Вариссиз һечқандақ паалийәтниң давами болмайду.
14-сентябрь, йәкшәнбә күни, Қ.Ғоҗамияров намидики җумһурийәтлик дөләт академиялик Уйғур музыкилиқ комедия театриниң алдидики мәйдан алаһидә җәзбдарлиғи билән пәриқләнди. Кәчкә йеқин яңрашқа башлиған нағра-карнайларниң садаси әтрапни ләрзигә селип, кәспий уссулчилар билән театрниң йеңи мәвсүминиң ечилишиға кәлгән меһманларниң бәзидә айрим, бәзидә беқишип иҗра қилған уссуллири көпчиликниң мәйрәмлик кәйпиятидин далаләт берип туратти. Миллий сәнъәт дәргаһиниң новәттики 92-мәвсүми әйнә шундақ дағдуғилиқ башлинип, андин бена ичидә давамлашти. Бу йәрдиму тамашибинларни сазәндиләр хәлқимизниң йеқимлиқ нәғмә-навалири билән күтүвалди. Бир хошал боларлиғи, у күни театрниң тамашибин зали адәмләргә лиқ толди. Һәтта, балконлардиму орун қалмиди.
Җамаәт җәм болғандин кейин Уйғур театриниң мудири, Қазақстанниң хизмәт көрсәткән әрбаби Дилмурат Баһаров, Қазақстан хәлиқ артисти Реһангүл Мәхпирова вә Қазақстанниң хизмәт көрсәткән әрбаби Алимҗан Әйсаевлар сәһнигә көтирилип, 92-мәвсүмниң ечилишиға мунасивәтлик иллиқ тиләклирини изһар қилди. Өз новитидә театрниң бәдиий рәһбири Фархадбек Қанафин көпчиликни Қазақстан Җумһурийитиниң Мәдәнийәт вә әхбарат министри Аида Балаеваниң йеңи мәвсүмниң ечилишиға бағлиқ йоллиған тәбрикнамиси билән тонуштурди. Андин тамашибинлар хәлқимизниң җасур қизи болған Назугумниң еғир тәғдиригә беғишланған «Назугум» спектаклини тамашә қилди.
Йеңи мәвсүмниң ечилиши һәрқандақ театр үчүн һәржили әмәлияттин өз ипадисини тепип келиватқан әнъәнивий йеңилиқ болғини билән, мәвсүм даирисидә әмәлгә ашурулидиған ишлар, қолға кәлтүрүлидиған утуқ-муваппәқийәтләр һечқачан охшаш болмиған. Шуңлашқа, һәрбир мәвсүм театр жилнамисиниң йеңи сәһиписи болуп һесаплиниду. Қуддус Ғоҗамияров намидики җумһурийәтлик дөләт академиялик Уйғур музыкилиқ комедия театриму буниңдин истисна әмәс. Ушбу сәнъәт дәргаһиниң паалийитини турақлиқ күзитип келиватқан тамашибинлиримиз, әлвәттә, буни яхши чүшиниду һәм улар йеңи мәвсүмниң ечилишини һәм шу җәриянда қандақ йеңилиқларниң болидиғанлиғини тәқәзалиқ билән күтиду. Бүгүнки мақалиниң йезилишиға түрткә болған асасий сәвәпму әйнә шу.
Бирақ, «Өтмүшсиз келәчәк йоқ» демәкчи, биз йеңи мәвсүм һәққидә сөз қилиштин авал, театр коллективиниң өткән мәвсүмдә қолға кәлтүргән утуқ-муваппәқийәтлиригә, гәрчә улар тоғрилиқ өз вақтида иҗтимаий торларда вә аммивий әхбарат васитилиридә әхбаратлар берилгән болсиму, йәнә бир қетим қисқичә тохтилип өтүшни әқилгә мувапиқ көрүватимиз. Сәвәви, уларниң һәрбири – алаһидә тәрипләшкә әрзийдиған, тәкрар-тәкрар ейтилсиму, маһийитини йоқатмайдиған тарихий әһмийәткә егә йеңилиқлардиндур.
Умумән, театр коллективи үчүн 91-мәвсүмниң интайин утуқлуқ өткәнлигини алаһидә мәмнунийәт билән тилға елишқа әрзийду. Униңға шу җәриянда, йәни 2024-жилниң сентябрь ейидин 2025-жилниң июнь ейиғичә болған арилиқта театр һаятиға мунасивәтлик йүз бәргән йеңилиқлар гувалиқ қилиду дәп ойлаймиз. Мәсилән, мәвсүмниң бешида театримиз Қарағанда шәһиридә ХІІІ «DosStar» хәлиқара очуқ оперетта вә мюзикл фестивалиға У. Гаджибековниң «Аршин мал алан» (режиссери Әзиз Искәндәров) спектакли билән қатнашти. Униңда баш рольларни иҗра қилған Ризат Мамутов билән Эмина Рәхмәтҗан иҗрачилиқ маһаритиниң жуқурилиғи түпәйли фестивальниң гала-концертида нахша ейтиш пурситигә муйәссәр болуп, мәхсус диплом билән тәғдирләнди.
Әнди көрнәклик қазақ сатириги Көпен Әмирбекниң туғулғининиң 75 жиллиғиға даир Чимкәнт шәһиридә уюштурулған «Шымкент Думан» җумһурийәтлик һәзил-күлкә фестивалида болса, бизниң сәнъәткарлиримиз 1-орунға вә Көпен Әмирбек намидики мәхсус мукапатқа егә болуп, 700 000 вә 300 000 тәңгә көләмидики ахчилиқ тартуқларға еришти.
Мундақ утуқларниң йәнә биригә Нартай Бекежанов намидики Қизилорда вилайәтлик қазақ академиялик музыкилиқ драма театриниң 70 жиллиғиға даир уюштурулған СССР хәлиқ артисти Сәбира Майқанова намидики «Сырдың Сәбирасы» І хәлиқара театр фестивалида қол йәткүзүлди. Униңға театримиз «Мән йоқ йәрдики мениң һаятим» (инсценировка муәллипи Гүлим Қалимат, режиссери Ақерке Жаңабай) намлиқ моноспектакль билән қатнишип, драма артисти Аминәм Үсәнова «Әң яхши аял роли» номинацияси бойичә зәпәр қучти вә 300 000 тәңгә көләмидики ахчилиқ соға билән мукапатланди.
Мошу йәрдә театрниң фестивальларға иштрак қилиш мәсилисигә мунасивәтлик азду-тола пикир билдүрүп қойсақ, әйни мәхсәттин анчә чәтнәп кәткәнлик болмас. Чүнки, асасий гәп театр вә униң истиқбали һәққидә болуватқачқа, ушбу мәсилиниңму униңға беваситә мунасивити бар дәп ойлаймиз.
Мәлумки, биз әйнә шуниңға охшиған чоң-кичик фестиваль-көрүкләр арқилиқ һәрқандақ театрниң иҗадий иқтидарини, кәспий дәриҗисини ениқлаш мүмкинчилигигә егә болимиз. Сәвәви, мундақ чарә-тәдбирләргә, асасән, өз кәспиниң қир-сирлирини яхши өзләштүргән илғарпикирлик мутәхәссисләр җәлип қилиниду. Йәни, фестивальда униңға қатнишиватқан сәнъәткарлар маһаритини һәрхил кәсип егиси болған аддий тамашибин әмәс, сәнъәт саһасиниң салаһийәтлик мутәхәссислири баһалайду дегән сөз. Шуңлашқа, биз ундақ чарә-тәдбирләрдин өзимизни чәткә тартмаслиғимиз керәк. Әксичә, мүмкинқәдәр көпирәк қатнишишқа, башқилар билән өзүмизни селиштуруш арқилиқ күчимизни синашқа, камчилиқлиримиз болса, орнини толтурушқа, шу арқилиқ миллий сәнъитимизни риваҗландурушқа интилишимиз лазим.
Хош, әнди үзүлүп қалған гепимизни давамлаштурайли. Өткән мәвсүмдә Қурманғази намидики Қазақ миллий консерваторияси билән һәмкарлиқта тәйярланған СССР хәлиқ артисти, СССР вә Қазақстан ССР Дөләт мукапатлириниң лауреати Қуддус Ғоҗамияровниң әсәрлиридин түзүлгән «Йеңичә яңриған аһаңлар» намлиқ концертму тамашибинлиримиз үчүн күтүлмигән соға болди, дәп ойлаймиз. Сәвәви, мәшһур композиторниң исми билән атилидиған миллий сәнъәт дәргаһида мошу күнгә қәдәр униң һаят-паалийитигә беғишланған мундақ чоң чарә-тәдбирниң уюштурулғанлиғи ядимизда йоқ. Буниңдин башқа Қазақстан хәлиқ язғучиси Зия Сәмәдийниң туғулғининиң – 110 вә Қазақстан хәлиқ артисти Зенәтгүл Әкбәрованиң туғулғининиң 90 жиллиғиға даир өткүзүлгән хатирә кәчлириму көпчиликниң иллиқ ихласини ойғатти.
Әлвәттә, жуқуридикидәк шанлиқ сәнәлирини, тәвәллудлирини кәң миқияста атап өтүшкә әрзийдиған башқиму ярқин сималарниң хәлқимиз арисида бар екәнлигини инкар қилмаймиз. Бирақ уларниң һәммисигә көңүл бөлүшкә дөләт мәблиғи һесавиға мәвҗут болуп келиватқан мәһкиминиң мүмкинчилиги һәрдайим яр беривәрмәйдиғанлиғини, сәнъәт дәргаһиниң асасий вәзиписи көпэтнослуқ Қазақстанниң мәдәнийитини, шу җүмлидин миллий сәнъитимизни гүлләндүрүштин ибарәт екәнлигини әсла әстин чиқирип қоюшқа болмайду.
Өткән мәвсүм ичидә йүз бәргән ейтмасқа болмайдиған хошаллиқларниң йәнә бири – у сәнъәт саһасида узақ жиллар давамида үнүмлүк хизмәт қилип келиватқан бирқатар пешқәдәм сәнъәткарлар әмгигиниң мунасип баһалиниши. Мәсилән, атақлиқ сәһнә маһири Реһангүл Мәхпирова – «Қазақстанниң хәлиқ артисти», көрнәклик актер Ғәйрәт Тохтибақиев билән театрниң баш рәссами Рустәм Мусаев «Қазақстанниң хизмәт көрсәткән әрбаби» дегән пәхрий атақларға егә болса, Қазақстанниң хизмәт көрсәткән әрбаби Алимҗан Әйсаев «Парасат» ордени билән тәғдирләнди. Бу – пәқәт 91-мәвсүм җәриянидила алий дәриҗилик мукапатларға муваппәқ болғанлар. Әнди кейинки икки-үч жилни алидиған болсақ, ундақларниң сани хелә көпчиликни тәшкил қилиду. Ойлап қарисақ, шунчә қисқа вақит ичидә бир коллективтин ондәк хадимниң мундақ пәхрий атақ вә мукапатларға қол йәткүзүши, һәқиқәтән, чоң утуқ болуп, униң пәқәт сәнъәткарларғила әмәс, бәлки барчә уйғур хәлқигә билдүрүлгән сий-илтипат екәнлиги рошән сезилип туриду. Шуниң үчүн, мошу пурсәттин пайдилинип, миллий сәнъитимизни риваҗландуруш йолида хизмәт қиливатқанларниң әмгигини етибарсиз қалдурмай, мунасип баһалап келиватқан Дөләт рәһбиригә, Қазақстан Җумһурийитиниң Һөкүмитигә, җүмлидин Мәдәнийәт вә әхбарат министрлигигә хәлқимиз намидин миннәтдарлиқ билдүргүмиз келиду.
Буниңдин башқа һәрхил җәмийәтлик тәшкилатларниң, идариләрниң диплом, пәхрий ярлиқ вә маддий соғилириға еришкән хадимлиримизму аз әмәс. Шуларниң ичидә истедатлиқ яш актер Муһидин Варисовниң өткән мәвсүмдә көпчиликниң аваз бериши арқилиқ ениқлинидиған Қазақстанниң мәдәнийәт вә сәнъәт саһасидики «8-Freedom Ticketon Awards» мукапитиниң «Әң яхши театр актери» номинацияси бойичә ғалип чиққанлиғини алаһидә пәхирлиниш билән тилға елишқа әрзийду.
Әлвәттә, қолға кәлтүрүлгән һәрқандақ утуқ у пәқәт пәхирлинишкила яки һаяҗанлинишқила сәвәп болуп қалмастин, шуниң билән биллә, мәлум дәриҗидә җавапкәрлик, ишәнч жүкләйдиғанлиғиму чүшинишлик. Шуңлашқа театр коллективиниң йеңи мәвсүмдә техиму көп издинип, көпчиликниң үмүт-еқидисини ақлашқа, кәспий дәриҗисини төвән чүшәрмәй, йәниму тәкаммуллаштурушқа тиришип әмгәк қилидиғанлиғи тәбиий. Гепимизни әнди шу йөнилиштә давамлаштурайли.
Мәлумки, Уйғур театриниң йеңи 92-мәвсүми 14-сентябрь, йәкшәнбә күни Қазақстанниң хизмәт көрсәткән әрбаби Әзиз Искәндәровниң режиссерлуғида сәһниләштүрүлгән «Назугум» (Турған Тохтәмовниң романи асасида инсценировкисини тәйярлиған Гүлбаһар Насирова) спектакли билән башланди. Бу йәрдә «Немишкә «Назугум» билән?» дегән соал туғулуши мүмкин. Сәвәви, иқрар қилиш керәкки, узун жиллар давамида театрниң йеңи мәвсүмини «Анархан» спектакли билән ечиш әнъәниси шәкилләнгән еди. Лекин, кейинки жилларда биз мәвсүмни, имканқәдәр, шу жилдики бирәр шанлиқ вақиәгә яки сәнәгә мунасивити бар әсәр билән ечишни әқилгә мувапиқ дәп тепип, шуниңға әмәл қилип келиватимиз. Мәсилән, театрниң бултуқи мәвсүми улуқ әлламә Маһмут Қәшқәрийниң «Дивану луғәтит түрк» әсәриниң йезилғининиң 950 жиллиғиға даир «Маһмут Қәшқәрий» спектакли билән ечилған еди. Бийилзә «Назугум» тарихий романиниң муәллипи Турған Тохтәмовниң туғулғиниға 85 жил болди. Шуниң үчүн йеңи мәвсүм пәрдисини мәзкүр спектакль билән ечишни тоғра көрдуқ. Бирақ, бу һәргизму «Анархандин» тамамән «ваз кәчкәнлик» әмәс. Миллий сәһнимизниң «тунҗа пәрзәнди» болған «Анархан» спектаклиниң биз үчүн әһмийити чоң вә униң кәлгүсидиму классик әсәр сүпитидә тамашибинлар диққитигә йәнә тәғдим қилинидиғанлиғи муқәррәр.
Йеңи мәвсүмдә көпчиликни әйнә шуниңдәк театр репертуаридин турақлиқ орун алған бирқатар қоюлумлар билән биллә йеңи премьериларму күтүватиду. Мәсилән, алдимиздики икки-үч айниң ичидә тамашибинлиримиз либреттосини Сәйпидин Мамут иҗат қилған «Ананурхан» миллий балетиниң, яш драматург Илһамҗан Лохмановниң қәлимигә мәнсүп «Бекәт» (режиссери Бәхитҗан Авдунов) вә көрнәклик язғучи-драматург Шайим Шаваевниң «Сениң қара көзлириң» (режиссери Фархадбек Қанафин) намлиқ спектакльлириниң премьерилирини тамашә қилиш пурситигә егә болиду. Бүйүк мутәпәккүр Абай Қунанбаевниң туғулғининиң 180 жиллиғиға даир режиссер Дилмурат Җамбақиев тәрипидин тәйярлиниватқан қоюлумму кәң амминиң көңлидин чиқиду дәп ойлаймиз. Буниңдин башқа, бийил туғулғиниға 90 жил болған көрнәклик бәстикар Зәйнуллам Сетәковниң иҗадидин елинған нахшилардин түзүлгән, шундақла һәрхил муқам парчилиридин тәшкил қилинған концерт программилириниңму сәнъәтхумар хәлқимизгә роһий озуқ беғишлайдиғанлиғиға ишәнчимиз камил. Шундақла сәнъәткарлиримиз, жилдиқидәк бийилму Җумһурийәт күнидә тамашибинларға мәрикилик концерт һәдийә қилса, Йеңи жилда уларниң көңлини «Тәбәссүм» һәзил-күлкә кечилиги арқилиқ көтиришкә тиришиду.
Көпчиликниң театрға мунасивәтлик билгүси келидиған мәсилиләрниң йәнә бири – у гастрольлуқ паалийәт. Әлвәттә, җай-җайларға, җүмлидин уйғурлар зич олтирақлашқан шәһәр, наһийәләргә берип, Алмутиға келиш мүмкинчилиги йоқ тамашибинлар үчүн қолайлиқ шараит яритишниң қанчилик муһим әһмийәткә егә екәнлигини бизму яхши чүшинимиз. Мәсилән, булту Жетису вилайитиниң Панфилов, Алмута вилайитиниң Уйғур, Әмгәкчиқазақ наһийәлиригә уюштурулған гастрольлуқ сәпәрләр интайин утуқлуқ өткән еди. Амма, кейинки вақитларда ихтисадий мәсилигә вә заманивий тәләпләрниң өзгириватқанлиғиға мунасивәтлик сан җәһәттин хелә көпчиликни тәшкил қилидиған сәнъәткарларни бир йәргә елип чиқишниң өзи қийин болуп кәтти. Шуңлашқа, гәрчә, йеңи мәвсүмдә гастрольлуқ сәпәргә чиқиш оюмизда болсиму, һазирчә бу тоғрилиқ еғиз ачмай турайли.
Өз новитидә бу театр паалийитиниң пәқәт оюн-тамашә, утуқ-муваппәқийәтләрдинла тәшкил тапмайдиғанлиғидин далаләт бериду, дәп ойлаймиз. Һәқиқәтән, башқа мәһкимә-идариләргә охшашла, биздиму һәл қилинишини күтүватқан мурәккәп мәсилиләр мәвҗут. Мәсилән, шундақ туюқ мәсилиләрниң бири – кадр тапчиллиғи. Мундақ муәмма һазирқи вақитта хәлқимизгә мунасивәтлик һәммила иш орунлирини хаватирландуруватқан болса керәк. Йошурушниң һаҗити йоқки, биз әйнә шу сәнъәт саһасиниң қир-сирлирини йетүк өзләштүргән истедат егилириниң йоқлуғидин қоюшқа тегишлик болған бәзибир классик әсәрләрни сәһниләштүрәлмәйватимиз, дилимизға пүккән арзу-арманлиримизни рояпқа чиқиралмайватимиз. Мана мошу камчилиқниң орнини толтуруш мәхситидә, илгири хәвәр қилғинимиздәк, Қурманғази намидики Қазақ миллий консерваторияси билән Уйғур театриниң арисида өзара һәмкарлиқ меморандуми имзалинип, униң даирисидә мәзкүр билим дәргаһида «Музыкилиқ театр артисти» мутәхәссислиги бойичә уйғур бөлүмини ечиш қолға кәлтүрүлгән еди. Буниңдин башқа Ж.Елебеков намидики җумһурийәтлик Эстрада вә цирк колледжи билән П.Чайковский намидики музыкилиқ колледжиму миллий сәнъитимизгә қизиққучиларниң кәспий билим елишиға мүмкинчилик яритишқа келишкәнди. Шуниңға мунасивәтлик театримизда мәхсус топ қурулуп, хелә вақиттин бери тәшвиқат ишлирини жүргүзгәнлигиму һечким үчүн сир әмәс. Амма, қизиққучиларниң сани интайин аз болуп, бу ишниң нәтиҗиси биз күткәндикидәк болмиди. Башқичә ейтқанда, Қазақстан һөкүмити яритип бериватқан мүмкинчиликләрни тоғра пайдилиналмидуқ. Шуниң ақивитидин, уйғур пәрзәнтлири үчүн алий вә мәхсус оқуш орунлирида аҗритилған орунларниң көпчилиги бош қалди. Болупму, балиларниң ерәңсизлиги, ата-аниларниң пәрзәнтлириниң тәғдиригә бепәрвалиқ билән қарайдиғанлиғи, умумән, хәлқимизниң ғапиллиғи бизни қаттиқ ечиндурди.
Мәлумки, өткән һәптидә Қазақстан Җумһурийитиниң Президенти Қасим-Жомарт Тоқаев җамаәтчиликкә «Сүнъий әқил дәвридики Қазақстан: актуал вәзипиләр вә уларни рәқәмлик трансформация арқилиқ һәл қилиш» намлиқ Мәктүбини йоллиди. Униңда Дөләт Рәһбири «Биз илгири ким болғинимизни унтумаймиз. Тарихимизға һөрмәт билән қараймиз. Әнди келәчәктә ким болидиғинимизниң пәқәтла өз қолумизда екәнлигини яхши чүшинимиз. Шуңлашқа илим-пәнгә, билимгә интилидиған, елини гүлләндүрүшни ойлайдиған яшларни һәрдайим кәңдаиридә қоллап-қувәтләватимиз. Биз қолға алған кәңдаирилик ишлар яшларниң парлақ келәчиги үчүн қилинмақта. Яш әвлат келәчәктә буниң мевисини көриду, уни көпәйтип, давамлаштуриду» дәп очуқ ейтти.
Һәқиқәтән шундақ. Һазир елимиздә яшларниң билим елишиға, йеңилиқ ечип, кәшип қилишиға, иҗадийәт яки башқа бир мәшғулат билән шуғуллинишиға һечқандақ тосалғу йоқ. Әксичә, һәммила саһаларда улар рәғбәтләндүрүлүп, алаһидә қоллап-қувәтләшкә егә болмақта. Бирақ шундақ болушиға қаримастин, биз немишкә техичә беғәм жүрүватимиз? Әгәр әһвал мошундақла болса, йеқин келәчәктә миллий сәнъитимизни (пәқәт сәнъитимизнила әмәс, һәммила қәдрийәтлиримизни) риваҗландуруш бу яқта турсун, һәтта бүгүнки қелипида сақлап қелишқа қувитимиз йәтмәй қалиду. Сәвәви, вариссиз һечқандақ паалийәтниң, һәтта һаятниңму давамлашмайдиғанлиғини һәммимиз яхши билимиз. Шуңлашқа, бу – бир шәхсниң яки бирәр мәһкиминиңла зиммисигә жүкләп қойидиған вәзипә әмәс. Уни, маһийитигә чоңқур чөккән һалда, һәммимиз биллә һәл қилишимиз керәк. Шу чағдила биз көзлигән арзу-арманлиримизни рояпқа чиқиралаймиз, жуқури пәллиләргә қол йәткүзәләймиз.
Дилмурат БАҺАРОВ,
Қ.Ғоҗамияров намидики җумһурийәтлик дөләт академиялик Уйғур музыкилиқ комедия
театриниң мудири,
Қазақстанниң хизмәт
көрсәткән әрбаби.
Даңқи дилларда дастан
Қәләм алдим қолумға мәғрур, Қуддус,
Болғачқа вуҗудумда ғурур, Қуддус,
Язай мән билгинимчә учур, Қуддус,
Чүнки сән әлгә болған мәшһур, Қуддус!
Яд әтмәк талантларни бәкму дурус,
Сени билгән қазақ, қирғиз, өзбәк һәм рус,
Кеңәш елидә болдуң гоя Штраус,
Сәнъәт дәп көкрәк кәргән батур, Қуддус!
Яңрайду есил сазиң Тәңритағдин,
Етиздин, хаң-хамандин, гүлшән бағдин,
Шаирға илһам-булақ нәччә чағдин,
Беғишлар хуш кәйпият, һузур Қуддус!
Дәсләпки симфония у Ризвангүл,
Сехирлиқ саздин гоя сән тизған гүл,
Рәссам кәби қәлбләргә һәм сизған гүл,
Вә лекин болмидиң тәкәббур, Қуддус!
Язған едиң опера Назугумни,
Таңларға улап қанчә түн-гугумни,
Әл қәлбигә йәткүзүп бу уқумни,
Чаңқиған дилларға сән ямғур, Қуддус!
Һәм дәсләп язған балет у Чин Төмүр,
Дәвир үчүн бу жанр болғач зөрүр,
Парлидиң чолпан болуп та бир өмүр,
Әл ичидә намиң гоя җасур, Қуддус!
Иҗат қилдиң романс вә сюитини,
Ялқунлитип, улғайтип һәм күй отини,
Әмгәк қилдиң бошатмай бәл, потини,
Иҗадиңда көрүнмәс хусур, Қуддус!
«Чин муһәббәт мәңгү өчмәс чирақ» дедиң,
«Бу ахшам» янған сөйгү-пирақ дедиң,
Кәтмәймән дияримдин жирақ дедиң,
Қазақстан сөйгүси чоңқур, Қуддус!
Бәк қоллиған сени Латиф Хамиди,
Һәмдәм болған Еркеғали Рахмади,
Нахшаңға җан бәрди Абдрим Әхмәди,
Талантиңдин чечилған зәр-нур, Қуддус!
Ректор болдуң, узун жил болдуң рәһбәр,
Яшидиң күлүп һаман аддий, кәмтар,
Әҗриң билән қучтуң талай-талай зәпәр,
Махтап язсам аз болур миң қур, Қуддус!
Театрға берилди қутлуқ намиң,
Өчмәйду шуңа қучқан шәрәп-шаниң,
Сәнъәттин өзәң яққан чирақ-шамиң,
Яңрар мәңгү дутар,нәй, тәмбир, Қуддус!
Тәр төктүң һәр жанрда өзәң дәсләп,
Саңа болған еһтирам қалмас пәсләп,
Қолумдин кәлгиничә яздим әсләп,
Мәнла әмәс, әсләйду бар уйғур, Қуддус!
ШӘМСИМУҺӘММӘД
https://uyguravazi.kazgazeta.kz/news/53598
|
