«Уйғур авази» 29 сентябрь 2016 ж.

Өткән һәптидә   Уйғур театрида  җумһурийәтлик Уйғур этномәдәнийәт мәркизиниң қоллап-қувәтлиши билән Қазақстан Җумһурийити Мустәқиллигиниң 25 жиллиғиға һәм «Туран дунияси» җәмийәтлик фондиниң қурулғининиң 5 жиллиғиға беғишланған «Бирлиги ярашқан мустәқил елим бар»  концертлиқ программиси  өткүзүлди.Мәзкүр чарә-тәдбирниң ечилиш тәнтәнисидә сөзгә чиққан  Қазақстан Җумһурийити Парламенти Мәҗлисиниң депутати, ҚХА Кеңишиниң әзаси, җумһурийәтлик Уйғур этномәдәнийәт мәркизиниң рәиси Шаһимәрдан Нурумов жиғилғанларни бу қош мәйрәм билән қизғин тәбрикләп, «Туран дунияси» жәмийәтлик фондиниң мудири Карлин  Мәхпировқа  Қазақстан хәлқи Ассамблеяси  Рәисиниң  орунбасари  Ералы Тоғжановниң  Тәшәккүрнамисини тапшурди.  Алмута шәһәрлик мәслиһәтниң депутати Шавкәт Өмәров  бәшжиллиқ тәвәллудини нишанлаватқан  фонд  намиға иллиқ ләвзини билдүрди.

Тәнтәнә давамида  Татарстан, Қирим татарлири, Якутия, Хакасия, хошна түркий җумһурийәтләрдин, түркийтиллиқ хәлиқара тәшкилатлардин һәм Алмута шәһиридики җәмийәтлик тәшкилатлар вә айрим шәхсләрдин кәлгән телеграммилар оқулди. Андин кейин тәбрик сөзгә чиққан «Бейбітшілік әлемі» хәлиқара тәшкилатиниң президенти Нурман  Әбенов Карлин Мәхпировниң мәйдисигә «Ататүрк» алтун медалини, Алмута шәһәрлик Уйғур этномәдәнийәт мәркизи рәисиниң орунбасари Иврайим Исрайилов мәдәнийәт мәркизи тәсис қилған «Хәлиқ пәрзәнди» медалини қадиди.  Новәттики натиқлар — «Түрк  әлемі» хәлиқара җәмийәтлик фондиниң президенти Ахмет Дағдуран, Қирғиз  Җумһурийитиниң  Алмута шәһиридики консули Нәсип Рысбеков,  «Уйғур авази» гезитиниң баш муһәррири  Ершат Әсмәтов вә башқилар «Туран дунияси» фондиға  түркий тиллиқ мәмликәтләр вә хәлиқләр оттурисидики өзара һәмкарлиқни күчәйтиш ишида утуқ тиләп, пәхрий ярлиқларни тапшурди.

Тәнтәнә җәриянида түркий тиллиқ мәдәнийәт мәркәзлириниң  концертлиқ номерлири көрситилип, мәзкүр чарә-тәдбирниң жуқури  дәриҗидә өтүшигә зәмин яратти.

Шəмшидин АЮПОВ

http://uyguravazi.kazgazeta.kz/?p=26253#more-26253