| Муәллим әҗри баһаланди | |
|
|
«Уйғур авази» гезити, 24 декабрь 2015 ж.
Бийилқи Қазақстанниң Тунҗа Президенти күни, қириқ жилға йеқин һаятини устаз кәспигә беғишлиған Мунирәм Исмайилова үчүн йәнә бир хошаллиқ дәқиқиләрни елип кәлди. Мәйрәм һарписидики иш күни өзи хизмәт қиливатқан Қурманғазы намидики 7-музыка мәктивидә уни кәсипдашлири новәттики утуғи билән сәмимий тәбриклиди.Музыка саһасида көплигән шагиртларни учум қилған Мунирәм Гафур қизи җумһурийәтниң иҗтимаий-ихтисадий вә мәдәний һаятиға қошқан төһписи үчүн Әвезов наһийәлик һакимийәт тәрипидин Пәхрий ярлиқ билән тәғдирләнгәнлигидин хәвәр тепип, устазни тәбрикләшкә бардуқ. Әлвәттә, бәзиләр мундақ мукапатни унчивала әтивалап кәтмәйду. Амма пүткүл аңлиқ һаяти давамида музыкиға иштияқ бағлиған өсмүрләрниң өз йолини тепишиға күч-ғәйритини һәм мол тәҗрибисини сәрип қилип келиватқанлар үчүн униң әһмийити чоң. Узун жиллиқ әмгәк паалийитидә мошундақ мукапатларниң нәччисигә муйәссәр болған Мунира Исмайиловаму шулар җүмлисидин екәнлиги чоқум. Қурманғазы намидики музыка мәктивиниң мудири Венера Қаймулдин қизи мукапат егиси һәққидә төвәндикичә пикир билдүрди: — Бизниң музыка мәктивиниң коллективи Мунирәм Исмайилова билән һәқлиқ йосунда пәхирлиниду. Униң өз ишиға болған садақити шу дәриҗидекин, бәзидә һәйран қалидиған пәйтлиримизму болиду. Өйидә һәрқандақ ишниң йүз беришидин қәтъий нәзәр, у һечқачан сәвәпсиз ишқа кәлмәй қалмайду. Шуниң үчүн болса керәк, мән яш устазларни дайим шу һәдимиздин үлгә елишқа чақиримән. Музыка мәктивидә өсмүрләргә пианино вә скрипка челишни үгитип, шагиртлири дайим мәғрурлиниш һәм пәхирлиниш билән тилға алидиған устаз қериндишимиз һәққидә мундақ иллиқ инкас, әлвәттә, бизни хошал қилмай қоймиди. Дәсләп Чайковский намидики музыка училищесини тамамлап, андин Қурманғазы намидики консерваториядә тәһсил көргән, бүгүнки күндә Қазақстанниң музыка сәнъитигә салмақлиқ һәссә қошуватқан Мунирәм Исмайилованиң әҗри мунасип баһаланғанлиғидин бизму мәмнун болдуқ вә уни утуғи билән тәбрикләп, ишиға муваппәқийәт тилидуқ. Мәшүр САСИҚОВ |
