| Хәлиқара конкурсқа қатнашти | |
|
Хәлиқара конкурсқа қатнашти«Уйғур авази» гезити, 25.11.21 Йолдаш МОЛОТОВ, «Уйғур авази»
Равқәт Дауловниң кичигидинла сәнъәткә болған иштияқи зор болди. Төрт йешидин тартипла нахша ейтип, уссул ойнашни башлиди. 2012-жили Шарванәм Разиеваниң уюштурушида өткән «Алтун ғунчә» балилар фестивалида биринчи орунни егилигән еди. Һазир у Алмутидики А.Розибақиев намидики 153-мәктәп-гимназияниң 8-синипида оқуватиду. Мәктәптә болса, устази Надийәм Рембақиеваниң ярдими билән сәнъәт билән җиддий шуғуллинишқа башлиди. Рәвқәт мәктәпара, наһийәлик, шәһәрлик, җумһурийәтлик дәриҗиләрдә өткән конкурсларда, фестивальларда мукапатлиқ орунларға еришти. Мәсилән, 2016-жили «Сәлем Астана» конкурсида вокал бойичә 3-орунни, шу жили йәнә «Сырым бар жүрегімде» нахша-саз мусабиқисидә 2-орунни, «Жүзден жүйрік» конкурсида 3-орунни егилиди. Униң шундақла математика вә инглиз пәнлиригә болған қизиқишиму жуқури. Мошу пәнләр бойичә өткән җумһурийәтлик олимпиадилардиму мукапатлиқ орунларни алди.
Рәвқәт Даулов өткән жили Украинида онлайн-шәкилдә өткән «2220 international Muzic Festival» фестивальға қатнишип, 3-орунға егә болған. Бийилму әйнә шу хәлиқара конкурсқа Рәвқәт Даулов йәнә қатнашти. Тәкитләш лазимки, бийил мәзкүр конкурсқа 14 дөләттин 86 оқуғучи иштрак қилди. У 12 — 15 яш арилиғидики конкурсантлар арисида биринчи орунға еришти. Конкурста Рәвқәт ижра қилған «Ата-ана» нахшисиға (музыкиси Рустәм Сонуровниң, сөзи Абдулжан Азнабақиевниң) чүширилгән клипи намайиш қилинди. Рәвқәтниң мошу нахшиси Интернет арқилиқ аваз бериш вә жюри әзалириниң қарариниң йәкүнлири бойичә суперфиналда Киевтики истираһәт бағлиридики чоң экранларда көрситилди. |
