«Уйғур авази» гезити - «Ирадә» дуниявий сәнъәт фестивалиға қатнишиду.

Хуш хәвәр

Исми кәң җамаәтчиликкә мәлум болған сахавәтлик әр-аял тиҗарәтчиләр Дилшат Насиров билән Сүрийәм Һезимоваларниң беваситә тәшәббуси һәм һамийлиғи түпәйли вуҗутқа кәлгән «Ирадә» нахша-уссул ансамбли үчүн бийилқи жилиму һәркимни хошал қилғидәк муваппәқийәтләр билән өтүватиду.

Мәсилән, май ейида Қирғиз Җумһурийитидә иҗадий сәпәрдә болуп қайтти. Бишкек шәһиридә башланған бу сәпәр Ош вилайитиниң Қәшқәр қишлақ йезиси билән Өзгән шәһиридә, Җалалабад вилайитиниң Җалалабад шәһиридә вә Чу вилайитиниң Тоқпақ шәһиридә зор муваппәқийәтләр билән давамлашти. Ансамбль коллективи у йәрләрдики қан-қериндашлиримизниң өзиниң миллий сәнъитигә болған тәшналиғини қанаәтләндүрүпла қоймай, ахирқи вақитларда үзүлүп қелишқа йүзләнгән қериндашлиқ риштилиримизниң яңливаштин әслигә келишигиму мәлум дәриҗидә тәсир көрсәтти. Мана шуңлашқа Қирғизстандики уйғурлар «Ирадини» хошал күтүвелип, қиймай туруп узитип қойди.

Мошу күнләрдә ансамбль әзалири алаһидә бир һаяҗанлиқ пәйтни баштин кәчүрүватиду, йәни Сәмәрқәнд шәһиридә бийил 24-август күни өтидиған дуниявий сәнъәт фестивалиға қатнашмақчи. Әгәр бу чоң сәнъәт көрүгигә сәксән мәмликәтниң сәнъәткарлири иштрак қилип, өзара күч синишидиғанлиғини әскә алидиған болсақ, һаяҗанланмай мүмкин әмәс.

— «Ирадә» ансамблини қуруштики асасий мәхсәт-муддиа уйғурниң бай вә қедимий сәнъитини дуния сәһнисигә елип чиқиш еди. Бу җәһәттин дәсләпки қәдәмлиримиз оңушлуқ болуватиду дәп ойлаймән. Әнди Сәмәрқәнд фестивалиға келидиған болсақ, бу ансамблимиз үчүн чоң синақ, — дәйду Дилшат  билән Сүрийәм.

Биз «Ирадә» ансамблиға әшу фестивальдин олҗилиқ қайтишиға тиләкдашлиқ билдүримиз.

Нурәхмәт ӘХМӘТОВ.

Яркәнт шәһири.

http://uyguravazi.kz/?p=9446&page=2