| «Алақилиримиз үзүлмисекән» | |
|
|
«Уйғур авази» гезити, 15 октябрь, 2015 ж.
Ғәйрәт ИБРАЙИМ: Өткән һәптидә Алмутида «Аламәт» продюсерлиқ мәркизиниң уюштуруши билән «Қәлб күйлири» намлиқ концерт өтти. Мәзкүр концерт «Аламәт» продюсерлиқ мәркизиниң қурулғиниға бәш жил толушиға вә Қазақтан хәлқи Ассамблеясиниң 20 жиллиғиға беғишлинип, униңға Қазақстан уйғур эстрада юлтузлиридин ташқири ШУАРлиқ нахшичи Ғәйрәт Ибрайим қатнашти.Ғәйрәт Ибрайим тарихий Вәтинимиздә тонулған нахшичиларниң бири. Болупму униң орунлишидики Или хәлиқ нахшилири тамашибин арисида наһайити аммибап. Бизниң Ғәйрәт билән болған сөһбитимизму шу мавзудин башланди. — Биз тәрәптә 2000-жиллардин кейин оттуз яшқичә болған яшлар арисида уйғур хәлиқ нахшилириға болған қизиқиш йоқашқа башлиди, — дәйду Ғәйрәт. — Мошу җәриян давамлишидиған болса, миллий музыкимизниң келәчиги ховуп астида қалидиғинини чүшәндуқ. Шуңлашқа яшлиримизниң хәлиқ нахшилириға болған қизиқишини пәйда қилиш йоллирини издидуқ. Хелә издинишләрдин кейин хәлиқ нахшилирини яшларниң көңлигә йеқин заманивий оранжировкида ейтқан әң нәтиҗидар услуб екәнлигигә көз йәткүздуқ. Шуниңдин кейин яшлиримизму хәлиқ нахшилирини сөйүп тиңшайдиған болди. Һазир биз тәрәптә нурғунлиған нахшичилар мошундақ услубни пайдилинип келиватиду.
— Сиз өзиңиз сәнъәткә қандақ кәлдиңиз? — Мениң дадамму, апамму сәнъәттин жирақ адәмләр. Амма момам Ризвангүл сәнъәткар аял. У нурғун хәлиқ нахшилирини биләтти һәм дутарни яхши чалатти. Момамниң тәсиридин сәнъәткә қизиқишим пәйда болди. Дәсләпки қетим он төрт йешимда чоң сәһнигә чиқтим. Шу пәйттики һаяҗанлинишим һелиму есимда. Кейинирәк Ғулҗида даңлиқ сәнъәткарлар Өмәрҗан Алим вә Давутҗан Насирдин тәлим алдим. Улар мениң устазлирим. Дәсләпки йәккә концертимни 2008-жили Үрүмчидә өткүздүм. Шу жили дәсләпки CD-дискамни чиқардим. 2013-жили болса, Или тәвәсидин чиққан даңлиқ сәнъәткарлар билән Үрүмчидә «Или күйлири» чолпанлар сәнъәт кечилигини өткүздуқ. Униңға Паша Ишан, Ташмәһәмәт Турсун, Аблиз Шакир, Әхмәтҗан Әхтәм, Дилшат Райдин охшаш нахшичилар қатнашти. Һазир Ғулҗида туримән, шу йәрдә иҗадийәт билән шуғуллиниватимән. Мениң бир әпсуслинидиғиним, шараитимға бола алий билим алалмидим. Һазир чоң оғлум Әзимәт сәнъәткә қизиқип жүриду. Талантиму бар. Әнди униң алий билимлик сәнъәткар болушини арман қилимән. — Репертуариңизда йәнә қандақ нахшилар бар? — Жуқурида ейтқинимдәк, репертуаримда асасән Или хәлиқ нахшилири. Униңдин ташқири өзәм иҗат қилғанлиримму бар. Талантлиқ шаир Муһәмәтҗан Рози вә композиторлар Нурмәһәмәт Рози, Аблеким Абләт билән һәмкарлиқта ишләймән. Тәкитләш лазимки, биз жилиға 50 — 60 концерт қоюмиз. Демәк, репертуарни дайим йеңилап туруш керәк. Чүнки тамашибинниң тәливи жуқури. Шуңлашқа дайим иҗадийәт үстидә жүримиз. Өзимизниң шәхсий студиямизму бар. Талантлиқ яшларға қолумиздин келишичә ярдәм беримиз. Һәқиқәтән қабилийәтлик бала болса, һәқсиз нахшиларниму йезип беримиз. Биз тәрәптә сәнъәткарлар хәйрихаһлиқ ишларға алаһидә көңүл бөлиду. Роза, Қурван һейти вә башқиму чоң мәйрәмләр һарписида «Иллиқлиқни йәткүзүш» сәнъәт кечилигини өткүзимиз. Буни дөләтму һәм тамашибинму қоллайду. Жиғилған пулни нәқ мәйданда житим-йесирларға, накаларға тапшуримиз. Йәнә бир тәрәптин, мошундақ концертларда һазирчә һечкимгә тонулмиған талантлиқ яшларниң чоң сәһнигә елип чиқимиз.
— Қазақстанлиқ уйғур эстрада артистлири билән алақиңиз барму? — Мошу кәмгичә шәхсий алақилирим болмиди. Әлвәттә, биз Уйғур театриниң артистлири билән яхши тонуш. Чүнки улар пат-пат гастрольларға келип туриду. Биздә Нуралим ака Варисовни, Рустәм Ниязовни яхши көриду. Уларни йәттә яштин йәтмиш яшқичә болған сәнъәтхумарларниң һәммиси сөйүп тиңшайду десәм, мубалиғә болмас. Шәхсән өзәм Қазақстанға дәсләпки қетим келишим. Пурсәттин пайдилинип, мошу мүмкинчиликни яратқан Қәлбинур Арупқа тәшәккүр изһар қилмақчимән. Алмутиға келип, биринчи новәттә, Уйғур театриға бардим. Нуралим ака билән сөһбәтләштим. Барлиқ артистлар билән учраштим. Рустәм Ниязов, Артур Илахунов билән бираз иҗадий мәсилиләрни муһакимә қилдуқ. Келәчәктә, шараит яр бәрсә, икки дөләтниң артистлириниң гастрольлирини уюштуруш мәхситимиз бар. Мәлумки, Ғулҗида уйғур чақчақчилириниң әнъәнилири яхши сақлинип қалған. Һазир шу әнъәниләрни давамлаштуруп келиватқан яшлиримиз йетилип чиқиватиду. Мүмкин болса, шуларниму Қазақстанға елип чиқиш планим бар. Мениң арминим, алақилиримиз үзүлүп қалмисекән. Сөһбәтләшкән Йолдаш МОЛОТОВ. |
