Студентлар концерт қойди

«Уйғур авази» гезити 06.04.23

Мәшүр САСИҚОВ,

Йеқинда Алмута шәһиридики П.Чайковский намидики музыка колледжида ушбу билим дәргаһидики уйғур бөлүминиң оқутқучилири Сабирҗан Манашев билән Гүлжан Аманжолниң уюштурушида студентларниң концерти болуп өтти. Униңда келәчәк сәнъәткарлар, дуния музыкиси билән бирқатарда миллий нахша-сазлиримиздин чачқа чечип, тамашибинларға алаһидә дәмләрни һәдийә қилди. Тамашибинлар демәкчи, колледж студентлири тәйярлиған концертқа уларниң ата-анилири билән җумһурийәтлик Уйғур этномәдәнийәт мәркизиниң бир топ башқарма әзалири – ҖУЭМниң иҗраий мудири, Қазақстан Уйғур Яшлири Бирлигиниң рәиси Рустәм Хәйриев, «Җанан» җәмийәтлик фондиниң рәиси Мизангүл Авамисимова, Талғир наһийәлик Ханим-қизлар кеңишиниң рәиси Каминур Сопиева вә Наурызбай наһийәлик Уйғур этномәдәнийәт мәркизиниң рәиси Бәхтияр Исмайилов вә колледжниң устазлар коллективи қатнашти.

Икки саатқа йеқин вақит давамлашқан концерт давамида студентлар қазақ вә уйғур хәлиқлириниң миллий чалғу әсваплирини рояльға тәңкәш қилған һалда, дилларға арам беғишлайдиған музыкилар арқилиқ көпчиликниң алқишиға сазавәр болди. Мәсилән, 2-курс студентлиридин тәркип тапқан қобызчилар топи билән уйғур бөлүминиң студентлири тоғрилиқ шундақ дейишимиз мүмкин. Улар һәрхил милләтниң нәғмә-навалирини иҗра қилип, өзлириниң талант-қабилийитини көрситишни билди. Бу, әлвәттә, уларға мәзкүр билим дәргаһида устазлиқ қиливатқан инсанларниң шиҗаәтлик әҗриниң нәтиҗиси екәнлиги ениқ. Бу җәһәттин устазлардин Сабирҗан Манашев билән бирқатарда Рината Нуржанова, Марина Архипова вә башқиларниң әмгигини алаһидә тәкитләшкә әрзийду.

Бу күни шундақла концертниң меһмини вә ушбу билим дәргаһиниң учумкари Санийәм Исмайил студентлар билән «Нава» муқамидин үзүндиләр иҗра қилип бәрди. Шу тапта шундақла қедимий сәнъитимизниң дурданиси – муқамму яңриди.

Умумән, бу концертта һүнәр көрсәткән яшларниң, болупму уйғур бөлүми студентлириниң миллий сәнъитимиздә бүйүк чоққиларға йәткән шәхсләрниң йолиға варислиқ қилишқа қадир екәнлигигә ениқ көз йәткүздуқ. Чүнки уларниң қайси саз әсвавини қолиға алмисун, уни бемалал челип, һәрқандақ сазни бабиға йәткүзүп орунлиши бизниң шундақ хуласигә келишимизгә түрткә болди. Әлвәттә, бу һәркимни хошал қилса керәк. Шундақ екән, бу йәрдә әйнә шу қабилийәтлик яшлиримизға барлиқ шараитларни яритиватқан билим дәргаһи билән шагиртларға чоңқур билим бериватқан Сабирҗан Манашев кәби устазларға апирин ейтиш орунлуқ. Шуңлашқа концерт ахирида сөзгә чиққан ҖУЭМниң башқарма әзалири миллий сәнъитимизниң сақлинип қелишиға биркишилик әҗрини сиңдүрүватқан Сабирҗан Манашевқа  ҖУЭМниң Алмута шәһәрлик шөбиси тәрипидин тәсис қилинған «Ғәмхор» медалини тапшурди. Шундақла П.Чайковский намидики музыка колледжиниң бир топ устазлириға миннәтдарлиқ билдүрүп, уларни пәхрий ярлиқлар билән мукапатлиди.

https://uyguravazi.kazgazeta.kz/news/49006