«Уйғур авази»гезити, 24 декабрь 2015 ж.

Бийил апрельда яш режиссер Бәхтияр Исламовниң «Иккинчи муһәббәт» намлиқ қисқа метражлиқ фильми хәлиқара прокатқа чиққан еди. Мәзкүр фильм 20 хәлиқара кинофестивальларда жуқури баһаларға еришти. Қисқа вақит ичидә мошундақ утуққа йәткән фильм аз болса керәк. Тәкитләш лазимки, бу Бәхтияр Исламовниң дебютлиқ фильми һәм униң өзиниң мәблиғигә чүширилгән. Шуниңға қаримай, Бәхтияр өзини тәҗрибилик һәм пәқәт өзигә хас стили бар режиссер сүпитидә тонутти.

Бәхтияр өз фильмида инсан қәлбигә қорқунуч салидиған қанлиқ көрүнүшләрни, иҗтимаий тәвринишләрни көрсәтмәйду. Фильмда баш қәһриман — ашиқ балиниң кәйпиятиниң инчикә тәрәплирини, психологиялик әһвалини, адәттики һаяти көрситилгән. Муәллип өзиниң бу әмгигини «киноимпрессионизм» дәп атайду. Бәхтияр өзи мошу йөнилиш һәққидә хәлиқара илмий-аммибап журналларға бирнәччә мақалиму язди.

Сентябрь ейида Украининиң Херсон шәһиридә Украина Мәдәнийәт министрлиги, Украина кинематографистлириниң миллий иттипақи вә Дуниявий кино тәшкилатиниң (UNІCA) қоллап-қувәтлиши билән «Кинокимерия» Х хәлиқара кинофестивали өткән еди. Мошу кинофестивальда Бәхтияр Исламов «Әң яхши хәлиқара дебют» мукапитини йеңивалди. Әнди ноябрьда АҚШниң Орландо шәһиридә өткән хәлиқара кинофестивальда «Иккинчи муһәббәт» икки мукапат — «ESSENCE AWARD» вә қазиларниң мәхсус «JUDGES CHOІCE AWARD» мукапитиға еришти. Мәзкүр кинофестиваль Россия Федерациясиниң АҚШтики әлчиханисиниң, рус-америка мәдәнийәт мәркизиниң, Миллий аэрокосмос агентлиғиниң (NASA), Россия мәдәнийәт министрлигиниң кинематография департаменти вә Орландо шәһириниң кино комитетиниң тәшәббуси билән өтти. Фестиваль даирисидә режиссер Бәхтияр Исламов вә фильм продюсери Дарья Корнеева журналистлар үчүн мәтбуат-конференциясини өткүзди.

Тәкитләш лазимки, фильм тамашибин тәрипидин наһайити яхши қобул қилинди. Фильмдики техникилиқ утуқлири, кадрларниң рәңдарлиғини Россия Федерациясиниң консули Дмитрий Зубарев алаһидә тәкитлиди.

Униңдин ташқири «Иккинчи муһәббәт» фильми Австралиядә, Һиндстанда, Эстониядә, Кениядә, Камерунда, Мексикида, Хитайда өткән кинофестивальларда намайиш қилинди.

Һазир Бәхтияр Исламов иккинчи қисқа метражлиқ фильмни чүширип болди. Униң премьериси йеқин арида Европида өтмәкчи.

Йолдаш МОЛОТОВ

http://uyguravazi.kazgazeta.kz/?p=21755#more-21755