| Арамбәхш дәмләрни беғишлиди | |
|
Арамбәхш дәмләрни беғишлиди
Һазир немә көп – нахшичи көп. Һәқиқий талант егилирини пәқәт уларниң қабилийитини синайдиған конкурс-мусабиқиләрдә ениқлаш мүмкин. Йеқинда әйнә шундақ атақлиқ эстрада юлтузи, ярқин сәнъәткар, мәрһум Мурат Насиров намидики VII хәлиқара конкурс тонулған сәнъәткар Полат Һезимовниң тәшәббуси вә ҖУЭМ йенидики «Җанан» хәйрихаһлиқ аяллар фондиниң уюштуруши билән «Алатау» Мәдәнийәт өйидә өтти. Шәмшидин АЮПОВ, «Уйғур авази», 14.12.22 Тәкитләш керәкки, бийил бу конкурсниң географияси кәңийип, униңға жигирмидин ошуқ яш сәнъәткарлиримиз, шундақла Норвегиядин, Түркиядин, Қирғизстандин вә Ташкәнттин яш нахшичи қиз-жигитлиримиз қатнашқанлиғи һәммимизни хошал қилди. Шундақ қилип, ушбу сәнъәт көрүгигә Қазақстанниң хизмәт көрсәткән әрбаплири Ялқунҗан Шәмиев, Пәрһат Давутов, көрнәклик сәнъәткар Гүлбаһар Әхмәдиева, продюсер Гүлвира Илахунова-Яри, тонулған нахшичилар Ярмәһәмәт Калашиев, Ринат Баситов кәби сәнъәткарлар қазилиқ қилди. Сәнъәт дуниясида исми көпчиликкә яхши мәлум бу қазилар тәрипидин чиқирилған йәкүн бойичә, үчинчи орунни алмутилиқ яш нахшичи Арафат Абдураим егилисә, өзиниң йеқимлиқ нахшилири билән яшлиримиз арисида тонулуп келиватқан маливайлиқ Шамил Шерип иккинчи орунға еришти. Әнди биринчи орун болса, яркәнтлик хәлиқ таланти Сухрат Ниязовқа буйриди. Конкурсниң баш мукапити – Гран-прини түркиялик яш талант егиси Нурулбәшәр Огузоглу йеңивалди. Конкурс ғалиплири «Қапшагай ХимМонтаж» ҖЧЙ вә «Җанан» аяллар» фонди һәм ҖУЭМ йенидики Жигитбашлири кеңиши тәрипидин диплом вә ахчилиқ мукапат билән тәғдирләнди. Қазақстанниң хизмәт көрсәткән әрбаби, көрнәклик рәссам Әхмәтҗан Әһәт Норвегиядин кәлгән яш нахшичи Мөмүнҗан Рахманға «Ләйли-Мәҗнун» графика әсәрини тәғдим қилса, миллий мәдәнийитимизниң җанкөйәри Гөзәл Хизмәтова яркәнтлик һамий Омақ Закированиң намидин яш нахшичи Арафат Абдураимға кәспий микрофон соға қилди. “Игілік” җумһурийәтлик аиләвий журналиниң баш муһәррири М.Айтенова Гөзәл Хизмәтовани “Құрмет иеси” медали билән тәғдирлиди. Бу күни яш нахшичилар Расул Қурбанов, Аблеким Турсунов, Адил Қари, Рамилҗан Нурахунов, Баһара, шундақла қирғизстанлиқ Сабирҗан Ниязов билән Сабина Абдуллаева, өзбәкстанлиқ Үмүтҗан Каримов конкурсниң меһманлири сүпитидә тамашибинлар үчүн бир түркүм нахшилири билән чашқа чачти. Ахирида сөз новитини алған адилқазилар рәиси, Қазақстанниң хизмәт көрсәткән әрбаби Ялқунҗан Шәмиев, «Қазақстан уйғурлириниң җумһурийәтлик этномәдәнийәт мәркизи» җәмийәтлик бирләшмиси йенидики Жигитбашлири вә Алий Кеңәшниң рәиси Долқунтай Абдухелил, ҚУЯБ рәиси Рустәм Хәйриев мәзкүр конкурсни уюштурушқа көп күч чиқарған Полат Һезимовқа вә һәртәрәплимә қоллиған «Җанан» аяллар фондиниң әзалириға һәм өзлириниң йеқимлиқ нахшилири билән көпчиликкә арамбәхш дәмләрни беғишлиған хәлиқ талантлириға миннәтдарлиғини билдүрди. |
