Сәнъәттә чегара йоқ

Йеқинда Түркияниң Анталия шәһиридә дунияға тонулған қазақстанлиқ нахшичи Димаш Қудайбергенниң концерти болуп, униңда атақлиқ сәнъәткарниң тәкливи билән уйғур жигит Расул Һосманов https://parvaz.kz/index.php/rasul-usmanov ана тилида «Мәҗнунтал» нахшисини орунлап бәрди. Бу иҗтимаий торларда һәрхил пикирләрни һасил қилди. Болупму Расулниң достиниң миллитимиз намиға ейтқан иллиқ ләвзи оқурмәнләрдә қизиқиш вә қизғиниш отлирини һасил қилғини һечким үчүн сир әмәс.

Бәхтишат СОПИЕВ,

«Uiğur avazi»  гезити, 25.05.23

Концерт давамида Димаш: «Биз, қазақлар, бағримиз кәң, наһайити меһриван хәлиқ. Көпмилләтлик елимиздә, худди бизгә охшаш, меһир- муһәббити чәксиз әҗайип милләт бар. У – уйғурлар. Мениң йеқин достум Расул Һосманов әйнә шу милләтниң вәкили. Мән әйнә шу сәнъәтсөйәр хәлиқниң «Мәҗнунтал» намлиқ нахшисини сөйүп тиңшаймән. Пурсәттин пайдилинип, әшу нахшини ағинәмниң орунлап беришини халиған болар едим. Тамашибинларниң мени қоллайдиғиниға ишәнчим камил. Достум, қени бу яққа кәл...» дәп микрофонни Расулға бәрдидә, өзи синтезаторда нахшиға тәңкәш қилишқа башлиди.

– Күтүлмигән бу тәклиптин аң-таң болғиним раст. Чүнки концертниң программисида бу нахша йоқ еди, – дәйду Расул биз билән болған сөһбәттә. – Дәсләп Димашни, адәттикидәк, һәзиллишиватиду дәпму ойлидим. Лекин у мениң сәһниниң төригә келишимни қәтьий тәләп қилди. Униң бу тәкливини, әлвәттә, рәт қилалмидим. Нахшини бар вуҗудум билән орунлашқа тириштим. Димаш жигирмә миң тамашибинниң алдида уйғурларни тилға елип, маңила әмәс, хәлқимгә өзиниң сәмимий достлуғини изһар қилди. У күнки концерт, у дәқиқә мениң жүригимдә мәңгү сақлинип қалиду. Нахша түгиши билән, қучиғимни кәң ечип, Димашни бағримға мәккәм бесип, униңға өзәмниң һәм хәлқимниң миннәтдарлиғини изһар қилдим. Пүтүн зал гүлдүрлигән алқишлар билән орунлиридин туруп, чуқиришип кәтти. Тәрәп-тәрәптин «Ярайсән, Димаш!», «Ярайсән, Расул!» дегән авазларни аңлидим. Узақ яңриған алқишлар икки хәлиқниң достлуғини, инақлиғини мәдһийилигәндәк билинди, маңа.

Расул ейтқандәк, бизму бу көрүнүшни тамашә қилғанда, әң алди билән Димашқа апирин ейттуқ. Иҗтимаий торларда һәрхил милләт вәкиллири Димашниң бу һәрикитигә өзлириниң иҗабий пикирлирини йезип қалдурупту. «Бүгүнки күндә Димаш – түрлүк милләтләрниң бешини қошуватқан йоруқ юлтуз. У хәлиқара сәһнидә достлуқни, иттипақлиқни тәрғип қиливатқан течлиқ мәшьили» дәп йезипту Алена исимлиқ россиялик.

«Расулниң нахша ейтқини – милләтларара достлуқниң әң ярқин бир көрүнүши болди», дәп йезипту түркиялик бир қериндишимиз.

Мошуниңға охшиған нурғунлиған иҗабий изаһларни оқуғансири, сәнъәттә чегариниң йоқ екәнлигигә, йәнә бир мәртә көз йәткүздуқ.

– Димаш билән тонушқан күнләрдин башлап униң нәқәдәр кичикпейил, хушчақчақ, меһриван инсан екәнлигигә көз йәткүзгән едим, – дәйду Расул сөһбитимизни давамлаштуруп. – Биз өй ичи биләнму қоюқ арилишимиз. У бизниң таамлиримизниму қәвәтла яхши көриду. Димаш Алмутиға йоли чүшүп қалса, бизниң өйдин ләңмән яки қаймақлиқ әткәнчайдин дәм тартмай кәтмәйду. Дәстихан әтрапида олтирип, иккимиз узақ муңдишимиз. Униң билән түрлүк мавзуларда мулаһизә жүргүзүш мүмкин. Уйғурниң нахша-сазлириниму һөзүрлинип тиңшайду. Димашниң ата-анилири Қанат аға билән Света тәтему әҗайип дилкәш, меһмандост инсанлар. Мәнму уларниң дәстихинида талай қетим олтарғанмән.

Йәнә бир қошумчә қилидиған йери, бүгүн – Димашниң туғулған күни. У 29 яшқа кирди. Биз, пурсәттин пайдилинип, Димаш Қудайбергенни «Уйғур авази» гезитиниң барлиқ оқурмәнлири намидин туғулған күни билән қизғин тәбрикләп, униңға иҗадий утуқ тиләймиз.

ИЛАВӘ: Димаш Қудайберген дуния әһлигә қандақ тонулди? У 5 йешидин фортепианида ойнашқа башлайду. Димаш А.Жубанов намидики музыкилиқ колледжиниң, Қазақ Миллий сәньәт университетиниң түлиги. У серб, итальян, француз, инглиз, рус, хәнзу вә башқа тилларда нахша ейтиду.

Даңлиқ иҗрачиниң сәнъәттики дәсләпки утуғи: 2010-жили «Байқонырдың Әсем дауыстары» хәлиқара фестивалида баш мукапатни йеңивалиду. 2012-жили “Жас қанат” яш иҗрачилар конкурсида Гран-приға егә болиду. Шундақла шу жили “Восточный базар” хәлиқара конкурсиниң, 2013-жили “Мейкин Азия” І хәлиқара фестивалиниң, Витебск шәһиридә өткән XXIV эстрада нахшичилириниң «Славян базири-2015» хәлиқара конкурсиниң, Стамбулда өткән “Abu TV” хәлиқара фестивалиниң ғалиби.

Димаш 2017-жили Хитайда өткән «I’am singer» лайиһисигә қатнашқандин кейин, униң исми техиму кәң тонулушқа башлайду.

2003-жили нахшичи Мэрайа Кэри АҚШниң гимнини 7-октавилиқ Cи нотисида орунлап, рекорд яратти. Арида 4 жил өтүп, нахшичи Адам Лопез C8 нотисида, йеңи рекорд орнитиду. Һә, Димаш Қудайберген 7 октавиға тегишлик Фа нотиси арқилиқ пүтүн дунияни өзигә қаратти.

Димашниң Нью-Йорк шәһиридә өтидиған «Arnau tour ENVOY» концертиға билетлар бир йерим саатниң ичидә сетилип кәткән. Билетларниң 75 пайизини америкилиқлар сетивалған.

https://uyguravazi.kazgazeta.kz/news/49282