди. Шундақла «Ташвай», «Мәшрәп» нәғмилири билән талантлиқ уссулчиларниң әвришим уссуллириму қазиларниң жуқури баһасиға еришти.

Шундақ қилип, икки күн давам қилған фестивальниң йәкүни чиқирилип, уларниң арисида он төрт әң яхши сәнъәт коллективи диплом вә Пәхрий ярлиқлар билән мукапатланди. Уларниң арисида «Нава» ансамблиму болуп, у «Ғасырлар сазы» фестивалиниң лауреати аталди.

Фируза НӘВИРДИНОВА.

Алмута шәһири. http://uyguravazi.kazgazeta.kz/?p=20463#more-20463