«Уйғур авази» гезити, 14 январь 2016 ж.

Әмгәкчиқазақ наһийәсиниң жилдин-жилға тәрәққий етип келиватқан Ават йезиси 2015-жилни нурғунлиған яхшилиқлар билән йәкүнлиди. Мундақ дейишимизгә, йеқинда Аватниң Мәдәнийәт өйидә өткән тәнтәнә декабрь ейида Россияниң пайтәхти Москва шәһиридә өткән «Настоящий шансон» фестивалиға қатнишип, баш мукапатқа еришкән Алимҗан Зулпиқаровниң https://parvaz.kz/index.php/alimjan-zulpikarov һөрмитигә беғишланди.Қазақстанни йәнә бир қетим тонутқан Алимҗан балилиқ чеғидинла музыкиға иштияқ бағлиған. Тәбиәт һәдийә қилған қабилийити түпәйли у мәктәптики барлиқ кәчләрни классикилиқ, лирикилиқ, хәлиқ, шундақла шансон стилидики нахшилири, йеқимлиқ авази билән қизитип кәлгән. Алимҗан йезидики мәрасимлар билән чәклинип қалмай, талантини җумһурийәтлик вә хәлиқара конкурсларда намайиш қилған сәнъәткар. Униң әң чоң утуқлириниң бири – 2015-жили «Шинҗаң талант сәһниси» хәлиқара фестивалиға қатнишип, финалға чиқиши болди. Өткән жилниң декабрь ейида болса, Алимҗан Россияниң «Настоящий шансон» фестивалида сәнъәт мухлислирини өзиниң әҗайип таланти билән қайил қилип, І орунни егилиди. «Настоящий шансон» ширкитиниң мудири Владимир Курский Алимҗанниң қабилийитини мунасип баһалап, уни һәмкарлишип паалийәт елип беришқа чақирди. Һазир у яш сәнъәткарниң орунлишидики нахшилардин тәркип тапқан диск үстидә ишләватиду. Диск бирнәччә ай давамида йезилип, униң тонуштуруш мәрасими 14-май күни өтиду дәп бәлгүләнгән.

Кәч давамида Мустәқиллик күни һарписида «Әмгәкчиқазақ наһийәсиниң Пәхрий граждини» аталған Ават йеза округиниң һакими Ерғали Байбөриев сәһнигә тәклип қилинди. Һакимниң  бу мукапатқа еришиши – жутдашлириниң новәттики хошаллиғи болди. Атап кетиш керәкки, Ерғали Байбөриев Ават йезисидики «Құс шаруашылығы» фабрикисида мал дохтури, иҗраий мудир, «Алматы құс» компаниясидә баш мал дохтури хизмәтлирини атқурған тәҗрибилик, иш уюштуруш қабилийити жуқури рәһбәр. Ерғали Байбөри оғли егиз пәллидин көрүнгән Алимҗанни жутдашлири намидин сәмимий тәбрикләп, униңға атиған соғисини тапшурди. Новәттики сөзгә чиққан Өмәр Муһәммәдий намидики мәктәпниң мудири Айгүл Нурқасымова, йеза ақсақаллар кеңишиниң рәислири Савутҗан Иминов билән Полат Исмайилов узун жиллардин бери округни үнүмлүк башқуруп келиватқан округ һакимиға, Алимжанға дегән иллиқ тиләклирини изһар қилди. Жут намидин Ерғали Байбөриевниң үстигә чапан йепип, гүлчәмбәрләр тәғдим қилди.

Кәч давамида 11-синип оқуғучиси Дилназ Рәһманованиң қазақ тили бойичә Фариза Оңғарсынованиң хатирисигә беғишланған көрүктә мукапатлиқ ІІ орунни егилигәнлигиму тәнтәнилик рәвиштә аталди. Тиҗарәтчи, йезидики җәмийәтлик ишларниң активисти Нурмәһәмәт Мәңсүров келәчигидин үмүт күткүзгән Дилназниң ата-анисиға, устазлириға, тинишчан қизға миннәтдарлиқ билдүрүп,  атиған соғисини тапшурди.

Кәч Долқунҗан Розахунов, Абдусемәт Мәсимов вә Гүлмира Мәсимова рәһбәрлигидики «Баһар» нахша-саз ансамблиниң тәйярлиған концерти вә Толқын Әлешулыниң орунлишидики нахшилар билән нәқишлинип, наһайити тәсирлик өтти. Ахирида Алимҗан Зулпиқаров өзини қоллап-қувәтләп келиватқан жутдашлириға, фестивальға қатнишиш имканийитини яритип бәргән аватлиқ вә алмутилиқ тиҗарәтчи ака-һәдилиригә миннәтдарлиғини билдүрди.

Рашидәм РӘҺМАНОВА.

Әмгәкчиқазақ наһийәси.

http://uyguravazi.kazgazeta.kz/?p=22087#more-22087