«Уйғур авази» гезити 22 май 2014 ж.

Пәрзәнт күлкиси билән шатлиғи ата-аниға алаһидә пәхирлиниш беғишлайдиғанлиғи һәқиқәт. Мошу күнләрдә Розахуновлар аилисидә нәқ шундақ хошаллиқ кәйпият һөкүм сүрмәктә. Чүнки уларниң үч жилдин буян «Грация» клубида спорт уссулиниң җүплүк түри билән шуғуллиниватқан он бир яшлиқ оғли Сухраб Розахунов клубларара шәһәрлик очуқ турнирға иштрак қилип, 96 җүп арисидин ІІ орунға егә болди..

А.Розибақиев намидики 153-мәктәп-гимназияниң 5-синипида оқуватқан Сухраб Розахунов 86-гимназиядә билим еливатқан Дина Байсеит исимлиқ җүпти билән «Ювеналы — 2» топида һүнәр көрситип, қазиларниң жуқури баһасиға еришти. Ейтиш керәкки, биздә яшлар арисида спортниң бу түригә қизиққучилар көп болмисиму, дунияниң башқа мәмликәтлиридә у яхши тәрәққий қилған һәм шуғулланғучиларниң сани жилдин-жилға көпәймәктә.

— Бу җүпниң келәчигидин зор үмүт күтүшкә болиду. Йеқинда Россиядин кәлгән мәшиқләндүргүчиләр уларниң маһаритини көрүп мәмнунийәт һасил қилди, — дәйду спортчиларниң устазлири шагиртлири билән пәхирләнгән һалда.

Өз новитидә биз яш спортчиларниң техиму егиз пәллиләрдин көрүнүшигә тиләкдашлиқ билдүримиз.

Һәмраҗан АБДУҚАҺАРОВ. http://uyguravazi.kz/?p=13380#more-13380