«Уйғур авази» гезити, 8 октябрь 2015 ж.

Қундузай ТАШ: Өткән һәптидә гезитимиз сәһиписидә ШУАРлиқ даңлиқ режиссер Шерзат Яқуп вә у чүшәргән «Меһир-шәпқәт» фильми тоғрилиқ мақалә берилгән еди. Шу фильм йәнә бир утуққа еришти. Беҗин шәһиридә 22 — 25-сентябрь күнлири өткән «Beіjіng Screenіngs» кинофестивалида «Меһир-шәпқәт» фильми «Әң яхши фильм» вә «Хәлиқара мунасивәтләрниң кәңийишигә чоң төһпә қошқан фильм» дәп етирап қилинди. Шундақла Фуджоу шәһиридә өткән ІІ «Sіlk Road іnternatіonal Fіlm Festіval» хәлиқара кинофестивалиға қатнишип, тамашибин алқишиға сазавәр болди. Төвәндә диққитиңларға мошу фильмда баш рольни иҗра қилған уйғур Қундузай Таш билән болған сөһбитимизни һавалә қиливатимиз.

— Қундузай, фильмда Һәнипә апайниң обризини яритиш қийин болмидиму?

Әлвәттә, қийин болди. Чүнки фильмда биз у аялниң оттуз яштин сәксән яшқичә болған һаятини көрсәттуқ. Бу жиллар давамида җәмийәттә нурғун өзгиришләр йүз бәрди. Шу өзгиришләргә маслишишму, әлвәттә, қийин мәсилә. Тәкитләш лазимки, бу рольни ойнаш үчүн артистлар арисида чоң «күрәш» болди дәп ейтсамму болиду. Талантлиқ артистлиримиз көп, риқабәт күчлүк. Шерзат акам мени таллавалди. Шуңлашқиму униң ишәнчисини ақлашқа тириштим. Фильмни чүшириштин илгири шәхсән өзәм Алтай тәвәсигә берип, Һәнипә апай билән учраштим. У аял мениң бираз әнсираватқинимни байқидиму, әйтәвир: «Қорқмаң, қизим, һәммиси яхши болиду. Сизниң талантиңизға ишинимән», дәп маңа мәдәт бәрди. Фильмни үч ай давамида чүшәрдуқ. Шерзат Яқуп өзи наһайити тәләпчан режиссер. Униң көңлигә яққидәк иш болмиса һәммини тәкрар қилғузиду. Шуңлашқиму фильм утуққа йәтти дәп ойлаймән.

— Сизни бизниң тамашибинларниң, асасән, миниатюрилардики рольлириңиз арқилиқ яхши тонуйду. Кинода йәнә қандақ рольларни ойнидиңиз?

Биздә бу жанрни «этюдлар» дәп атайду. Хәлқимиз ичидә наһайити аммибап. Чүнки биз күлкә-юмор арқилиқ җәмийәттики камчилиқларни, адаләтсизликләрни тамашибинға көрситимиз. Вақит җәһәттинму қисқа. Шәхсән өзәм этюдларда көп чиқимән. Мән әсли кәспим бойичә драма актери. Һәрхил жилларда «Харбиндики ишлар» көп сериялик фильмда, «Ғунчә» драмисида, «Әң ахирқи километр» вә башқиму фильмларда рольлар иҗра қилдим. Баш рольни дәсләпки қетим «Меһир-шәпқәт» фильмида ойнидим. Шерзат Яқуп охшаш режиссер билән ишләш мениң үчүн чоң мәктәп болди. Көп тәҗрибә топлидим.

— Қайси рольларни ойниғанни яқтурисиз?

Мени тамашибинға тонутқан этюдлардики рольлар болсиму, өзәм драма әсәрләрдики образларни яритишни яқтуримән. Фильмдики асасий принциплиримниң бири — әгәр образ маңа яқмиса, мән уни һечқачан ойнимаймән. Асасән меһриванлиқни, инсанпәрвәрликни тәрғибат қилидиған, тәрбийәвий әһмийити бар, миллий урпи-

адәтлиримизни көрситидиған фильмларда чүшиватимән. Шундақ фильмлар қәлбимгә

— Әнди өзиңиз һәққидә ейтип бәрсиңиз?

Мән Үрүмчидә туғулуп өстүм. Дадам өмүр бойи «Шинҗаң сәнъити» журналида муһәррир болуп ишлиди. Өзиму драма әсәрлирини язиду. Һазир дәм елишта. Апам сәнъәткар. Амма өзи нахшичи болсиму, мениң сәнъәткар болушумға наһайити қарши болған. «Сәнъәткарниң қилған әмгигиниң һалавитидин җапаси тола» дәйдиған. Бирақ һазирқи утуқлиримни көргәндә өзиниң пикридин бираз янғандәк. Йолдишимму сәнъәткар, бир қизимиз бар.

Сөһәтләшкән

Йолдаш МОЛОТОВ.

Бавдун ӨМӘР чүшәргән сүрәт. http://uyguravazi.kazgazeta.kz/?p=20569