«Уйғур авази» гезити 19 июнь 2014 ж.

Футболдин дуния чемипонати өтүватқачқиму, әйтәвир, һазир қәйәрдила болмисун шуниң гепи. Әйнә шундақ дуния чемпионати өтүватқан бир пәйттә уйғурларму спортниң бу түридин дуния чемпионатини өткүзди. Уйғурлар арисида мундақ чемпионат бийил иккинчи қетим уюштурулуп, у бу жили Түркияниң Қәйсәри шәһиридә өтти. Униңға бийил тоққуз дөләттин тоққуз команда иштрак қилди. Хошал боларлиқ йери, бийил бу хәлиқара мусабиқиға қазақстанлиқ уйғурлардин тәркип тапқан «Бирлик» командиси  қатнишиш бәхтигә муйәссәр болди.

Мошу йәрдә «Бирлик» командисини тәшкил қилған вә мәзкүр чемпионатқа қазақстанлиқ футболчиларниң қатнишишиға зәмин яратқан «Бирлик» җәмийәтлик бирләшмисиниң рәиси Адилҗан Зәйнавдун билән униң оғли Меһиршатниң исмини алаһидә тилға елишқа әрзийду. Ата-бала чемпионатқа иштрак қиливатқан он сәккиз футболчиниң  у яқ-бу яқ йол чиқимини өзлириниң бойниға алди. Пәқәт уйғур балилиридин тәркип тапқан футболчиларни болса жуқури категориялик мәшиқләндүргүчи Дилшат Насиров таллавелип, улар билән бир ай давамида мәшиқ өткүзди.

Командини дуния чемпионатиға узитишқа беғишланған мәрасимда дәсләп сөз алған  «Бирлик» җәмийәтлик бирләшмисиниң рәиси Адилҗан Зәйнавдун спортчилириға ақ йол тилигәч, елимиз Президенти Нурсултан Назарбаевниң җумһурийитимиздики хәлиқләрара достлуқни мустәһкәмләштики бебаһа әмгигини алаһидә тилға алған һалда мундақ деди:

– Бүгүнки бизниң командиниң уйғурлар арисида футбол бойичә дуния чемпионатиға қатнишиши әйнә шу достлуқниң, бизгә яритиливатқан мүмкинчиликләрниң ярқин бир көрүнүши дәп чүшиниш керәк. Мән бу турнирдин силәрниң Қазақстанниң байриғини егиз көтирип қайтидиғиниңларға ишинимән.

Шуниңдин кейин сөзгә чиққан тиҗарәтчи Магелан Шәрипов, регионаллиқ мәшрәпниң беги Долқун Разиев, «Султанқорған» жәмийәтлик бирләшмисиниң рәиси Низамдун Гәраев, мәшиқләндүргүчи Дилшат Насиров яш футболчиларға ақ йол тилиди.

Ахирқи хәвәрләргә қариғанда, дәсләпки оюнда қазақстанлиқ футболчилар америкилиқ уйғурларни 4:0 һесави билән йеңивапту. Иккинчи күни болса, қирғизстанлиқлар билән күч синишип, 1:1 һесави билән тәң ойнапту. Үчинчи күни саһипханларни 16:0 һесави билән утувапту. Йерим финалда бизниң жигитләр йәнә утуққа еришип, Германиядин кәлгән қериндашлиримизни 5:0 һесави билән тиз пүктирипту. Һазирчә Қәйсәри шәһиридин кәлгән хәвәрләр шундақ. Түнүгүн кәчқурун «Бирлик» командиси финалда қирғизстанлиқ қериндашлар билән учришип, 2:0 һесави билән ғалип чиқти вә дуния чемпионати аталди.Чемпионатта мәшиқләндүргүчи Дилшат Насиров ишәнгән Меһиршат Зәйнавдун, Билал Насиров, Райим Мусаев, Дилшат Мәсимов, Ялқунжан Хошнәзәров, Равил Иминов қатарлиқ футболчилар  бу чемпионатта «Бирликниң»  чемпион атилиши үчүн бар күч-ғәйритини сәрип қилди. Ундақ болушиму тәбиий. Чүнки бу жигитләрниң арисида Қазақстанниң премьер-лигисида ойниғанлириму бар.

Бәхтишат СОПИЕВ.

Сүрәттә: «Бирлик» чемпионатқа атлиниш һарписида.

http://uyguravazi.kz/?p=13724