| Даңлиқ уйғур дирижери Қарағандиға кәлди. | |
|
|
Уйғур авази» гезити, 12 ноябрь 2015 ж.
Қазақстанниң хошна Хитай Хәлиқ Җумһурийити билән ихтисадий алақилиридин ташқири, мәдәнийәт вә сәнъәт саһасидики һәмкарлиғи күн санап күчәймәктә. Буниңға икки мәмликәт арисида тәҗрибә алмаштуруш мәхситидә уюштурулуватқан кәң даирилик чарә-тәдбирләр яхши испат болалайду. Шуларниң бири, буниңдин топ-тоғра бир ай илгири Петр Грибанов рәһбәрлигидики қазақстанлиқ сәнъәткарларниң ХХҖға қилған сәпири болса, әнди йеқинда даңлиқ уйғур дирижери Абдурахман Аюп башлиған симфониялик оркестр Қазақстанға келип, Қарағанда шәһиридики Байжанов намидики концерт бирләшмисидә концерт қойди. Мәлумки, ШУАРда сәнъәткар Абдурахман Аюпниң исми хәлиқ арисида алаһидә тилға елиниду. Чүнки у пәқәт Хитай Хәлиқ Җумһурийити даирисидила әмәс, дуния йүзидә өткүзүлүватқан чоң-чоң байқаш-көрүкләрниң иштракчиси һәм ғалибидур. Шундақла у Шанхай консерваториясиниң дирижерлиқ факультетини тамамлиған тунҗа уйғурдур. 1992-жили ушбу билим дәргаһиниң рәһбәрлиги униңға мошу йәрдә қелип, устазлиқ қилиш тәкливини бериду. Лекин Абдурахман Аюп бу тәклипни рәт қилип, ШУАРда симфониялик оркестр саһасини тәрәққий әткүзүш мәхситидә Үрүмчигә қайтип келиду. Мана шуниңдин буян, у Шинҗаңда миллий саз әсваплиридин тәркип тапқан бирнәччә ансамбльниң бешини қошуп, көплигән утуқларға қол йәткүзиду. Әнди беваситә Қарағанда шәһиридә өткән концертқа келидиған болсақ, бу йәрдә П.Чайковский, Д.Шостакович, Р.Вагнер охшаш бүйүк намайәндиләрниң әсәрлири билән биллә уйғур композиторлириниң, җүмлидин «Модәнхан», «Ипәк йоли» увертюриси вә уйғур муқамлири иҗра қилинди. Тәкитләш керәкки, мәзкүр концертниң утуқлуқ өтүшигә Абдурахман Аюпниң рәпиқиси, атақлиқ ғеҗәкчи һәм оркестрниң концертмейстери Гүлинур Иминниң әҗри бебаһа. Бу аиләвий сәнъәткарлар тәйярлиққа берилгән вақитниң қислиғиға қаримай, концертни жуқури дәриҗидә йәткүзүшкә муваппәқ болди.Әлвәттә, мундақ концертлар сәнъәтни чоңқур чүшәнгән инсанларниң яр-йөләк болуши билән уюштурулиду. Бу җәһәттин ушбу концертни өткүзүшкә Қазақстан тәрәптин қарағандилиқ Талғат Идрисов билән кәспий композитор Һәбибуллам Сетәков көп күч чиқарғанлиғиниму тилға алмай мүмкин әмәс. Мәшүр САСИҚОВ. |
