«Уйғур авази» гезити ,  май 2014 ж.

Өткән һәптидә Қ.Ғоҗамияров намидики җумһурийәтлик дөләт Уйғур музыкилиқ комедия  театрида «Үмүтлүк дуния» бәдиий фильмини тонуштуруш мәрасими болуп өтти. Униңға зиялилар, җамаәтчилик вәкиллири, мошу фильмға чүшкән бирқатар актерлар қатнашти.Мәлумки, бу фильм «ART-UR Productіon» продюсерлиқ мәркизиниң мудири Артур Илахунов вә Ихтиер Рәҗәповниң тәшәббуси билән чүширилгән. Фильм режиссери — Мирза Әзизов. Сценарий муәллиплири — шаирә Патигүл Мәхсәтова вә Өзбәкстан Җумһурийитиниң хизмәт көрсәткән әрбаби Мирза Әзизов.

Фильмниң вақиәлиги муһәббәт, вападарлиқ, достқа садиқлиқ чүшәнчилири асасида түзүлгән. Униңдин ташқири, миллий тарихимизға аит көрүнүшләрму бар. Алаһидә тәкитләш керәкки, фильм операторлуқ иш, аваз бериш, көрүнүшләр сүпити җәһәттин наһайити утуқлуқ чиққан. Шундақла фильмда роль ойниған Өзбәкстан хәлиқ артисти Саида Мансурхоҗаева, Өзбәкстанниң хизмәт көрсәткән әрбаби Гүлчеһра Насирова, тонулған қазақстанлиқ сәнъәткарлар Савутҗан Сонуров, Пәрһат Давутов, Җимиләм Әмәтова, шундақла Рустәм Ниязов, Шадийәм Турсунова, Нигара Ивеллаеваниң актерлиқ маһаритиму тамашибинларни қайил қилди.

Фильм намайиш қилинип болғандин кейин сәһнигә көтирилгән ҖУЭМ рәиси Шаһимәрдан Нурумов фильмниң утуқлуқ чиққанлиғини вә мәдәний һаятимизда чоң вақиә екәнлигини алаһидә тәкитләп, фильмниң чиқишиға зор төһписини қошқан бир топ шәхсләргә  ҖУЭМниң Пәхрий ярлиқлирини тапшурди. Шуниңдин кейин сөз алған Патигүл Мәхсәтова, Мирза Әзизов, Савутҗан Сонуров вә башқилар фильм чүширишниң тәшәббускари болған һәм бу ишниң һөддисидин шәрәплик чиққан Артур Илахуновқа иҗадий утуқ тилиди.

Йолдаш МОЛОТОВ.

http://uyguravazi.kz/?p=13039#more-13039