«Уйғур авази» 15 декабрь, 2015 жил

Мошу жили Евразия  Язғучилар иттипақи «ТҮРКСОЙ» тәшкилати вә Түркия мәдәнийәт министрлиги  билән һәмкарлиқта  түрк драматурги Халдин Танерниң туғулғининиң 100 жиллиғи мунасивити билән түркий хәлиқләр драматурглири арисида конкурс уюштурған еди. Униңға 18 мәмликәттин 108 драматург өз әсәрлирини  әвәткән. Қобул қилинған драмилар  икки ай давамида мутәхәссисләрниң муһакимисидин өтти.

Әлвәттә, һәрқандақ көрүк-конкурсқа һәрким үмүт-мәхсәт билән қатнишиду. Язғучи-драматург, Қазақстан Язғучилар иттипақиниң әзаси Әкрәм Әхмәтовму әйнә шундақ  үмүттә  «Махмут Қәшқәрий» драмиси билән  мәзкүр конкурсқа иштрак қилди.

Йеқинда тәләп-мәхсити күчлүк ушбу хәлиқара дәриҗидики конкурсниң йәкүни чиқирилип, лауреатлири ениқланди. Анкара шәһиридә болуп өткән драматургларни рәғбәтләндүрүш тәнтәнисидә уйғур драматургиниң  драмиси  адил қазиларниң жуқури баһасиға еришип, иккинчи орунға сазавәр болди. Униң  муәллипи лауреат атилип, Евразия Язғучилар иттипақиниң дипломи  вә Халдин Танер намидики хатирә медали һәм мәхсус кубок билән тәғдирләнди.

Түркий хәлиқләр драматурглири арисида дәсләпки қетим уюштурулған  мундақ чоң конкурста уйғур драматургиниң топтин озуп, лауреат атилиши миллий сәнъитимиз билән әдәбиятимиз үчүн чоң утуқ, әлвәттә.

Пурсәттин пайдилинип, биз Әкрәм Әхмәтовни бу утуғи билән қизғин тәбрикләп, униңға иҗадий утуқ тиләймиз.

Шәмшидин АЮПОВ.

СҮРӘТТӘ: Түркия театрлар башқармисиниң баш мудири Ниҗат Ирежепниң Әкрәм Әхмәтовқа мукапат тапшуруватқан пәйти.

http://uyguravazi.kazgazeta.kz/?p=21583#more-21583