«Уйғур авази» гезити, 21 январь 2016 ж.

«Пәрваз» уйғур иҗрачилар бирләшмиси қурулғандин буян, сәнъәткарлиримизниң иш-паалийити техиму риваҗлинишқа башлиди. Мундақ дейишимизгә пәқәт тойлардила өз талантини намайиш қилип келиватқан яш талант егилири әнди чоң сәһниләрдин вә елимиздики миллий телеканаллардин көрүнүшкә башлиди.Тәкитләш лазимки, сәнъәткарлиримиз пәқәт концерт қоюш биләнла чәкләнмәй, хәйрихаһлиқ чарә-тәдбирләрдиму өзлирини көрсәтмәктә. Буни улар өзлириниң муқәддәс борчи дәп билиду. Әнди көплигән видеоклипларниң арқа-арқисидин йоруқ көрүши бу саһаниму техиму илгириләтти. Сәнъәткарларниң бешини қошуп келиватқан бирдин-бир сәнъәт тори, у www.parvaz.kz тор бетидур. Дәсләп тор ечилған пәйттә сайтимизни зиярәт қилғучилар сани тәвлүгигә 1500 болса, бүгүнки күндә 3000дин ашиду — дәйду мәзкүр сайтниң муһәррири Райим Һәмраев. — Бу, әлвәттә, башқа уйғур сайтлири билән селиштурғанда жуқури көрсәткүчтур.

Йеңи жил һарписида сайтта «Пәрваз» уйғур иҗрачилар бирләшмисиниң «Достлуқ наваси» гимниниң (музыкиси — Дилмурат Баһаровниң, сөзи — Молутҗан Тохтахуновниң) видеоклипи йоруқ көрди. Гимнни «Яйра» дуэти, Рустәм Ниязов, Санийәм Исмаил, Разийәм Һәмраева, Пәрһат Мәсим, Муштәри Исламова охшаш талантлиқ нахшичилар орунлиди. Клип алаһидә бир сценарий асасида чүширилмигән болсиму, лекин барлиқ сәнъәткарларниң һәрхил җайлардики әмгәк паалийити толуқ намайән қилинған. Әнди буниңдин кейин мәзкүр бирләшмә тәрипидин һәр жили уюштурулидиған «Баһар наваси» намлиқ концерт вә башқиму чарә-тәдбирләр мошу гимн билән башлиниду вә аяқлишидиған болиду.

Молутҗан ТОХТАХУНОВ,

Яркәнт гуманитарлиқ-техникилиқ колледжиниң оқутқучиси.

http://uyguravazi.kazgazeta.kz/?p=22170#more-22170