| Сәһнидә — «Яңра, нахшам». | |
|
|
«Уйғур авази» гезити, 17 март 2016 жил
Яш сәнъәткарларға йеңи мүмкинчилик яритип келиватқан «ARTUR PRODUCTІON» продюсерлиқ мәркизи вә «VAY TANG» дуэтиниң уюштуруши вә «Пәрваз» иҗрачилар бирләшмисиниң қоллап-қувәтлиши билән йеқинда Ө.Жолдасбеков намидики Студентлар сарийида «Яңра, нахшам» гала-концертиниң III бөлүми болуп өтти. Бу концерт тамашибинларға йәнә бир қетим мундақ чарә-тәдбирләр сүпитиниң һәр җәһәттин яхшилиниватқанлиғини испатлиди. Униң ичидә риясәтчиләрниң концертни жүргүзүш өзгичилиги, сәһниниң алаһидә безилиши, йеңи нахшиларниң иҗра қилиниши, уссулчилар топлириниң уссул қоюлумлири, концертниң уюштурулуш дәриҗисиниң үстүнлүги вә умумән тамашибинларниң арқа-арқисидин сәнъәткарлиримизни қоллиған җараңлиқ алқишлири — буниң ярқин мисали. Қазақстан уйғур эстрадисиниң йәккә нахшичилири вә топлиридин тәркип тапқан концерт программисидин сирт Алимҗан Бавдиновниң той тоғрисидики һәҗвий вә Мурат Әйсаровниң «Ана һәққидә» җиддий монологлири тамашибинни чоңқур ойға салса, «VAY TANG» дуэти билән Бәхитҗан Савурҗановниң сәһнигә елип чиққан миниатюриси тамашибинларни күлкигә ғәриқ қилди.
«ARTUR PRODUCTІON» продюсерлиқ мәркизиниң мудири Артур Илахуновниң тәкливи билән кәлгән ШУАРлиқ чолпан Гүлбаһар Реһим — тамашибинлар үчүн күтүлмигән соға болди. Концертниң ахирида Қазақстан эстрада юлтузи, «RІNGO» топиниң әзаси – Адилҗан Өмәровниң сәһнигә уйғурчә нахша ейтип чиқиши тамашибинларға техиму һөзүр-һалавәт дәмлирини һәдийә қилди. Хуласиләп ейтқанда, «Яңра, нахшам» концертлиқ лайиһиси үстидә ишлигән уюштурғучиларниң бу чаригә пухта тәйярлиқ қилғанлиғини бирдин байқавелиш тәс әмәс еди. Альбина ӘМӘТОВА. |
