«Уйғур авази» гезити, 19 ноябрь 2015 ж.

«Азия плюс» продюсерлиқ мәркизи қурулғанда өз алдиға талантлиқ балиларни хәлиққә тонутуш, чоң сәһниләргә елип чиқиш мәхситини қойған еди һәм униңға йетиш үчүн изчиллиқ билән паалийәт жүргүзүп кәлмәктә. Мәзкүр мәркәздә тәрбийиләнгән яш талантлар пәқәт Қазақстандила әмәс, шундақла чәт әлләрдиму өтүватқан конкурсларға қатнишип лауреат аталди. Мана йеқинда бу продюсерлиқ мәркәз йәнә бир утуққа йәтти.

Өткәндә Алмутида «Күншуақ» җумһурийәтлик балилар конкурси өтти, — дәйду «Азия плюс» продюсерлиқ мәркизиниң мудири Сәһәрдин Йүсүпов. — У шәһиримиздики Оқуғучилар сарийи мәмурийитиниң тәшәббуси билән уюштурулди. Униңға пүткүл Қазақстандин талантлиқ балилар қатнашти. Бийил бу конкурсқа бизниң мәркәздин Илшат Аббасов иштрак қилди. Илшат А.Розибақиев намидики 153-мәктәп-гимназиядә оқуйду. У конкурста кичикләр топида, йәни алтә яштин он яшқичә болған балилар топида һүнәр көрсәтти. Илшат уйғур, қазақ, итальян нахшилирини орунлиди. Болупму у атақлиқ италиялик нахшичи Робертино Лоретти репертуаридики «Санта Лючия» нахшисини орунлиғанда, қазилар вә тамашибинлар қизғин қарши алди. Есиңизда болса, өзимизниң тонулған сәнъәткар акимиз Мурат Әхмәдиевму нәқ мошу нахшини орунлап, утуқ қазанған еди. Илшат конкурста, өз топида, биринчи орунни егиләп, униң келәр жили апрельда Астанада өтидиған басқучиға йолланма алди. Буму бизниң утуғимиз. Тәйярлиқниму башлавәттуқ.

Тәкитләш лазимки, «Азия плюс» продюсерлиқ мәркизидә талантларни пәрвиш қилишқа һәммә шараит яритилған. Вокалдин дәрис беридиған, миллий вә классикилиқ музыка әсваплирини үгитидиған салаһийәтлик устазлар бар. Сәһәрдин Йүсүповниң тәкитлишичә, бу мәркәз бәш яштин жуқури талант егилирини тәрбийиләшкә тәйяр.

Йолдаш МОЛОТОВ

http://uyguravazi.kazgazeta.kz/?p=21111#more-21111