«Уйғур авази» гезити 4 сентябрь 2014 ж.

Биз — қазақстанлиқлар/ Павлодар шәһиридә Уйғур мәдәнийәт күни болуп өтти.

Павлодар вилайәтлик Уйғур этномәдәнийәт мәркизи вилайәттики башқиму этномәдәнийәт мәркәзлири қатарида көпмилләтлик елимиздә милләтләр вә динларара разимәнликни, хәлиқләр достлуғини мустәһкәмләш йолида тохталсиз қизғин паалийәт жүргүзүп кәлмәктә. Шундақла мәзкүр җәмийәтлик тәшкилатниң тәшәббуси һәм беваситә уюштуруши билән байқаш-көрүкләр, достлуқ фестивальлири вә башқиму шуниңға охшаш көплигән мәдәний вә хәйрихаһлиқ чарә-тәдбирләр турақлиқ өткүзүлүп келиватиду.

Конституция күни һарписида мәзкүр мәркәзниң тәшәббуси билән Павлодар шәһиридики Естай намидики мәдәнийәт өйидә болуп өткән уйғур мәдәнийәт күниму әйнә шундақ изгү чариләрниң бири болди. Униңға Алмутидин  җумһурийәтлик Уйғур этномәдәнийәт мәркизиниң уюштурушида жигирмидин ошуқ адәм, шундақла Павлодар вилайәтлик вә шәһәрлик һакимийәтләрдин, тәвәдики этномәдәнийәт мәркәзлириниң һәм уйғур җамаәтчилигиниң вәкиллири қатнашти.

Алмутидин кәлгән меһманлар җумһурийәтлик Уйғур этномәдәнийәт мәркизиниң рәиси Шаһимәрдан Нурумов, ҖУЭМниң пәхрий рәиси, Алмута шәһәрлик мәслиһәтниң депутати Әхмәтҗан Шардинов, «Нур Отан» партияси Алмута шәһәрлик шөбиси Сәясий кеңишиниң әзаси Асимҗан Злавдинов, ҖУЭМ йенидики Жигитбашлири кеңишиниң рәиси Абдурешит Мәхсүтов, Ханим-қизлар кеңишиниң рәиси Сәнәм Беширова вә униң орунбасари Таҗиниса Сәйдимова, башқарма әзалири — Қ.Ғоҗамияров намидики җумһурийәтлик дөләт Уйғур музыкилиқ комедия театриниң мудири Савутҗан Сонуров, тиҗарәтчи Турсунай Тейипова, Алмута шәһәрлик Уйғур этномәдәнийәт мәркизи рәисиниң орунбасари Қәлбинур Аруп, Яшлар кеңишиниң рәиси Әркин Җүмәев дәсләп шәһәрлик һакимийәттә, андин КХА Павлодар вилайәтлик шөбисиниң Достлуқ өйидә болуп, у йәрдә «қәд көтәргән» «Уйғур өйини» зиярәт қилди. Шәһәрлик вә вилайәтлик һакимийәт вәкиллири билән учришип, сөһбәтләшти. ҖУЭМ рәиси Шаһимәрдан Нурумов өзи рәһбәрлик қиливатқан җәмийәтлик тәшкилатниң вә униң җай-җайлардики барлиқ шөбилириниң  паалийитини җанландуруш арқилиқ хәлқимизниң миллий урпи-адәт вә әнъәнилирини, миллий мәдәнийитини сақлап, тәрәққий әткүзүшкә алаһидә әһмийәт бериватқанлиғини атап өтти. Натиқ шундақла һәрхил милләтләр арисида бир-биригә болған сәмимий һөрмәт туйғулирини  шәкилләндүрүш арқилиқ мустәқил Қазақстандики сәясий турақлиқни һәм хатирҗәмликни, бирлик билән өмлүкни қолға кәлтүрәләйдиғанлиғимизни қәйт қилип, уйғур мәдәнийәт күниниң  вилайәттә истиқамәт қиливатқан уйғурларниң мәдәний һаятидики муһим вақиәләрниң бири екәнлигини мәмнунийәт билән тилға алди.

Шуниңдин кейин улар иллиқ тәбәссүми билән көпчиликни қарши еливатқан миллий кийимдики саһипханларниң салимиға җававән илтипат билдүргәч, Мәдәнийәт өйи алдидики һашамәтлик фонтан алдида җәм болушти. Уйғур театри «Нава» ансамблиниң артистлириниң иҗрасидики нахша-саз, уссуллар көпчиликкә арамбәхш дәмләрни һәдийә қилди. Нағра-сүрнәй, дап-думбақларниң зил авазиға мәһлия болушқан шәһәр турғунлири хелиғичә бу җайдин кәткүси кәлмиди. Һәтта бәзи ичи қизиқ меһманлар миллий кийимдә сапай уссулини жуқури маһарәт билән иҗра қиливатқан уйғур жигити Шамил Бақиев билән қошулупла уссулға чүшүшти. Қисқиси, уйғур мәдәнийәт күни наһайити сәмимийәтлик шараитта башланди. Униң башқичә башлинишиму мүмкин әмәс еди. Чүнки мәзкүр чарә-тәдбирниң асасий уютқуси хәлиқләр достлуғи болуп, вилайәт рәһбәрлиги ушбу тәвәдә иҗил-инақ истиқамәт қиливатқан һәрхил милләтләрниң мәдәнийәт күнлирини өткүзүш арқилиқ, уларни башқиларға тонуштуруп, достанә мунасивәтләрни техиму мустәһкәмләшни мәхсәт-муддиа қилған екән. Шуңлашқа өз сөзини вилайәтниң бүгүнки иҗтимаий-ихтисадий әһвали, йеқин келәчәктә әмәлгә ашурушқа тегишлик ишлар билән тонуштуруштин башлиған Павлодар вилайити һакиминиң орунбасари Арын Өрсәриев көпмилләтлик елимиздики, жүмлидин вилайәттә истиқамәт қилидиған хәлиқләрниң өзара инақлиғиға алаһидә тохтилип, ушбу мәдәний чариниңму шуниң бир испати екәнлигини мәмнунийәт билән тилға алди. Өз нутқини уйғур тилида саламлишиштин башлиған Арын Амангелди оғли гепиниң ахирини уйғур тилида йәкүнләп, жиғилғанларни мәйрәм мунасивити билән қизғин тәбриклиди. Нәқ шу хил мәзмун мәзкүр тәнтәнидә сөзгә чиққан җумһурийәтлик Уйғур этномәдәнийәт мәркизиниң рәиси Шаһимәрдан Нурумовниң нутқидиму өз ипадисини тапти. Болупму Шаһимәрдан Үсәйин оғли Йәттисуда миңлиған жиллар иҗил-инақ яшап, бир-бириниң қайғуси билән шатлиғиға ортақлишип кәлгән уйғур билән қазақ хәлиқлири арисидики достлуқниң испати сүпитидә айрим тарихий мәнбәләрдин үзүндиләрни кәлтүрүп, униң техиму мустәһкәмлинишигә өз үлүшини қошқан икки қериндаш хәлиқниң көрнәклик пәрзәнтлириниң исимлирини тилға алди. Натиқ шундақла мустәқил Қазақстанда истиқамәт қиливатқан барлиқ милләтләр билән еләтләрниң мәдәнийити билән тиллирини тәрәққий әткүзүшкә имканийәтләрниң яритилғанлиғини вә қолумиздики әң  асасий байлиғимизниң һули болған достлуғимиз билән инақлиғимизни көз қаричуғимиздәк сақлишимизниң  зөрүрлүгини тәкитлигәндә, һөрмәт-еһтирам вә тәстиқ йүзисидин челинған чаваклар хелиғичә тохтимиди. Сөзиниң ахирида Шаһимәрдан Үсәйин оғли Павлодар вилайити һакиминиң орунбасари Арын Амангелди оғли билән Павлодар вилайәтлик Уйғур этномәдәнийәт мәркизиниң рәиси Арсен Турдиевқа һөрмәт йүзисидин  Қазақстан уйғурлири намидин чапан кийгүзди. Қәлбинур Аруп Павлодар вилайәтлик Уйғур этномәдәнийәт мәркизиниң биртоп әзалириға ҖУЭМ вә АШУЭМ намидин Пәхрий ярлиқларни тапшурди.

Тәнтәнә давамида сөз новитини алған Павлодар вилайәтлик Уйғур этномәдәнийәт мәркизиниң рәиси Арсен Турдиев жиғилғанларни Уйғур мәдәнийәт күни билән тәбрикләп, бу чарә-тәдбир вилайәттә яшаватқан уйғурларниң мәдәний һаятидики муһим вақиәләрниң бири болғанлиғини мәмнунийәт билән тилға алди вә Алмутидин һәм ШУАРдин кәлгән меһманларға миннәтдарлиқ билдүрүп, мәркәз намидин медаль вә Пәхрий ярлиқларни тапшурди.

Адәттикидәк, бу күнки мәйрәмму нахша-саз, уссуллардин хали болғини йоқ. «Нава» ансамбли артистлириниң, «Дәрвишләр» вә «Дияр» топлириниң иҗрасидики нәғмә-саз, уссуллар көпчиликкә шатлиқ дәмләрни һәдийә қилди. Павлодарлиқ  «Әвришим» уссул топи дилға арам беғишлайдиған миллий уссулларни бабиға йәткүзүп орунлап, көпчиликниң қизғин алқишиға еришти. Дутар-тәмбүр, нәй-сүрнәйләрдин яңриған җараңлиқ һәм йеқимлиқ нәғмә-навалар пәқәт уйғурларнила әмәс, башқа милләт вәкиллириниму сехирлиқ сәнъәт дуниясиға елип кирди.

Җәмләп ейтқанда, Арсен Турдиев рәһбәрлигидики Павлодар вилайәтлик Уйғур этномәдәнийәт мәркизиниң тәшәббуси билән жуқури дәриҗидә өткүзүлгән Уйғур мәдәнийәт күни һәқиқий достлуқ мәйримигә айланди.

Шәмшидин АЮПОВ.

Павлодар вилайити.

http://uyguravazi.kz/?p=14844