| Қазақстан командиси иккинчи орунда | |
|
|
Қазақстан командиси иккинчи орунда. «Уйғур авази»гезити, 24 декабрь 2015 ж.
16 — 23-ноябрь күнлири арилиғида Россияниң Медынь шәһиридә спортниң универсал җәң түри бойичә дуния чемпионати өтти. — Спортниң универсал җәң түриниң алаһидиликлири көп,— дәйду «Универсал җәң» федерациясиниң Алмута вилайити бойичә вице-президенти Ялқунҗан Садиқов. — Бу йәрдә спортчи, биринчи новәттә, тосалғулар мәйданини бесип өтүши керәк. Йәни, лабиринтни жүгрәп өтиду, икки вә алтә метрлиқ егизликтин сәкрәйду, пистолеттин атиду, пичақни нишанға дәл тәккүзүши керәк, ағамчидин серилип чүшүши лазим. Әң ахирида бәш раундтин тәркип тапқан «җәңдә» урушиду. Демәк, бу йәрдә спортчи җисманий вә психологиялик җәһәттин наһайити күчлүк болуши керәк. Мошу җәһәттин Қазақстан талланма командисини бу чемпионатқа тәйярлиған Имид Тохтахунов, Қазбек Алтыруов вә Шатлиқ Һәмраев охшаш спортчи вә мәшиқләндүргүчиләрниң әмгигини алаһидә тәкитләш лазим. Мәзкүр мусабиқиниң йәкүнлири бойичә Россия командиси биринчи, Қазақстан командиси иккинчи, Әзәрбәйҗан командиси үчинчи орунни егилиди. Қазақстан талланма командиси тәркивидә шәхсий көрсәткүчлири билән уйғур жигитлири Шөһрәт Худайбәрдиев вә Расул Илиясов мукапатлиқ орунға еришти. Аяллар арисида болса, Раиса Байлиева икки дүркүн дуния чемпиони аталди. Тәкитләш лазимки, бу чемпионат давамида өзлириниң жуқури маһаритини көрсәткән мусабиқә судьялириғиму мәхсус сертификатлар тапшурулди. Қазақстандин Ялқунҗан Садиқов вә Қазбек Алтыруов мошундақ сертификат елишқа муйәссәр болди. Тәкитләш лазимки, йеқинда Ишиктә шәһиридә йеңи спорт-сағлашлаштуруш комплекси ечилди. Комплексқа рәһбәр болуп Ялқунҗан Садиқов тайинланди. Ялқунҗан акиниң ейтишичә, әнди яшларни спортқа җәлип қилишқа, уларни спортта йеңи утуқларға йәткүзүш үчүн яхши шараитлар яритилған. Келәчәктә болса, бу йәрдин елимизни дунияға тонутидиған чемпионларниң чиқидиғанлиғи ишәнчимиз камил. Йолдаш МОЛОТОВ. |
