«Уйғур авази» гезити, 26 ноябрь 2015 ж.

Биз буниңдин бираз вақит илгири уссул шәйдаси Наиләм Иминованиң Европиға атланғанлиғи һәққидә язған едуқ. Әйнә шу уссулчи қизимиз бу қетимму ата-аниси билән йеқинлирини хошаллиққа бөләп, 4 — 8-ноябрь күнлири Польшиниң Живец шәһиридә өткән «Калейдоскоп талантов. Осень – 2015» хәлиқара конкурсида ғалип чиқип, баш мукапат — Гран-приға сазавәр болди.Пәрзәндиниң утуғидин пәхирләнгән Наиләмниң ата-аниси Данияр Иминов билән Нәсибә Сабитованиң ейтишичә, Белоруссия, Россия, Украина, Польша вә Қазақстандин болуп, 40тин ошуқ сәнъәт коллективи қатнашқан бу конкурста уларниң қизи шуғуллиниватқан, исми сәнъәт дуниясида алаһидә тилға елинидиған кәспий уссулчи Ақмарал Қайназарованиң рәһбәрлигидики «Һинд классикилиқ уссул мәркизи» қазиларниң әң жуқури баһасиға еришипту. Шундақла Живец шәһириниң бургомистри Пан Антони Шлягор билән шәһәрлик кеңәшниң рәиси Пан Кшиштоф Грень тәрипидин мәзкүр уссул өмигигә конкурсниң кубоги тәнтәнилик рәвиштә тапшурулған.

Конкурсниң классикилиқ Бхаратанатьям һәм заманивий Болливуд һинд уссуллирини иҗра қилиш басқучлирида жуқури маһарәт көрсәткән қазақстанлиқ уссулчиларға һинд уссуллири вә вокал бойичә маһарәт дәрислири өткүзүлди һәм улар конкурсниң гимнини иҗра қилиш һөрмитигә сазавәр болди.

Җәмләп ейтқанда, пәқәт Қазақстандила әмәс, бәлки Оттура Азиядиму йеганә һесаплинидиған «Һинд классикилиқ уссул мәркизиниң» новәттики утуғи җумһурийитимизниң башқа әлләр билән болған мәдәний мунасивитини мустәһкәмләшкә қошқан төһписи десәк, буниңда ушбу мәркәзниң студенти Наиләм Иминованиңму биркишилик һәссиси бар.

Шундақ екән, бизму Европида өткән байқашта зор муваппәқийәтләр қазинип қайтқан уйғур қизи — «һинд уссулчисиға» иҗадий утуқ тиләймиз.

Мәшүр САСИҚОВ. http://uyguravazi.kazgazeta.kz/?p=21181