Тунҗа Президент күни мәйрими һарписида Уйғур театрида миллий сәнъитимизни тәрәққий әткүзүш вә унтулуватқан нахша-уссуллиримизни әслигә кәлтүрүш мәхситидә елан қилинған конкурсниң йәкүни чиқирилди.

«Бирлик» җәмийәтлик фонди, «Инайәт» ассоциацияси вә чимкәнтлик тиҗарәтчи Ярмәһәмәт Искәндәровниң уюштуруши, шундақла Уйғур театриниң қоллап-қувәтлиши билән өтүватқан мәзкүр конкурсниң шәрти бойичә, униңға иштрак қилған ансамбльға бир муқам, бир йеңи нахша орунлап, халиған саз әсвавида йәккә саз иҗра қилиш жүкләнди.

Бирдинла шуни ейтиш керәкки, у күни конкурсқа иштрак қилған һәвәскар сәнъәткарлардин тәркип тапқан йәттә ансамбль сәнъәт бәйгисиниң бу шәртлириниң һәммисигә әмәл қилған һалда, өз һүнәрлирини намайиш қилди, һәтта бәзилири ашурувәтти десәкму, болиду. Конкурста дәсләпкиләрдин болуп сәһнигә чиққан Алмута шәһири Дружба мәһәллисиниң «Дилраба» ансамбли (рәһбири Тайирҗан Баратов) тоғрилиқ әйнә шундақ дейишкә болиду. Бу сәнъәткарларниң сәһнигә орунлишиши бизгә, атақлиқ рәссам Ғази Әмәтниң атақлиқ «Он икки муқам» әсәрини әсләтти.

Атақлиқ сәнъәткарлар Азитим Бурһанов (рәиси), Нуралим Варисов, Марат Норузов, Нураләм Қурванбақиева вә шаирә Патигүл Мәхсәтовадин тәркип тапқан қазилар топи йәттә ансамбльниң бәшини мукапатлиқ орунларға лайиқ дәп тапти. Конкурсниң баш мукапити — Гран-Прини (750 миң тәңгә) «Яркәнт наваси» ансамбли елишқа сазавәр болди. Маливайлиқ һәвәскарлар — биринчи (450 миң тәңгә), Өзбәкстанниң «Гүлдәстә» ансамбли — иккинчи (225 миң тәңгә), «Дилраба» ансамбли билән П.Чайковский намидики музыкилиқ колледжниң студентлири үчинчи (100 миң тәңгидин) орунға еришти.

Мукапатларни тапшуруш үчүн сәһнигә көтирилгән мәзкүр конкурсни уюштурғучилар «Бирлик» җәмийәтлик фондиниң президенти Адилҗан Зәйнавдун, «Инайәт» ассоциациясиниң мудири Турғанҗан Розахунов, тиҗарәтчи Ярмәһәмәт Искәндәров һәвәскар сәнъәткарларниң талантиға апирин ейтип, келәчигигә ақ йол тилиди.

Бәхтишат СОПИЕВ.

Алмута шәһири.

СҮРӘТТӘ: баш мукапат — «Яркәнт навасида».

http://uyguravazi.kz/?p=5493